AIZAWL KHAWPUI TAWT LEH TLANGRAM LO NEITUTE

Hmanni chu ka taxi chuanna driver-in Aizawl khawpui traffic tawt chhan nia a hriat min hrilh a. “Kan sawrkar hian tlang ram lama khawsate min ngaihtuah ṭhin lo va, kan eizawnna hi min ngaihtuahpui ve deuh se, kan thawh chhuah ang angte hralhna tur hi min ruhmansak sela chuan Aizawlah hian lutin taxi hi ka khalh dawn lo hrim hrim a. Thingtlang lam min ngaihthah avangin eizawn a harsa a, chuvangin Aizawlah ka lut mai mai a ni. Keimah ang bawka lut hi tam tak an awm a, Aizawl hi chuvanga tawt mai mai chu a ni” a ti. 

Kan khawpui tawt ta lutuk hi mi mir hian kan vei tlang hle a ni tih a lang chiang khawp mai. A sawi hi a dikna chen a awm. Bihar sawrkar a inthlak danglama mi retheite lam an han hawi thut khan Aizawlah kuli rawih tur an vang nghal duak mai a ni. Chumi awmzia chu Bihar sawrkar kal tawh khan mi retheite an lo ngaihthah a, chuvangin India ram hmun hrang hrangah hna hnuaihnung ber pawh thawh huamin an darh chum chum a, Mizoram thleng pawhin Aizawl khawpuia ei zawng turin tam tham tak an lo chhuak a ni. 

Sawrkar thar an nei a, mi retheite an han ngaihsak takah khan, an ramah ei an hmu ta, state dangah kuli hna thawk a, ei zawng a, rethei taka awm a ngai bik ta lo. An ramah ngaihsak an hlawh a, ei an hmu ta tihna a ni mai. Myanmar sawrkar a inthlak danglam a, sipai sawrkar hnuaia tihretheih leh ngaihsak hlawh ngai lote khan zalen zawkin hna an thawk thei ta a. Mizorama Myanmar mi kan sawi leh buaipui a reh mai. Hetiang chiah hian kan sawrkar pawh hian a ngaihsak ngai loh tlangram loneitute hi ngaihsakin sawkar budget-ah chhawmdawlna tur dah ve se la. Leilet neite ṭanpuina ang tho tlangram lo neitute hian dawng ve se. Kan Aizawl khawpui tawt lutuk hi a ziaawm sawt ang. Krismas vela Aizawl a thawl deuh rung dan aṭang pawh hian thingtlang mi Aizawla ei zawnga khawsa an tam a ni tih a lang reng. 

Hei hian chiang taka a lantir chu kan Mizoram sawrkar kal tawh reng reng khan thing tlang lam mi, lo neiha ei zawngte an ngaihthah tih hi a ni. Kan sawrkar, mi retheite ngai pawimawh em ema insawi, ‘kan VIP-te’ titute hi an thil tih hmang leh programme duan dan aṭangin thing tlang mite eizawnna nei lova siam tumtute an ang leh thin. Sawrkarin Kut hnathawktute tana pension scheme a duang chhuak hi a lawmawm hle. Hei hi an pension hun atan a ni a, an pension hma hi puih an ngaih hun, an pension hun atana an dinhmun an chher hun tur chu a ni a. An ṭhat laia an hna thawhna ngeia ṭanpuina tur siam a pawimawh. 

Mi tinin kan mamawh chu ‘keimah ka ni’ inti ve theia kan nun leh khawsak hi a ni. Mi pangngaiin mi thil peka nung hram hram nih kan duh lo. Tlangram lo neituten anmahni thawh chhuah ngeia ei an hmuh a, an hun lo awm zel tur atana an chhungkaw dinhmun an sawh ngheh ve theihna turin sawrkarin kawng danga eizawngtute a ngaihsak ang bawka ngaihsakin ṭanpui ve se la. Mizoram mi an nih ang takin Mizoram budget-ah chanvo pe ve ngei se a duhawm hle. Chu chuan Aizawl khawpui tawt lutuk hi engemawti kawng talin a tiziaawm bawk ang. 

- Commissioner Lalkiamlova, A/18 Tuikual South