Keimahah awm reng rawh u

Pathian khawngaihnain kum 2021, kum thar lawmawm tak mai kan lo thleng leh ta reng mai. Kum kalta lama kan thil tih leh kan awm dang zawng zawngte chu kohkir theih rual lohin a liam tawh a, hun kan la neih tur kum thar kan hman turah hian ngaihtuahna leh rilru thar senga bul ṭan tum ila, Lal Isua nen kum i tluan ang u tiin kan insawm a ni. 

Kan thupui khi Chanchin Tha Johana ziak 15:4–a Lal Isua ṭawngka a ni tih kan hre ṭheuh ang a, Lal Isua chuan keini hi amahah awm reng turin min chah a. Amahah kan awm reng chuan ani pawh keimahniah a awm reng dawn thu min tiam zui a nih kha. Keini hi Lal Isuaah kan awm reng loh chuan lungngaihna, buaina, hlawhchhamna leh thihna hial kan tawh hunah hian kan manganna leh kan na tuar thawm ri hi a ringin min hnemtu kan hmu zo dawn si lo a. Chuvang chuan kum tir aṭanga kum tawp thlenga Lal Isuaa awm reng a, ni tin Lal Isua nen kan kumte chhiar chho turin kan insawm nghal chawt a ni. 

Mihring kan nih chhungin kan hlawhchham fo a, kan na fo a, kan thi fo a, kan la thi zel bawk dawn; tumahin kan pumpelh dawn lo. Chuti anga harsatna hrang hrang nena kan dam chhung ni chhiar zo tura piang mihring kan nih tlat avang chuan engtik lai pawha Lal Isua hnaiha awm hi kan tisa tan tak pawh a ṭha a, kan thlarau tan phei chuan chatuan nunna a ni tih kan hriat kha. Lal Isua hian khawvela kan thil hmachhawn tur zawng zawng leh kan mamawh zawng zawng hi mihring ve tho a nih avang khan a hre vek a, a thuawih mai leh a thupek zawm mai hi kan damna tur leh kan kawng zawh tur dik tak a lo ni reng mai tihte hi kum bul aṭangin kan hre nawn leh dawn nia.

Mi chi hrang hrang, eizawnna leh hnathawh inang lo tak tak te, kan duhzawng leh kan rilru put hmang inang lo em em; kan hausak retheih dan pawh inthlau em em kan ni a. Kan hmel ṭhat leh chhiat dan pawh inang lo, kan hratsatna tawh mek leh kan la hmachhawn turte pawh inang lo, a tiha tihngaihna awm reng reng tawh lo khawpa hun leh natna harsa tak tawk mekte pawh kan ni a. Vawi tam tak hlawhchham tawh kan ni a, mi hmusit ruk leh ngaihnep ruk tuar mekte pawh kan ni nawk mai. Mi hriat ve rem reng reng lo natna benvawn tuar mek te, mihring thiamna aṭanga tihdam theih tawh loh rilru leh taksa natna vei mekte kan ni a, kan inang lo hlawm hle. 

Chutiang teh nuaih mihring, harsatna leh kan buaina inang lo tak tak chu ni mah ila Lal Isuaah chuan mi zawng zawng hi kan inang vek a, amaha awm reng tur hian kan nihna hian min dang lo. Lal Isuaa awm reng mihring chu eng ang mi pawh - natna rapthlak ber tuar a ni emaw, harsatna thuk ber leh chhanchhuah theih tawh loh khawpa tlachhia emaw pawh ni se, lawm taka pawm thei leh thlarau lama damna famkim changtu a ni tho tho. Keini khawvel tehna dana damna leh a duhthusam tak nei lo emaw kan tih lai pawhin engkima mi awhawm ber a ni tih hi Tirhkoh Paul-a nun aṭang pawh khan chiang takin kan hre thei awm e.

A thutiama daw ve ngai lo leh chatuan thleng pawha dik Pathian, Lal Isua Krista chuan amaha awm rengte hnenah chuan a awm reng dawn tih min tiam a. Chu thuthiam chu a taka changtu, a hlawhtlinna rah thlum tak lo eia changtu kan lo nih ve theihna turin kum bul aṭangin Lal Isuaah hian awm tlat teh ang u. Harsat chang leh beidawnna thuk ber kan tawh lai mek te, thihna nunrawng tak kan tawh mek vanga thinlung kehchhiaa kan ṭah hawm hawm lai mek pawh hian Lal Isua Kristaah hian awm lui tlat turin kumin chu luhlul i chhuah tlat teh ang u. 

Amaha awm rengte hnena awm min tiamtu Lal Isua Krista hi kum 2021 kum tir aṭanga kum tawp thlenga kan hnena awm reng turin a hnenah hian awm hmasa ila, Lal Isua hi kan hnena awm reng turin hna i pe teh ang u. Kan Mobile phone, Social Media leh kan nuam tih zawnga kan hun kan pek ang zat chiah hi Lal Isua tan hun hi pe ila, Lal Isua hi kum dang zawng zawng aiin kan hnena awm tam turin ṭan i la ang u. 

Khawvel changkang zelah Pathian awm ring lo kan pung zel a, Mizoramah te ngei pawh kan awm tawh a. Amaha awm rengte hnena awm reng tiamtu Lal Isua hi kum 2021 kum bul aṭang hian a thutiamah a lo rinawm reng em tih i fiah teh ang u.