Sawrkar hian kawngpui a ngaihthah em ni?

Mizorama sawr­karna chelh mektu, MNF party-in an sawrkar tawh china an chhuan ber leh sawi tam ṭhin tak pakhat chu, 'Mizoram kawngpui hrang hrang siamṭhat' chungchang a ni a. Thla sawm vel an sawrkar tawh chhungin kawngpui hrang hrang an siamṭha tawh a ni mai thei e.

Ni e, MNF Ministry hian nikum December thla chawhma lam aṭanga sawrkarna an chan aṭangin Mizoram hmun hrang hrangah kawngpui an siam tawh ngei tih chu a lang reng mai a; kei ngei pawhin vâk zau viau lo mah ila, ka hmu ve nual tawh. Kawngpui ṭha lo an vei a, kawngpui ṭha an duh a, an theih ang angin an siam niin a lang a; a lawmawm khawp mai. 

Kumin June thlaa Assembly session-ah pawh ruling MLA thar berin resolution a pu lut a, lungsi takin ruling MLA-te'n an pass a nih kha. Chu resolution chu, 'MNF Ministry-in hun rei lo te chhunga Zoram dung leh vanga kawng chhe tak a siam ṭha mai hi lawmawm kan ti hle' tih a ni. 

Mahse, duhthusam tak tak a awm thei lo miau a; duhthusam lo zinga mi, tunlaia mipui mamawh hrang hrang phurtu berte manganna pakhat hi i'n sawi lang hram teh ang. Chu chu Sairang leh Kawnpui inkara National Highway kawngpui chhe lutuk hi a ni.

Kan hriat ṭheuh angin, NH-54 kawng­pui hi Mizoram ma­mawh tinreng phurh luhna kawng, Mizoram kawngpui azawnga pawimawh ber a ni tih kan hre tlang a. Chuti chunga Sairang leh Kawnpui inkar kawng chhe lutuk reng mai hi chu a manganthlak tak zet a ni. Buhfai leh thil dang, mipui mamawh tinreng phurtu truck khalhtute leh neitute reng mai an mangang nasa a nia. He lai kawngpui chhe lutuk bik hi chu hun eng emaw ti chhung phei chu social media lamah pawh kan hmu ngun narawh e.

Mizoram hi tuahtui tlâk tamna ram a ni tih kan hria a, kuminah phei chuan October thla chawhma lam thlengin ruah a la sur deuh reng mai a nih hi. Chuvang chuan, a nih dan tur ang taka kawngpui siamna hun pawh a ni lo tih kan hria a. Chuti chung chung chuan, kan kawngpui pawimawh ber, ka mamawh tinreng - ei leh in tur aṭanga bungraw dang zawng zawng, a tê ber aṭanga a lian ber thlenga kan châwk luhna kawngpui ber mai heti taka chhiaa awmtir reng hi chu sawrkar inthlahdah vang a ni ngei ang.

He kan kawngpui hi a pawimawh em avangin, fûr lai, wor­king season ni lo mah se, a chhe zual lai leh a khuar zual laite hi chu hnawh mam zar zar tur ni âwm tak a ni a. A chhe zual lai hnawh mâm chuan a daih rei lo a, chawlhkar khat emaw lek a daih chauh a nih pawhin, hnawh khaha tihmâm nghal zung zung a ngai tihna a ni mai; a pawimawhzia ngaihtuahin.

Chuvangin, MNF party kaihhruai Mi­zoram sawrkar hian kawngpui ngai pawi­mawhin an insawi ngun bawk a, he kan kawngpui pawimawh ber mai tal hi chu mut­mawh hnàrmawhah neiin, a chhe zual lai tal hi chu thawm ṭha nghal hram teh se. An siam ṭhat thuai hi an mualphona zau zel tur hliah khuhna tur pawimawh a ni nghal bawk ang.

Tin, Sairang leh Kawnpui inkar bik kher lo pawh, NH-54 kawng­puia a khuar chhe zual lai zawng zawng thawm ṭha se; NH-54 mai bakah, kawngpui dangte pawh thawm ṭha thuai se, hnathawh kawr hâktir tura an ṭah­awh leh rawng an bàwl­sak mipui hi kan lawmawm ngawt ang.