Pawisa thir ‘ban’ hi...

India ramah hian kristian tam dan indawt chhutin hetiang hian a percent zawngin chhut ila kan dinhmun mek chu a ni. 

1. Nagaland 90%, 2. Mizoram 90% 3. Meghalaya 74.59%. 4. Manipur 41.3% 5. Arunachal Pradesh 30.3%. Goa 25% 6. Kerala - Tamil Nadu 6.2%.

Nagaland & Mizo­ram hi percent inang ni mah se a lu nunga chhiar (head count) chuan Mizoram aiin kristian an tam. India rama kristian tamna ber an ni a, Mizoram hi pahnihna kan ni. 

Mihring chuan sum kan mamawh vek a, kan nitin khawsaknaah hian tangka/ sum neih a ngai. Abrahama te hun lai aṭang tawhin tun thlengin khawvel tawp thlengin tangka hi a pawimawh dawn a ni. Sum hi tu hmuh chhuah nge tih chiang taka hriat theih ni lo mah se BC 5000-700BC inkar vela hmuh chhuah a nih hmel. 

Atir aṭang rengin tangka hi a lehkha (note) leh thir (coins) te hi siam kawp zel niin a lang. Bible aṭanga kan hmuh erawh chuan hman lai aṭangin pawisa thir (coins) chauh hi an chelek ṭhin emaw tih mai awl tak a ni. 

Ram (country) azirin tangka design leh a rawng, size/ shape chu a inang vek lova a hlut zawng pawh a inang vek lo. Pawisa hlut leh tam lam inzãt mah se a siamna hmanrua azirin a hlut zawng erawh a inchen lo thei. Tehnaah pawh alloy ai chuan gold chu ngaihlut zawk a ni. Hetiang zel hian coins rau rau pawh a hlut dan a inchen lo thei hle. Lal Isua tangka 30-a hralh a nih khan coins nge an hman a note tih hriat ni lo mah se coins a nih ngei a rinawm. 

Pawisa thir ṭang­kaina leh khawi ram pawhin a siam tel zel chhan chu:

1. A thler chhe ve thei lo

2. Ken vel a awlsam 

3. A tlo bik

4. Thil dang rem­changah chantir (convert) leh theih

5. Ram leilung hlut zawng (mineral wealth) tehna hmanrua a ni

6. Thutiam nem­nghehna a ni: Khawvel ram hrang hrangin an ram sum leh pai dinhmun azirin pawisa note leh coins tih thih (demonetize) chang an nei ṭhin. Burma sipai sorkar khan demone­tisation kha a uar hle. 

India pawh hian kum 1946 leh 1978 khan demonetisation a nei tawh. 1946 khan Rs. 1,000 & 10,000 note a tihlum (demonetized) a, a hnaivai berah chuan tuna BJP sorkar hian December 16, 2016 khan Rs. 500 & 1,000 notes a tihlum (demonetized). Rs 500 & 1,000 note hlui bak pawisa thir (coins) leh note dangte demo­netized a ni ve lo. 

Pawisa tih thih ṭum thumna denchhen hian Mizorama sumdawng rual leh broker rualte hian pawisa thir hman theih loh dan (coins forbidden - Sikke nishidh) dan thar an lo duang chho ve ringawt ta mai nge, tun thlengin India rama kristian 90% awmna Mizoramah chiah pawisa thir a hman theih ta lo. 

Kristian state-ah pawisa thir hman khap­na 'banned on coins' an huaihawt ta mai nia a ngaih theih ta mai hi Mizoram sorkar mawh­phurhna a ni. Pawisa thir dawng duh lote chungah action lak tur a ni. 

Milem bemite chen­na phai ram hmun tinah leh kristiam awmna state dangah pawisa thir hman theih a ni si a. Independent sorkar ni ila chuan thudang, India ram, hmarchhak kilkhawra state pakhat ve mai ni si hian pawisa thir hman theih loh dan siam chawp (unwritten law) niawm taka kan kalpui hi High Court-ah pawh Public Interest Litigation (PIL) theh luh vat ngai chi niin a lang.