Post ṭha ber dawt Traffic Police

Mizoram Police hi mipa hlir awm khawm si an inrel sup sup ṭhin e, an ti a. Constable level-ah an inrel a, Inspector level-ah pawh an intel a, MPS level-ah pawh an inrel chur chur mai - a chhan chu rank khat ṭheuh ṭheuh hi an post azirin an dinhmun a inṭhat hleih lutuk ṭhin a ni. Police officer ni phak lo tan chuan Security-a awm a ṭha ber a, a dawtah Traffic Police an tia lawm! 

Hei hi sawi zauna han nei dawn teh ang. Security-a awm chuan Police Uniform an ha lova, hei hi Mizorama Police constable tam takin an thlakhlelh a ni. Police-ah chuan lal a na a, lal loh a hrehawm bawk si nen uniform-a lal lo ber nih chu a hrehawm avangin Security-a awm chu a chuhin an inchuh a. Sorkarna inthlak rualin Security-a awm Police hi an inthlak a, tun hnaiah pawh an inthlak nasa a, ruling post niin an sawi hial ṭhin. 

Sawi ka tum tak chu Traffic Police lam zawk hi a ni a, tun hnaiah Traffic Police thar an tam hle. A thar na na na chuan an phar thiam lo deuh bik a, a hlui la ṭha tak ṭhenkhat chu Traffic Police aṭanga sawn chhuah an ni. Traffic Police-ah hian Armed Police te pawh tam tak an dah niin an sawi. Silai keng tura Police-a lut, Armed Police ni na na na Traffic Police-a dah hi thil tih awm a ni lo. Traffic Police nih chu Aizawla awm theihna a ni a, operation pawh ngai se an zin chhuak ve lova, Aizawlah ngei an awm theih avangin an inchuh a, ruling post tho an ti. 

Traffic Police tharte hi chhui chhui ila ruling party an ni deuh zel mai. Kum 4 hnu velah Traffic Police thar kan nei leh maithei bawk a, hetiang mai mai hi Police titi a tling ve asin. 

- Lalramliana