Buana hmaa kherh dik tak chu

Facebook hi ‘duh duh sawina’ a ni e an ti bawk a, Mizoram sorkar Sports department-in State Games a kalpui turah infiammi an lawm tehlul nen mi ṭhenkhat chuan an lo sawisel leh nghal der tawh. Pawisa a awm lo, tu emaw intih lar tumna mai mai, MLA tana phurrit, fund awm si lova pawisa hmanna tur, sports tak tak ni lovin a kalphung hi festival lam hawi etc etc tih vel a awm tlat. Hetianga kan thil tih thar apiang sawisel pawl an awm chuan engtin nge hma kan sawn theih ang? tih hi Mizoram mipuite hian kan ngaihtuah a ngai a ni. 

Congress hunlai khan sports-ah nasa takin hmasawn­na a thleng a, a langsar tak ni turin artifcial grass an phah bakah stadium te an siam a. Chumi chu hmang ṭangkaiin (a ni em ang chu maw?) football lamin result ṭha tak tak an nei a. Santosh Trophy an champion a, National Games-ah gold medal an dawn bakah I League champion thei club te pawh kan nei ve ta a, tumah an phun lova, kan zavaiin kan lawm tlang a ni. 

Tuna State Games tura ruahmanna awm pawh hi rah ṭha chhuah thei tur a ni. A chhan chu infiamna ṭhenkhat a bikin football ngat phei hi chu miin an lawm tawh sa leh platform nei ṭha tawh sa an ni a, nimahsela infiamna tam tak hi chu entu nei lo, tuipuitu nei tlem zawk, mipui hmaa inpho chhuahna hun pawh nei ve mang lo, mi hriatpui mang loh an ni. Anni tan hian State Games han neih te hi thil ropui tak a nih bakah an infiamna lamin hma a sawn phah ngei a rinawm tlat a ni. 

Ruahmanna awm sa an sawi danah hian Assembly Constituency-a inelna a nih dawn avangin chhim lam leh Chakma bial lamte chu an rawn tel mang dawn lova, chu bakah bial ṭhenkhat a ṭha fal an awm dawn a. Inter District a nih loh chuan pawisa a tam thei dawn lova, bial 40-a Rs 50,000 sem hi a semtu tan a belhkhawm hi nuai 20 niin an sem tam an in ti ang a, a dawngtu an tam avangin a dawngtu tan a tlem tham ta dawn si a ni. 

A chhan chu football, volleyball, basketball leh hockey team ang chi jersey lei ta se, a zo chu a ni mai. Practice naa refreshment senso tur te, first aid, coach te veivahna, a tam mai a dang pawh chu chu pawisain a daih loh chuan MLA tan phurrit mai a ni dawn. MLA-in pawisa a neih loh chuan a fund kha a hmang sual chho ang a, chu chu corruption zung kaihna a nih ve theih avangin nuai 2 ṭheuh tal lo chuan bial lam tan kalpui chu a harsat viau a rinawm. 

Heti chung hian thil thar ṭan leh tur ang a ni a, chuvangin State Games hi harsa deuh chung pawhin nei rawih mai ila, a langsar ber chu infiammi ni se. A sorkar, a bialtu MLA, a minister tih velin lar khelh lo tum lo ta bawk se, State Games ṭha tak i nei zawk ang u. Sawiselna hi chu buana hmaa kherh dik tak a ni si a.