YMA INTHLAN HI...

Ni 15-17 October 2019 hian North Vanlaiphai-ah YMA General Conference neih a ni dawn a, Central YMA hruaitu inthlan kum a ni bawk. Hmanni deuh khan phone-ah OB nomination list ka dawng a, kan hruaitu turte chu an ṭha hlawm khawpin ka hria. 

OB tura nominate te leh an post chuh tur hming nen lam an rawn post leh ta mai a. He thil hi CYMA aṭanga official taka post a ni lo tih chu YMA a inhmang ṭhin chuan kan hre mai awm e. Hetiang hi YMA inthlan dan phung pawh a ni lo hrim hrim. 

MLA election dawn pawh khan final list a chhuah hmâ daih khân kan party lian deuh te kha chuan hetiang deuh hian thu dik hrûlah list hi vawi tam an post kha. Hetiang titute leh vawrh darhtute hi a hruaitu kâwm lam mi an ni ngai lo a, an ṭhuihruaite emaw tih a ni duh tlangpui. 90% vel hi chu a dik duh tlângpui leh nghâl. 

YMA inthlan hi tunhma a ṭangin thianghlim leh felfai taka kalpui ṭhin a ni. Zêpnâk emaw, Branch, Group leh Central thlenga hruaitu (OB) nih hian lâr leh lansarh emaw mai bakah hamṭhatna eng eng emaw a keng tel a, chumi kan bawh luâtah chuan mawi leh mawi lo pawh thlu lova a rûka campaign duhna hiâla lo chhuah phah ta ni berin a hriat. Political Party inthlan (election) ang deuh hian a lang hian campaign ta law law ila a ziaawm zâwk hial lo maw? tia ngaihdan lo nei ta te pawh an demawm lem lo ve. 

Thingtlang lama kan awm ve lai, Branch hruaitu inthlan dâwn ṭumte khân, member zingah thlan tur ber hre loa kan hming an ziak ang tih hlauin hmun biru lai kan chuh ṭhin hlawm kha a nia. Inthlan nang lo tur zawnga zinchhuah te kha kan la chîng a, chuti chung chuan ṭum eng emaw zah chu min thlang chhuak ve ta tho ṭhin kha a nia. 

Thingtlanga kan zin ṭumin an YMA inthlan kan nang fuh hlauh mai a. Kha mi ṭum kha an tisual deuh nge, Political Party angin an han kalpui mai a - YMA inthlang e ti lo khan MNF leh Congress tih kha a ri náwk reng mai. An khawngaihthlak khawp mai. Nu, naupua zawng zawng nen khan inthlang turin Hall-ah an lût ruih ruih mai a nia. Tun hnuah chuan a awm tawh lo turah ngai ila. 

Khaw hming tarlan rem chiah lo Mizoram chhim lam Branch pakhatah pawh kohhran ang zawngin an inhruipawh pek vak mai a, a zialo hi ka ti kher mai. Aizawl veng pakhata kan awm laiin YMA inthlanah Hall luh hma deuhin nomination list mai lo, an post chelh turte nen lam computer a chhut thlap lehkha them min pe nawlh mai a, chutianga thlang tur chuan min la hrilh zui a. Min pe ve lo lam side pawhin list fel tak an nei tho a. Vawi khat pawh Finace Secretary thlan kan la bâk a, 'thlan tur pawh ka va hre tawh lo ve mawle...' ka ti sáp a. Ka hnunga ṭhu chuan ka nomination list a pakhat hming chu rawh thai (tick) pahin, "Hei hi thlang rawh" a rawn ti a. Ka bu nghat a, ka thlang ta chuang hlei lova. A hnua ka hriat leh dan chuan, min rawn tick saktu in a rawn tick chu ama hming a lo ni a! Khati taka tlawmngai pawl pakhat YMA hruaitu nih châk kha chu thei ila President post aṭanga Finace Secretary post thleng khan pêk zawh vek mai ka duh hial a ni. 

General Conference ṭum, CYMA hruaitu inthlan kuma ka thlen pui thingtlang khaw lian ve tak aṭanga palai rawn kalte chu, 'eng motor-in nge in rawn kal?' tiin ka zawt a, "Kawnah bus a rawn ding tawp a, a thlawnin Conference a kal theih, a duh apiang rawn kal rawh u..." an ti a, kan rawn kal ve tawp mai, an ti. Kan innuih ṭhe ṭhaw a... inthlan loh kum chuan chutiang thil chu a awm ngai lo niin an sawi. Eng nge, inthlan kum zâr an zo ve a ni mai a, an vannei lehling ngawt alawm le! 

YMA inthlan kumah tho, khaw danga kan ṭhiante chuan, sumo a bâ-a an rawn 'hire' thu min hrilh a, chumi chuan "Conference zawh veleh a rulhna tur inhlawhna ka pe ang che u... a ti" tiin min hrilh bawk! Dik taka sawi chuan inthlan kum leh inthlan loh kuma khawmpui (Conference) palai kal kan inthlauh ṭhinzia te ngaihtuah hi chuan YMA member hmun hrang hranga mite chauh hian mawh kan phur lo; CYMA hruaitute thleng hian eng emaw chenah mawhphurhna chu kan nei ngéi mai. OB inhruipawhna, a bîkin President inchuhna ná lutuk ṭhin pawh hi mipui lam âi mahin hruaitute cho chhuah a ni kan ti lo théi lo ang. 

A hmingin Group YMA ah hian Secretary kum hnih (term 1), Asst. Secre­tary term 1 ka ni ve hmana. Eizawnna avangin ka hun erawh ka hmang zo thei ta lo. Kan Group huam chhungah khan Branch 13 lai kan awm ve a, a hminga hruaitu kan nih ve avang khan CYMA inthlan dawn kum kha chuan phone call leh massage kha chu a hunlai kha chuan kan dawng ve nasa ṭhin ngawt tak asin mawle! Hmun hrang hranga YMA kan kalpui dan pawh hi ngaihtuah chian ngâi tak a ni ta. Veng chhung leimin thenfai, tuikhur hiah leh khawtlang tana thawh kawnga hruaitu hmasaten 'a lêt' beisei engmah nei lova an lo thawh ṭhin ang chi-ah te khân tunlaiah chuan inhlawh hrâm kan tum ta deuh zel em âw... te pawh a tih theih. 

Aizawl veng pakhatah pawh hian YMA lam aṭangin chhung tinte hnena ngenna tih lehkha an sem a. YMA lamin an project, sound system tih changtlun bawhzuina atân chhung tin hnenah pawisa an remchan ang thawh tura an ngenna hi a lo ni a. Mite ṭanpui zawk tura ngaih khan harsa ve tak takte hnenah thlengin kut an dawh ta mai em ni tih mai palh awl tak a ni! Sound system leina tur pawh inhlawh mai tum lova, mipui hnena sum an khawn ngawt mai hian ngaihtuah a tithui lo thei lo. 

YMA hian kan din chhan leh mawh­phurhna hi kan kalsan mai palh ang tih a hlauhawm ṭhin. YMA hi tute emaw lansarh duh intêl khawmten an din a ni lova, politics kailawna hmang turte intuaihriamna hmun lah a ni hek lo. Sawrkar hnathawk, posting leh promotion thlenga advantage lâk tumte tân hmun a awm lo. A lêt beisei nei lova midang ṭanpui a, malsawmna ni ṭhin te chauh awmna a ni. Kan Zô-sâp Missonary te pawhin Chanchin Ṭha behchhana an din kha a ni a, khawtlang tân nu leh pâ an ni a, chhumchhia, rethei leh harsa zawkte tân YMA hi hmuh theih pathian a ni. 

YMA hi i tâ leh ka tâ mai ni lovin a neitu tak tak kan ni. A hmingṭhat leh hming chhiatah pawh mawh kan phur. YMA tâna theih tâwp chhuaha ke pên tur hian kan inpe thar deuh deuh dawn law'm ni. 

I tan, ka tan, kan ram tan - YMA vul zel rawh se.