ROTLING I DIN ANG U

Lalpan mihringte tana a thil siam zawng zawng chu rotlingin a din sak vek a. Mihring­te thil siamte erawh chu a siamtu a zirin ro a tlingin a tling lo bawk a ni. 

Heng itna leh awhna te, eirukna te, thatchhiatna te, duhamna leh hman­hmawhna te, ngaih­thahna leh uluklohna te avang hian thil siamte chu rotlingin a chhuak thei lo fo ṭhin. Thil siam chu a siam­tirtuin thil siam­tute kan lo hman­hmawh pui viau chuan an siam ṭha hman ṭhin lo. Tin, a siamtu in a uluk lem loh chuan thil siamte chu a ṭha lo ṭhin. In sak te, bungraw siam chhuah te a lo ṭhat loh chuan a siamtu hnena sawi hrehawm kan ti bawk si a, midangte hnenah kan sawi fo tawh mai ṭhin a, a siamtu tan hming­chhiatna a ni. 

Tha taka siam a nih erawh chuan a siamtu hrilh kan nghakhlel a, thil siam leh a siamtu chu mite hnenah kan fak ṭhin a, ro tling a lo ni ṭhin. Chung mite chuan thawh sen loh hna an hmu ṭhin. Chhungkua mem­ber tinte pawh hi in ngaihtuah chian a ṭul, chhungkaw tana ro tling siam leh din chhuah ka nei ve tawh em tiin. Kan fate pawh an nun chu chhung­kaw tana belh fakawm rotling ni thei turin kan siam ṭhat a ṭul. 

Kaihhruaina leh zirtirna hna thawk­tute pawhin zirlai chu chhungkua, khaw­tlang leh ram tan ro tlinga an siam chhuah a pawimawh hle. Khawtlang hruai­tute leh ram hruaitute pawhin ram tan hna an thawk a ni tih an in hriat chian chuan ram tan ro tling an din ngei ang. Vantlang tana ṭha ro tling an din mawlh mawlh mai chuan an enkawl mipuiten an fakin an theihnghilh lova, hun lokal lehah pawh rorel leh mai turin duhsakna an pe leh mai ṭhin. 

Khawtlang leh ram hruaitu ṭhenkhat ram hmangaihna nei, bial leh ram tana ro tling din mawlh mawlh an awm laiin, ṭhenkhat ve thung chu thinlunga Lalpa ṭihna tak tak nei lem lo, ram hma­ngaihna tak tak nei lo, rotling dinna tur atana sum lokal a ruka lo lak pen a, hman mai duhtu roreltu pawh a awm theih a ni. 

Chutiang ang roreltu chu nang leh kei hian kan chhin­chhiah tlat a ṭul ang. Bial tina roreltute hi ro tling dinna tur atan thil tih ṭhatah inel hlawm sela, ram hmangaihna tak tak thinlung pu in taimakna leh rinawm­na nen ram tana hna thawk zel turin mipui­ten duhsakna an hlan reng a ni.