MLA 12 te tal beisei ang

NHIDCL-te chuan NH 306 four lane turin survey a nei ṭan a, danin a phal miah loh angin mi 100 chuang chuan notified town area chhunga periodic patte dilna Kolasib Settlemnt Office-ah an thehlut nghal. Eng vanga thehlut nge an nih ka hre lo a, compensation beisei vang a ni ngei ang.

Danin a phal loh a nih avangin Kolasib SO hian lo hnawl nghal mai awm tak a ni a, mahse thu hmuh an neih avangin an hnawl lo nia sawi a ni. A pawi ngawt mai, dan dik loa compensation beisei vang maia(?) periodic patta diltute dilna hnawl mai lo tura thil ti an lo awm hi. 

Hun a kalzel a, danin a phal lohna hmuna periodic patta dil maiah a la tawp lo zui. Bilkhawthlir Joint VC chuan VC seal lem leh signature lem hmanga an huam chhunga periodic patta dil mi 16 an awm nia an hriat avangin FIR an thehlut ta rup mai. He thu ka hriat tirha ka rilrua lo awm chu 'Bilkhawthlir Jt. VC-te hi tawlhlohpuan sintir tlak an ni' tih a ni. 

Hun a kal leh deuh a, ka ngaihsan em em, Chawimawi Nopui dawm phu hliah hliaha ka hriat Bilkhawthlir Jt. VC chuan FIR an hnukkir a, ka hnual rawih mai. FIR an hnuhkir chhan hi mi 16 te hian ngaih­dam an dil vang niin ka lo hria a, an ngaidamah i ngai mai ang u. 

Heng mi 16 te hian Thingdawl huam chhungah periodic patta an dil tel tho a, Thingdawl VC-te hi an ṭhu mai mai lo turah ngai ang. FIR hnuhkir thu ka hriat tirhah ka rilru hnual hman viau mah se, thil ka hre chhuak zawka ka hnualna chhem kiangin a awm. Ka thil hriat chhuah zawk chu maw dan ang taka thil tih duh MLA 12 lai kan nei tih hi a ni. Mizo mipui mimir zingah hian dan ang taka thil tih duh mi 12 awmin, dan dik loa thil tite chu hek hmak hmak se kan ramin hma a va sawn dawn tak em. 

Dan dik taka thil tih duh mi 12 te hi kan ram roreltu tura kan thlan chhuahte ngat an ni. Chumai a la ni lo, sorkarna fawng chelh mek lam rulling MLA ngat an ni. Ngaihdam dilna an dawn avangin Bilkhawthlir Jt. VC-te'n dik lo taka periodic patte diltute an ngai­dam a nih pawhin, kan ram roreltu atana kan thlan chhuah MLA 12 hi chuan dan dik loa thil tih tumtute hi an ngaidam ve maiin ka ring. Dan ang taka rorel a nih theihna atan hma an lak ngei ka ring tlat. 

An MLA pui pawh dan dik loa thil tia puhin ban a nih theih­na atana hma la ngam MLA 12 te hian, kan ram tana thil pawimawh em em kawng­pui ṭha kan neih theihna tur tisukuk thei zawnga hmalatute hi an en liam mai maiin ka ring lo. Kan MLA 12 te hmalak dan mipuiin kan thlir zel dawn a, dikna hailang tura an chet chhuah ngei a rinawm. 

Mi duham leh pam­hamte avangin kan ramin a nih tur ang a nih loh phah fo a, tunah chuan dikna duh ngawih ngawih rulling MLA ngat mi 12 kan nei e. Kan ramin hma a sawn phah ngei ka beisei tlat.