Ramri hi a va reh ta ve

Ramri buai kha kan buaipuiin politics lama inpuh tawnna atan kan hmang a. Tunah hian a reh ta vang vang a, kan sorkar chuan ramri chu a siam fel ta em le? Tunah hian ramri khu a fel ta duak a ni lo a, Assam nena kan inepna boruak sang kha a dai ta deuh tih mai chauh a ni a, Assam nena kan ramri hi a la fel miah lo. 

MNF Sorkar Cabi­net Meeting khan 2019 ah khan Bengal Eastern Frontier Regulations, 1873 (Regulation 1 of 1873) Section 2 tlawhchhana siam Cachar Inner Line, 1875 chu ṭan chhan atana hman tur leh sawrkar dinna a ni tih an nemnghet a, chumi awmzia chu Mizoram sorkarin ramri tia a pawm chu Dholai bula mi a ni. 

Sorkar laipui a rawn inrawlh a, anni hian Mizoram ramri chin fel aiin Assam nena kan buaina chin fel chiah an tum a, Mizoram ramri hi an rawn vei ve lem lo. A veitu tur ber Mizoram sorkar pawhin eng tia hmalak chhunzawmna a nei bik lo a, Mizoram sorkar hruaitute nen danglamna an nei lo, ramri an vei loh dan hi chu 'ek sa man' a ni tawp mai. 

Assam lam chuan an duhna laiah an duh angin kut an thlak a, an duh leh kan ram chhunga kan chhalah in te an rawn sa a, tu zawk mahina kut thlak phal lohna (status quo) te pawh an bawhchhe miah miah a, Mizoram sorkar erawh chu ramri humhalh ta nge tih aiin a theih chen chen chu ramri ching fel loa ngawih bo hi a tum ni berin a lang. Ram leh hnam tana ding party nia inchhal MNF ministry hian ramri hi a vei tak tak lo a, ramria buaina awm chin felah hian a lungawi tawk viau a ni thei em? 

Ramri-ah Vairengte khawtlang mipui ram chhana an thawh chhuah laia Vairengte bula Mizoram IR Sipai silai bula kan hmuh, kan Minister leh MLA te khan kan ramri chu an zuk chingfel ta nge Assam BJP sorkar inthlang tur boruak siamna mai mai kha an zuk ṭawiawm ve zawk tih pawh hi chhut tham a ni ta viau mai.  

A nihna takah chuan ram chhan nana feh chhuak Vairengte khawtlang mipuite kha an zahawm ta ber mai. Mizoram sorkar leh kan police-te khan Vairengte mipui kha an thlawp zo lo viau zawk a, an thlazar hnuaiah ram chhan hna an thawk a ni ber. 

Kan ramri tia Mi­zo­ram sorkarin a pawm pawh kan zuk humhalh ngam chuan si loh chuan, Raju-a leh a pawlte hi an chak zel dawn a, tun aia nasa pawh hian min la nek ang. Ram leh hnam tana din MNF sorkar hi a tawlh leh duai duai ang a, Vairengte daiah ramri an rawn kham ang tih te pawh a hlauhawm ta hial mai! 

- Lalpekhlua