THEOLOGY OF AMERICAN ELECTION

The 46th American President, Joseph R Biden, Inauguration Ceremony kha ka lo thlir ve a. Chuta ka rilru la riautu chu Pathian hnena an ṭawngṭai dan kha a ni. 

The Rev. Gary Studniewski, pastor of St. Peter’s Catholic Church, Capitol Hill chuan ṭawngṭaina a hlan a. Pathian chu “hmangaihna thianghlim hriat phak loh” (holy mysteries of love be with us) tiin a ko va, tichuan a tawpnaah “I hming ropui nan” (to the glory of your name) tiin a ṭawngṭaina chu a titawp a. A hun tawp lama ṭawngṭaina hnuhnung (benediction) sawitu Black-Methodist Pastor, Rev. Sebastian Beam chuan inantlanna (commonness) a uar hle a. Pathian chu mihringte inan tlanna Lalpa (Lord of common humanity) a ti a, awpbeh leh neksawra awmte chhanchhuah nan a dil a, vun rawng danglamna piah lam, mingo leh midum inthliar hranna awm lohna society dilin ... a huhova mi chak kan rina chu i ni (strong name of our collective faith) tiin a ṭawngṭaina chu a titawp ta a ni. 

An ṭawngṭainaah hian Lal Isua hming lam rik a ni miah lova, Pathian hriat phak loh (transcendental being, the mystery) chu an ko ta mai a ni. Hetiang rin dan hi thil thar a ni lo. Pathian lei mihringten an hriat phak loh chu a awm a, chu Pathian chu sakhaw hrang hrang vuantute hian an be ṭheuh a, sakhaw biak dan leh rin dan lo danglam chhan chu mawlna (ignorance) avang mai a ni, an ti. Pathian thu zirna lamah chuan hetiang rindan hi 'pluralism' an ti a, hetiang rinna pawmtute hi 'pluralist' an ti. 

Scientist ropui tak Ernestine-te, Theologian ropui tak Raymond Pannikar te, Stanly Smartha te pawhin mihring hriat phak loh maka (mystery) chu a awm tih an ring a, chu maka chu thilsiamah te, sakhaw hrang hrangah te a inlar chhuak a ni, an ti. Eng emaw chenah anni pawh hi pluralists an ni ve tho mai. 

Hring nuna a harsatna tawk lem lo, mithiam, pathian be tak tak lova, mahni in pathian chawp, mahni finna (reason)a innghat an awm ṭeuh mai. Hla taka awm Pathian, mihringten an hriat phak loh (mystery) chu awm tih an ring a, chu Pathian chu a ril lutuk a, a sang lutuk a, a hla lutuk a, an hmu ngai bawk si lova, khawvelah a lo kal an hmu si lova, an suangtuahna aṭanga Pathian an ngaihdan (construction) chu a be ta mai a ni. 

Pathian hlauh tur an nei lova, an hringnun control-tu an nei lova, engkim tih a thiang. Mawngkawhur nih a thiang a, hmeichhia leh hmeichhia in neih a thiang a, mipa leh mipa inneih a thiang bawk. Dawt sawi a thiang a, help ruk a thiang a, Bible an ring lova, an ngaihdan kha Pathian thu a ni mai. 

Evangelical Kristiante erawh chuan Pathian chu Lal Isua-ah a rawn inlar chhuak (revealed in Jesus) a, chu Isua Krista chu mihringah a lo chang a, Cross-ah khenbehin a awm a, thihna hneh zovin a tho leh a, chu mi  ngei chu Pathian mihringa lo chang, chhandamtu chu a ni e, an ti  thung a ni. 

Evangelical Kristiante hian Donald Trump-a an duh a, ṭha an tih em em vang ni lovin, Democratic ho rin dan, awm dan leh thiltih dan an duh loh em avangin Donald Trump hi an ṭan mai a ni. Donald Trump hi a thlarau mi em a, a ṭha em e, tihna lam a ni lo; Democratic ho kal dan a duh lo a, Trump-a hian Lal Isua hming a la lam ve tlat vangin an ṭan mai a ni. 

Democratic party ho rindan chu pluralism dik tak a ni a. Religious pluralism an pawm a, chutah chuan sakhua zawng zawng hi an in tluk tlang vek a ni. Social pluralism (mihring intluktlanna) pawh an pawm a chuvangin mingo leh mihang inthliarna an duh lova, mingoho chung chuanna "white supremacy” an dodal a ni. Chuvangin, an development policy-ah pawh kan ṭanho hian hma kan sawn ang (together we grow) an ti a ni. 

Democratic ho chuan Lal Isua danglam bikna (absolute uniqueness) an pawm lova, an tan chuan prophet Mohamed a te, Buddha te, Krishna te nen intluk leh in ang khat vek an ni. Lal Isua  'chungnunna' an hnawl chauh pawh ni lovin, Lal Isua hi an tan chuan hnawksak a ni. 

Thil an hriat fuh loh erawh chu Isua Kristaah hian hnam tin chi tin, ṭawng tin, retheih leh hausa indaidanna bang chu ṭhiat a, amah hi Remna Lal a ni. American mipuiten an zawnin unauna leh impumkhatna dik tak chu Lal Isu-ah hian a awm a ni tih hi an hriat hmaih a ni.