AIZAWL TRAFFIC BAWK

Kan hotuten traffic jam tiziaawm tura theihtawp an chhuah hi a lawmawm hle mai. Kan vei tlang a, ṭha tura kan ngaihte han thawh ve leh ṭhin pawh inthlahrunawm ni lo turah ngai ila. Tun ṭum chu Aizawl, tuna a nih ang anga traffic tihziaawm dan tur lam i thlir teh ang: 

Kawng zawmpui nei lote hi zawm neia siam vek ni se: Aizawl veng hrang hrangah hian motor kawng zawmpui nei lo, a kal apiang let leh ngei ngei ngai kan nei a. Entir nan - Dinthar kawn aṭanga Tuikual North leh South kal tlang motor kal theihna kawng pathum a awm a. A chung ber chu Tennis Court-ah a lo chhuak a. A laita hi JL High School thlangah hian inherna hmun (turning point) awmin chuta ṭang chuan Khatla kawn lam hawia kal leh Khatla North Presbyterian Biak In lama chho a awm. 

Khatla, Assam Rifle ram hawi zawnga phei hi Upa Khawlrimawia kawtah a tawp hawl mai a. A kal apiang chu let leh ngei ngei ngai. He kawng hi Khatla Assam Rifle ram tawite la a, kawngpui pawh chho thei mai a ni. Siam tlang ni se Khatla kawn jam chhawkna ṭha em em tur a ni. A hnuai ber hi Tuikual lui kamah a tawp hawl bawk a, hei pawh hi Assam Rifle ram kal tlanga New Capital lama tlangtir theih a ni. Kan sawrkar hotuten hma han la se, a duhawm hle mai. Sipai rama kawng kaltir hi thil theih loh a nih ka ring lo, Shillong Happy Valley-a sipai ram chhungah reng public kawng a kal thui mai. 

Dinthar veng chhungah hian kawng pahnih kan minister zahawm tak lo ni tawh ṭhin Pu Aichinga leh Pu Hipheia te hming chawi kawng a awm a. A eng mah mah hian zawmpui an nei lo. Kan minister zahawm tak takte hming pu ni si, kawng tawp a ni ringawt mai te hi kan sawrkar hian ngaihven se a ṭha ka ti hle mai. Pu Aichhinga Road hi Dinthar chhim chhawng chuanhnuai kawng a ni a, Tuikual North epa awm niin Tuikual North YMA Hall hnuai kawngpui pawha kaltir theih ngei tur niin a lang. Hei hi tlang sela chuan Dinthar kawn traffic jam tiziaawm thei ngei tur a ni bawk. Pu Hipheia Road hi Dawrpui Vengthar kal tlanga Vaivakawn leh Kanan veng pawha kal tura duan ni awm tak a ni. Kal ta lovin Dinthar veng vekah harsa taka chhuah theih ṭawk ṭawka siam a ni. 

Aizawl veng hrang hrang­ah hetianga kawng kal leh zelna tur awm lova tawp ringawt mai hi a awm nual mai. Kan sawrkar hotuten kawng siam thuah ṭha taka hma an lak mek lai hian heng kawng zawm nei lova tawpte hi zawmpui neia siam turin hma han la se; traffic jam tihziaawmna tur ṭha tak a ni bawk ang. 

Kawngpui pawhtu kawng, a side lo lama lo lut hi: Hei hi traffic jam siamtu pakhat chu a ni. Entir nan Governor chhim lam gate bulah kawng pahnih BJP office aṭanga lo kal leh Tuikhuahtlang aṭanga lo chhukte hi an awm a. Heng kawng pahnih aṭanga lirthei lo lut hmar lam hawia tlan zel turte hian anmahni side (left side) a kal turin, hmar lam aṭanga lir thei lo kalte an tihdin ngei ngei a ngai. Hetiang chi hi khawpui chhungah hian hmun tam tak a awm. 

High School field aṭanga Zarkawta lo chhuk chhim lam pana tlan turin chhim lam aṭanga lo kalte a tihdin a ngai a. Damveng aṭanga Thakthing bazara lo chhuak hmar lam pana tlan turten hmar lam 

aṭanga lo tlan (traffic flow) an tihchah ngei ngei a ngai. Heng ang chi te ṭha zawka siam dan ngaihtuah a ṭha khawpin ka hria. Kawng chhawng sei pui pui kan siam theih hmain heng te hi anmahni side-a an tlan luh theihna tura flyover emaw underground emaw siam theih a ni nualin ka hria. Heng hi kan sawrkar hian zawng chhuak se, kan mi thiamten a tih dan tur ruahman dan an hriat ngei ka ring. 

Kawng thar: Eng maw titi a kawng thar siamna tur remchang ngaihtuah ni se, khawi lai laiah emaw hi chuan a la theih mai awm asin. Entirn nan: Tuithiang veng aṭanga Assam Rifle ram awih panga phei a, Dakin kawm thlang kawng kawi lai taka rawn fin tur hian a siam theih ang a. Chu lai aia ṭha zawk chu a awm mai thei bawk. 

Dawrpui Vengthar aṭanga Chanmari west-a kal phei tur hi Chief Minister in liama khamah hian a ruahman theih dan a awm mai awm mang e ka ti deuh bawk. Kawng thar atan hian lei lai kher lova RCC structure-a siam ni se, a ban khur chauh laih ni se, leimin a siam lo bawk ang. Laih ai chuan a him zawk fe ka ring bawk. 

Ke-a kalte tana kawng kanna: Kea kalte tana kawng kan hi traffic flow tibuaia jam siamtu pakhat a ni. Junction pawimawh leh lun zual ho zawng zawngah hian chho lutuk lo, kal nahawm tak tur siam ni se. A bikin Ke-a kalte kawng kan tam zualna heng: Schoolpui kawn, Dakin pui kawt, Zodin, Zarkawt, Chanmari, Bawngkawn leh Bazar Bungkawnah te hian. Kawng kanna hi RCC kher lo, truss-frame pawhin a siam theih ngei ang. Bungkawna siam sa zawm hian Civil Hospital gate aṭangin siam thlak ni se, Modern School lam aṭanga lo chho te tana kalna tur siam bawk ni se la. 

Heng hi traffic jam tihzia­awmna tur atan ka layman mita tih theih ngei tura ka hmuh leh rinte an ni a. Kan hotute hian han zir ve hrim hrim sela ka duh hle a ni.