Khawpuia street light vuah belh

Kan hriat angin, Aizawl khawpui chuan kum 2010 aṭangin kan khawpui enkawltu tur bik Aizawl Municipal Corporation (a tirah Council) kan nei ṭan a nih kha. A tirah chuan mipui náwlpuiin AMC tih tur chiah pawh kan hre vak lo a, mahse, kan tawng chho a, kan hre chho ve ta zel a nih hi.

AMC sawrkar term khatna a zo a, a term hnihna pawhin kum khat êrh âwrh bâk an nei ta lo. Term hnih la pumhlûm lo deuh chhungin AMC hmalakna leh hnathawh te, an thil tihte chu eng emaw zat kan hmu ngei mai a; khawpui hmasawnna tur thil ṭha, mipui tana ṭangkai si pawh eng emaw zat an ti tawh âwm e. A lawm­awm a ni.

AMC hmalakna leh hnathawh ṭha tak tak hmuh tur a awm karah hian, tun aia ṭan an lak leh zualna tur nia ka hriat thil pakhat chiah han sawi lan ka duh a; chu chu - khawpui chhung kawngpuia êng (street light) vuah chungchang hi a ni. Khawpuia street light vuah hi AMC tih tur niin an sawi a.

Tun hma deuh ai ngawt chuan tunah chuan zan lamah khawpui chhung a êng zawk ngei mai a, kawngpui dung pawh a êng zawk âwm e. Mahse, khawpui dangte ngaihtuahin, zan lama khawpui chhung kawngpui tihên chungchanga hmalakna tur a la tam hle mai. Veng chhung bik kawngpuia street light vuah chu sawi loh, khawpui chhung tlangdung kawngpui (main road)-ah ngei pawh street light a la tlem em em mai a. A hming chuan street light eng emaw zat chu a awm ngei mai a, mahse, tuna kan street light neihte hian a la èn zo lo hle thung.

Kan hriat angin, zanah khawpui chhungah chuan motor headlight a chhun hniam chi (low beam)-a dah tur an ti ṭhin a, a ṭha reng mai. Chutih rualin, mahni tâwk zawngin motor dang (low beam-a dah ve tho pawh) lo tlân se, khaw hmuh a tâwi em em mai a, insut phah thuak thuakte pawh a awm tawh âwm e. Chutiang chu a nih avangin, high beam-a motor light dah a awl em em a; chutih rualin, motor dang tan harsatna thlentu a ni leh ve thei tho si.

Heng harsatna awm ṭhin kan sawite hi street light awm ṭha se chuan a kiang duak thei ngei ang, a chhan chu - motor light-in a chhun phak lohte pawh street light-in a lo tiêng dawn tlat a ni. Tin, lirthei khalhtute tan leh kawngpuia kal vel tana a ṭhatna chu thu dang ni se, thi sual ti turte hnawh kianna ṭha tak a ni bawk.

Kan AMC hian thil hrang hrangah hian an tih tur chinah chuan tun aia nasa lehzualin ṭan han la se; kan khawpui chhung kawngpui dungte pawh hi tun aia nasain han tiêng ut mai se, a va nuam dawn em! 

- Vanlalthlamuana