‘RAM LEH HNAM HUMHALH’ HI HNAM DANG HUAT TUR TIHNA A NI LO

Kan ramin boruak hrang hrang a tawn ṭhinah hian ‘ram leh hnam humhalh’ duh avanga mi ṭhahnemngaite awkâ tam tak kan hre ṭhin. Ram leh hnam humhalh avanga hnam dang huat tur emaw ti tlat pawl kan la awm erawh a dik zawk - inzirtir leh inkawhhmuh hi kan tihtur a ni ang. 

Ram leh hnam humhalh hi haw haw thil a ni lo va; he thu hian hnam dang min huattir a tum ber pawh a ni lo. Keimahni lam kan inzilh ṭhat a, kan infuih thar a ngai hmasa a. Kan ram leh hnam humhalh thei tura ṭanrual dan tur te, hnam dang karah pawh awm ila kan ral loh dan tur leh kan dam khawchhuah theih dan tur lam fing taka ral phiara kan phiar a hun viau. 

Khawiah nge Mizo mipa te?: Tun hnaiah Mizo nula langsar pakhatin hnam dang pasalah a nei a, kan social media huang lam a luah deuh emaw tih tur a ni. A hma lam pawhin kan nulaten hnam dang an nei a; kan en liam mai mai ve bawk a ni lawm ni? tûn ataka! Tun hnaiah kan nula ṭhenkhatten social media lamah zahpahna nei lek lova hnam dang an khawsakpui lai thlalak te; hnam dangte nena an chetla lai thlitfim hauh loh video te an dah (post) ngam ta! 

Kan Mizo tlangval te iai leh hmusit rawngkai taka thu an ziak (post) hmuh tur a tam ta deuh va; chung chuan kan tlangvalte thin an tiûr ve bawk atin ni! An sawi ang hian Mizo mipate hi pasal tlak kan awm ta lo tak tak em ni ang? 

Kan hnam nun mawi chawi nun a ngai e: Tûn hma chuan ‘thiang lo’ (taboos) te kan nei a. Chu chu kan Zo nun zemawi tak nen khan a inzawm. Tunah chuan ‘thiang lo’ a bo zo va. Khawtlang nun dan ṭha kan neihte pawh a bo tial tial a. Kan hnam nun ṭha tak takte kan hnualsuat a. Kan che ta bawrh bawrh a nih tak mai hi! Engkim kan pawm zam a, a rah chhuah kan hmu mêk!

Kristianna chu sawi loh; Mizo nun dan ṭha kan kalsan tial tial vang hian awmze nei lova nun a hring a. Chhungkaw keh chhia kan tam phah em? fahrah kan awm hnek hnuk a; chhungkaw pangngaia seilian lo kan pung tual tual a. Kan hnam nun ze mawi tak kan tuh thar leh a ngai. Heng-Aia Upa zah te; sem sem dam dam, ei bil thi thi tih te hi kan inzirtir thar lehzual a ngai. Zirtirna ṭha dawng lo, zilh loh fa an tam miau chuan khawtlang ṭha kan beisei ngam lo vang a, kan faten hnam dang an neih mai loh nakah! Chhungkaw rorel ṭhat a ngai: Thenawmte hriat lohva chhungkaw rorel ṭhat kan ngai hle. A phawvuak leh huau huau; pawnlam lang theia kan inhawt bukna leh awmze nei lo va hnam dang beih chiam hi ram leh hnam humhalh entirna pawh a ni lo. 

Kan pawnlam incheina leh lan dan aiin chhungril a ni zawk ang. Kawrchei ha rengchung hian hnam dang sawn a pai theih a, vakir ia khim chungin hnam dang rûnah a lawi theih tlat! Hnam dang nupui pasal neih loh kan duh tak tak chuan tlawmngai pawl leh MHIP te pawhin ṭan la thar sela; mahni YMA branch huamchhung leh Local Council/VC area ṭheuhah tih tak tak hmalak nise kori a tu deuh mahna le! 

Thil hi kan han sawi hluai a, a reh zui leh mai. Kar hnih pawh kan sawi zui leh peih loh hi a tam zawk a ni maithei. Kan thu khel tam tak hi chu a bul thûm kan hriat ṭhaṭhum loh pawh a awmin a rinawm. Vei zui chet chawta thil tih kan la thiam tawk lo ni pawhin a lang. Mizo kan ni a, kan pi leh pute aṭanga hnam hawihhawm, tlawmngai, huaisen, taima, chhel, rinawm leh aia upate zah ṭhin kan nih te hi kan chhungkaw inzilh tharna tur a ni zawk e.

Engnge ngaihtuah tur?: Ram leh hnam humhalh tih hian khulai Zophai ramri, Bagha tih vel chauh a ni lo. Keimahni lamah ram leh hnam tichhe thei thil - eirukna do te a ngai asin. Awmze neia kan ram a kal a ngai. Sawrkar kalphung siam ṭhat tur pawh a awm ang. Kohhran pawhin mawhphurhna tam tak kan nei ang. Hnam dang laka kan rilru put dan tur te pawh inzirtir theih a ni. Social media hman dan tur te, party politics ruihchilh ban san dan tur te, hnam nun ṭhang leh inthlak zela rilru puthmang dik kan put dan tur te pawh ngaihtuah thar a ṭul tak zet a. 

Ti, he hnam hian hnam inpumkhatna ṭha kan neih theihna tur zawngho lehzual thei ila a duhawm hle. Zo hnahthlak peng hrangh hrangte zai khata kan luanza theihna tura hmalakna lian tham eng nge kan neih tawh? Tlawmngai pawl ṭhenkhat leh mimal ṭhahnemngaiten an tih hi a ni deuh mai em? Sawrkar lam pawh hian National integration programme kan nei ang hian Zo Integration programme tih te kan duang chhuak thiam ang em? 

- Zonunsanga