Naupang ruk bo leh khual thuthang

Thuhmahruai: Ka thupui hman aṭang hian ka sawi tum chu a chiang nghal viau mai thei e. Social media-a kan thu hmuh hmasak sak hi kan thawn darh a, kan chiai tlang a ni ber mai. Immanuel Thi Zaman phuah dan dik lote hi a darh zing khawp a. Kum 5 vel kal ta aṭang khan a dik lohzia kan sawi nawn fo. A dik lo zawk hi a darh chak zel a, lo tuipui em em tawk kan nei ziah bawk. 

Thuthang dik lo avangin Karbi ramah tlangval pahnihin nunna an chan ringawt tawh bawk a nih kha. Social media-a thu thawn darh tur chin leh awih tur chin hi thliar thiam a, finfiah kan chin a ṭul hle mai. Tunlai thuthang kaihhnawih hian thil pawimawh tak tak i han sawi teh ang. 

Assam-a naupang ruk bo: “Assam-ah naupang ruk bo ching an awm a, chuti khati,” tih hi a darh nasa a. Sawi belh tur nei, mi dang aia hre tam leh belhchhan chak kan tam ni te pawh hian a lang. Mizorama a thu rawn darh dan tak chu hetiang hi a nih kha, “Nava min hrilh a nia. Guwahati-ah kidney etc vel hralh tur target hrim hrim gang an che nasa hle a ni awm e. Thingtlang hmun hrang hrang aṭangin mi 500 bawr vel an ruai a, chungho chu hmun hrang hrangah an inṭhen darh ta a, an target ber chu naupang a ni a. An organ hralh duh avangin. Chuvangin, fimkhur hle ang che u. Guwahati-ah heng misualho hi tlem te an man tawh a, police te pawhin an chhui mek zel a. 

Naupang kha veng fimkhur hle rawh u aw. Vai thilchhe siam, thil zuar, cooker chhe siam etc etc... tumah in chhungah luh tir suh u” 

“Heng naupangte hi an school aṭang te a kidnap-in an body parts te hralh atan an tihhlum hnu motor pakhat a hmuh chhuah hlauh a ni. Mahni fa te ṭheuh veng ṭha tura in chahna atan theh darh a ni...” He thilah hian Assam lama mi rintlak ka zu zawt a, a taka thil thleng a awm awm an hriat loh thuin min chhang. Thu thang erawh chu a awm ngei. Police Station pahnih leh an police hotute zu biak pawhnaah pawh ka zu biak chin hi chuan chutiang report a awm loh thu leh an hriat loh thu pawh an sawi. A video darh pawh Bihar lam a ni. 

Chu chu naupang rukbo hi a awm ngai lo e, tihna lam a ni lo a, tunlaia thuthang kaihhnawih kan zawh fiahna min chhanna a ni. 

1.10.2019-a ka zawhna dawn: Major Kunga, CHAN hnen aṭang-in, “Nimin piah khan Lunglei khaw chhungah naupag pa 2 ruk bo an ni a, a ru botute hi vai thir chhe zawng anga in sawi te an ni a, mah se lunglei an chhuah san hmain lunglei police te chuan an man hman a ni. I fimkhur tlang ang u…tih hi thu dik a ni em?” tih a ni. Ka chhanna chu “thu dik lo a ni e,” tih a ni.

Hetiang hian awlsam takin thu a darh a. Kan hriat pawh, kan hriat sual zawng zawng nen a darh a. Kolasib-a naupang bo leh zeldin thu: Hei hi ni 1.10.2019-ah vek a darh leh chuai chuai a. Hetiangin -BREAKING NEWS

“Kolasib-ah tun mai khan naupang kum 4 mi chu a pa in dawra thil a leisan lawk hlanin vaiin an rubo hman. Tunah hian information-ah an puang dum dum mai. I fimkhur tlang vek teh ang u. Vai mi rukbo ching hi a tak tak a ni tlat, kan fate min rukbo sak ve hma ngeiin fimkhur em em a ngai,” tih a ni. Mahse, hei pawh hi thil awm dan dik tak chu hei zawk hi a lo ni a. 

“Vawiin Dt. 1.10.19 chhûn dar 12:30pm bawr vel khan, hmeichhe naupang kum 3 mi - Julie Lal­hruaimawii d/o Lalrammawia of Kharzawl, Bilkhawthlir chu a pa hian Kolasib-ah Aadhaar Card siamtir a tumnaah a hruai a. Adhar Card siamna dawr, Hmar Arsi Dawr, Diakkawn Kolasib-ah, dawr chhûnga an awm laiin, a pa hriat loh hian a tei chhuak a, hei hi lo hmu leh han sawi zui thei an awm lem lo. Naupang hi Diakkawn Biakin tláng lamah chhoin, Salem Veng a pan thla a, Jubilee Road-ah a lo kual chhuak a, Bazaar thleng lo a AG Veng lama peng nia rin a ni. Pi Lalhlimpuii (58) w/o VL Siama(L) of AG Veng, New Diakkawn Kolasib chuan an kawtah thing a eh laiin, he hmeichhe naupang hi lo kalin, "Apa bulah min hruai rawh a rawn ti a," ani chuan "Khawnge in awm" tiin, naupang hian "khu tah" ti chauhin a chhang thiam a. Tichuan an hmu leh ta a ni. Naupang hi Vai hruai a nih hmel lo a, Hmar Arsi dawr bula Pi Sangpuii Hawker-ah hian, helai vèl bawr hian Vai thil lei an awm thu an sawi nen chuan Vai rukbo angin thu a thang ta a nih hmel.” 

Thil a ni lo zawngin kal sela, pawi sawi loin kut an tawrh theihna boruak a ni nghal der mai. 

    Naupangte ngaihven

    leh fimkhur pui: 

1. Naupang hi ruk bo leh hruai bo an awl a. Tuten emaw, eng hunah emaw an ruk bo remchang em em an ni. Mihringa sumdawnna hi khawvela sumdawnna lian a nih avangin, naupang ruk bo hi an awl ber a. Kan fimkhur a ṭha a, kan fate chin hriat a ṭha hle. An kum mil tawka fimkhurna thu leh inven dan pawh hrilh a ṭha.

2. Naupang ruk bo mai ni lo, naupangin khuakhem an tawk nasa. Kan fimkhur a, nu leh pate pawh kan ṭan deuh deuh a ngai. 

Vai ILP leh a sponsor-tu: Sponsor-tu nei loin ILP a neih ngawt theih loh. Sponsor-tu tam takin kan vai sponsor-te kan ngaihsak zui ṭhin lo bawk. ILP chungchang hi kan fimkhur em em a ṭul. Hun dangah chipchiar zawka sawiah khek ang. 

Khual thuthang leh thu dik: Khual thuthang hi chu a darh tial tial a, thu dik a tlem tial tial duh. Kan thu hriatte awi nghal ngawt ching lo ila. Tharum thawh ngawt mai phei chu in sum ila. Engemaw rinhlelh thil kan nei a nih pawhin, Police hrilh thuai a ṭha ber. Tin, thu dik zawngtu ni ila a ṭha awm e. 

- F Vanlalrochana