Sawi ninawm loh Lalremsiami HmarSawi ninawm loh Lalremsiami Hmar

Hockey khawvelah leh Mizote zingah Lalremsiami Hmar, India Hockey player duhlai hi hre lo kan tam lo ang. A chanchin hi mi tam takin an ziak tawh a, ziah zawh sen loh chanchin nei a ni. 

Keima mimal ngei pawh hian Mizo nula zingah chuan ka ngaihsan ber pawl leh ka dah hlut em em a ni. Chuvang chuan a chanchin ziah hi ba ka inti ve a, amah Remsiami pawh hi ka zuk bia a. Hun nei lo tak chungin min lo chhang let a, ka lawm hle a ni. 

Social media lam­ah hian Facebook leh Instagram-ah ‘page’ a nei a; heti taka mi lar leh ngaihsanawm, khawvel dengchhuak khawp a ni tawh chung erawh hian nula inngaitlawm tak mai leh biak nuam tak a ni.

Explore Mizoram website-ah hian Am­bassador niin amah an kawmna pawh chhiar tur a awm. Mi lar mi hlu a ni chung hian tlawm takin a nung a, hei hi a ropuina tizualtu a ni ve awm e. 

Kum 11 lek a upa a nih aṭangin Hockey a khel a, SAI Thenzawl aṭanga bul ṭanin India tan kum 2016 ah a khel ṭan a, vawiinah chuan khawvel pum huapa chawimawina sang ber, ‘2019 FIH Women’s Rising Star of The Year’ lawman dawng phak khawpin hlawhtlinna a chang ta a ni. Amah leh Mizo mipuite kan lawm mang e. 

Harsatna tam tak paltlang tawh a ni a, a lo chawrchhuahna in leh lo ṭhat bik lohzia te, mi dang aia chungnung leh chhuan tur bik a neih lohzia te hi a taka hmutu leh hretute kan nih kha. Pathianin talent a pek Hockey khelh erawh nasa taka tihpun tumin a theih tawp a chhuah ṭhin a. Amah Lalremsiami’n a sawi ang ngeiin hlawhtling tur chuan Pathian ṭiha nun leh keimahni hi kan pawimawh a, kan tuma kan chian bawk chuan kan hlawhtling ang tiin a sawi. 

Chu a thusawi ngei chu umzuiin Pathian zarah a tumruhna avangin tun dinhmun hi a lo thleng a ni. Hei hi keiniho pawhin amah kan entawn ve na tur pawimawh tak a ni. 

Ngaihsan tur dik nia a hriat chu hnam­dang ngaihsan loh tur tihna ni loin, a Mizo puite leh mahni kut ke ngei a dinchhuah tumte hi ngaihsan tlak an nih thu a sawi. Chuti ang ngei pawh chuan amah hi a nung a, keini pawh min fuih nghal a ni. Tumruhna kan neih phawt chuan kan tum ram ṭheuh thleng turin kan hlawhtling vek thei tiin min chah - zawm nghal hi kan bat a ni. 

Mihringte hian harsatna hi kan tawk vek a, chung chu Siami chungah pawh thlengin a pa duh takin ram danga a inkhel laiin a boral san tawh tih kan hriat kha. Heng harsatna kan tawh zawng zawngte hmachhawn tur hian keimahi tluka ṭha an awm lo; ka thil tawrh mekte hi mi dangin an tawrh ngai loh thil a ni bik lo a, mi dangin an tawrh theih chu kan tuar chhuak ve thei tur a ni, tiin Siami hian min fuih bawk a ni. 

Pathian rinchhan chungin engkim hi kan tuar chhuak thei a ni tiin min fuih a ni.