NGO inthlanah politics leh sorkar

Hei, kan pawl lian ber Central YMA hruaitu thlan tur chu a thawm a lian leh ta mup mup hle mai, a hre tur deuhva ngaih chin chuan candidate nih tum leh post an tinzawn deuhte pawh an hre fur tawh a. Mizo Zirlai Pawl pawh an inthlang dawn a, hengah hi chuan chiang takin line up hi an siam fel law law tawh a, politics lam rimnam sa deuh a nih avangin politics a inrawlh leh ngei a rinawm. CYMA inthlan mawlh mai hi hriat chian a chakawm. 

YMA inthlan lam sawi hmain NGO dang inthlang lo thlir ta thuak thuak ila. MHIP chu inthlang thei lovin an han buai phawt a, chumi hnuah an inthlang ta a. Kan rin lam nge ni tling rin loh lam hriat zuk ni suh; political party lam aṭanga thlir chuan thil a phir sung mai a, khawi chin hi nge line up tihte leh political party lam eng chinin nge an inrawlh ve? tihte chu pawn lam aṭanga thlirtute chuan kan hre thei lo. MHIP inthlangin sawi a hlawh leh ngaihven a nih chhan chu politician langsar nipuite an awm fur a, chu bakah hruaitu nih tum ṭhenkhat chu politician te an ni a. Chuvangin, politics takin thil a thlir loh theih loh a ni. Tunah chuan Court-ah thubuai a lut rup si a, MHIP inthlang hi chu sawi thui theih a ni lovang. 

Pawl lian tak inthlang zo tawh chu Mizoram Football Association a ni. Hei pawh hi a hre chiangte sawi dan chuan a pui mup mup viau a ni awm e. MFA hi chu pawl lian leh chak tak a ni sain Mizorama pawl thawm nei lian an ni sa bawk a, an inthlanah khan VIP car kha an inthlanna hall kawtah a ding thelh sung mai a. VIP te pawh ṭhahnemngai takin an campaign kual sup sup a, a tawpah VIP car-a lo kalte chu an haw ngui nghuai mai a, political party pakhat whatsapp group ṭhenkhatah chuan, "Kan party min ti mualpho nasa lutuk. Mi pawl ṭha taka awm saah politics takin inzeh luh an tum a, an tling zo leh si lova kan party tan a mualphona," ti lam hawia ang thawm a awm nual an ti. MFA inthlang kha pawn lamah mipui mimirin kan hriat dana tluang tak kha a chhungah tun hmaa awm ngai lo politics chakna hmanga luh tum rana beitu an lo awm reng a nih hmel a, mahse a tawpah pawl chu pawl kal ngaiin a kal zel ta a, hruaitu ngai an tling leh ta a ni, an ti lawm. 

MZP inthlang hi chu tun hma aṭang tawhin 'ruling versus opposition' angin a kal deuh a, mahse anni pawl pawh hi dan naranin Vice President ṭanglaite President lama an kaisan chhohna ṭhin kha a ni. Tun ṭum inthlang hi a dan a danglam dawn nge dawn lo? tih chu a pawl chhunga inchiah sa tan lo chuan hriat a har deuh. MZP inthlan hi sorkar tan a pawimawh ṭhin a, MZP hruaituah rilru lama an thurualpui theih an neih chuan sorkar tan duhthusam a ni a, sorkar nawr duh miah lo MZP hruaitu an awm chuan sorkar tan a thawhventhlak ang a, MZP hruaitu tan a 'hlawk' bawk ang a, nakina MLA tih vela an rawn in candidate ve leh hunah pawh an bank account chu an kum rualpui lehkhathiam sang zawkte nena khaikhin pawhin a chhah leh telh telh viau ang chu. 

Central YMA hi ngaihven a ṭul khawp mai. Anni hian, “Hmuah tur,” an tih chu Mizo mipuiin kan hmuak a, "Pawndum nen," an tih leh kan thin a rim sa nghal ul mai ṭhin. A chhan pawh hriat lova, "Pawndum sin leh loh tur," an tih pawhin kan ngaihdan ni lo mah se tumahin YMA hruaitute sawiseltu nih chu an duh lo ṭhin a, hei vang tak hian CYMA hruaitu huaisen kan thlan thiam a ngai. 

Tun hnaiah 'hnam thil' avanga Republic Day boycott tura rel tawh chu kan NGO lian hruaitute hian an ṭhulh thut a, CAB avanga kan duh loh sorkar laipui Home Minister chu pawndum nen kan hmuak dawn emaw kan tih vek laiin min ṭhulh san leh tawh bawk. YMA hruaitu ngaihdan thlak zung zung ve ngai lo neih te pawh he ram hian a mamawh tawh a nih hmel. A hre chaing deuhte chuan 'tling tur sa' tih post pahnih khat an sawi thei a, "Chu chu chumi post-ah chuan a ding thei tawh dawn si lova chumi post chu a chuh dawn," tihte an sawi. CYMA inthlanah post chuh a awm ngai emaw ni? kan hre ve der si lo. 

Titi pakhatah phei chuan, "Chumi post-a mi nilai chuan rin loh deuhin chumi post chu a va chuh daih dawn a," te an ti a. YMA inthlan ni se, post by post-a nomi­nation siam ni bawk si lovah chuan thil mak tak a ni. MZP leh CYMA inthlan lo awm tur hi mipuiin kan thlir ṭhap a nia.