AMC INTHLANG TUR THLIRLAWKNA

Aizawl khawpuiah hian Mizoram mipui 293,416 (2011 Census) vel awmin Zoram mipui zawng zawng aṭanga 35% vel kan awm mek a, Mizoram Budget 70% deuhthaw hman a ni bawk. District dang zawng zawng aiin Lirthei a pung chak bawk a. Chutih laiin Sorkar laipui aṭanga Ration Card chi hrang hrang a siam zinga mi rethei, hrisel lohna leh kum upat tawh vanga hnathawk thei tawh lote tan chauha Ration Card a siam, AAY Card kan tih, Card Eng (Yellow Card) neite chu 2020 report-a kan hmuh dan chuan Aizawl khawpui chhung, DCSO East leh West huamchhungah hian chhungkua 7388 kan awm mek bawk a. Hei hi AAY scheme aṭanga BPL chhungkuaa mi rethei berte Local Council emaw Village Council-te’n thlangin ration card hmanga an buatsaih a ni.

He Ration Card neitu chhungkua chuan buhfai 35 Kgs. la theiin Kg khat hi Rs. 3/- angin an la thei ang tih a ni. Chawmtu nei lo, hnathawktu awm mumal lo, thla khata Rs. 250/- leh kum khata Rs. 3000/- aia tam la lut thei lo leh chuti zat chauh thawk chhuak ṭhin chhungkaw bik puala buatsaih a ni. State dangahte chuan hmeithai te, taksa hrisel lo te, pianphunga rualban lo te leh kum 60 chunglam an ni tlangpui ṭhin.Chutianga State khawpui bera mi rethei kan tam viau bawk chung reng chuan khawsak a sang viau mai bawk a, thil man a sang a, lirthei veivahna man a sang tlangpui bawk a nih hi. Mipui vantlang incheina pawh a sang viau bawk a, ni tinin traffic ti-jam tham khawp khawi lai hmunah mai pawh hian lirthei a awm reng bawk a ni. Chutih laiin chhungkaw ṭhenkhatte lah chuan TV, Washing Machine leh Two Wheeler neih chu mi pangngai phak venaah kan ngai emaw tih mai turin a ṭhen hi chuan a pathuma kan neih hi chuan kan han lungawi mai mai khawp ṭhin bawk a. Lungkham engmah dang nei loa rui ta mai mai lah kan tam viau emaw tih turin ruihhlo zuar leh rui khaw lo man tur kan awm reng bawk a. 

A lehlamah In 50 kar dan vel emaw leka Biak In pakhat zel awm tluk zetin Biak In pawh kan ngah narawh e. Zing ṭawngṭaia kalte lah chu thingtlang khaw te deuh zat zet tur hi tuk tin hmuh tur an awm ziah bawk a, chuti chung chuan lirnghing hlauh avanga kan thlaphanna erawh a reh tak tak thei chuang lem hlei loin Biak In meuh pawh chu kan thlamuanpui chuang lo a. Kan Aizawl khawpui zet zawng mi chitin chitang kan kim chiang kher mai a; Mi hausa ber ber an awm laiin ni tina inhlawh ngai leh mahni eitur pawh thawkchhuak hleithei lo khawpa rethei leh AAY Card neih pawh inthlahrung hleithei chuang miah loin chhungkua 7388 lai kan awm bawk a. Chung zawng zawng chunga khawtlang rorelna sang tak leh sorkar hne hnai ber turin sorkar lam chuan Aizawl khawpui hi Ward 19 laiah a ṭhen ta a ni.

Political Party hrang hrangte chuan Candidate siamin Party lian pathumte: MNF, ZPM leh Congress Party-te phei chuan seat awm zat luah vek thei turin Candidate 19 an nei ṭheuh a, Central lama Sorkarna chang ber BJP ber erawh chuan Seat 8 chauh lak an tum rih nge ni Candidate 8 chauh an nei thung a. MPC lam erawh chuan thawm an la nei rih lo ni awm tak a ni thung. Heng zingah hian MLA-a lo in-candidate tawhte pawh an awm a, mi thar an tam ber thung. A tlangpuiin kohhrana inhmang tak takte an ni hlawmin politics field-a la mi thar tak takte an ni a, veng chhunga mi fel tak tak an ni hlawm vek bawk mai. Tuna Counsellor term hmang zo chiahte nena en kawp chuan Sorkarna fawng chelhtu MNF Party aṭanga Counsellor 5-te chu Candidate nawn leh an ni a, Congress Party aṭangin Counsellor 3-te chu Candidate nawn leh an ni. Hmeichhe lam Candidate tihdanglam a nih vangin hmun 6-ah chuan mi thar hlak kan nei dawn a nih hmel bawk a, chung bialte chu Ward Numbers; III, VIII, X, XIV, XVI, XIX te a ni. Ward Number VI leh XVI Counsellor-te erawh MLA ah an tlin tak avangin an bialahte hian By Election neih a ni lem chuang lo a, Counsellor thlan chhuah hunah bialtu an nei leh dawn chauh a ni awm e.  

Ward paruk lai mai, hmeichhe bialte chu tihdanglam a nih avanga mi thar kan neih bakah hian Ward pali (4) ah te chuan Counsellor-te hian din an tum tawh loin mi thar kan nei dawn bawk a. Tin, MLA Election 2018-a candidate zingah K. Vanlalrawna chiah hi tuna AMC Counsellor nih tum nia hriat a ni a. Counsellor ni chunga MLA Election 2018-a Candidate mi pali an awm bawk a, chung zingah chuan mi pahnihin hlawhtlinna changin pahnih dangte erawh an hlawhtling ta chiah lo nain tunah hian Counsellor nih nawn leh tumin seat an chang leh a. Chungte chu Rosiamngheta (INC) leh Laltlanzova Khiangte (MNF) te an ni. Hetih lai hian ZPM Party chuan a vawi khatna atan Ward-19-ahte hian Candidate thar vek an nei a, hei vang hian tuna AMC Ward tina Counsellor thar thlanna neih tur hi ngaihnawm tak tur niin a lang. A chhan pakhat chu MLA Election 2018 ah khan Aizawl khawpui chhunga hmun 6 laiah ZPM MLA thlantlin an nih vang a ni.  

Candidate zingah hian Announcer thiam leh lar tak tak Saizikpuii, Baryl Vanneihsangi leh Daisy Zorammawiite hming a rawn lang a. Milar tak tak zingah Lalmalsawmi (Pi Mali) leh Zonunsangi Fanai (Zonuni Fanai) te Counsellor kan nei tawh a, Politics hi an kawng a ni lo em ni aw tih turin an thawm a zawi ang reng viau thung a. Chuvangin tuna kan milar han vawrhchhuahte pawh hian an kawng lo an zawh palh ang em ka lo ti deuh a ni. Hmeichhe dangte erawh kum lamah pawh an lo puitling deuh hlek bawk a, party lam pawhin Counsellor atan tlinga an hriat vanga an vawrhchhuah an ni hlawm bawk a, an ṭha turah ngai phawt ila a ṭha ang e.  

Khaw’nge Party tinte thawm ngaithla turin kan bengte han chhi hlawm ila…