TUNGE I VOTE TAK ANG?

Zofate Jerusalem Aizawl khawpui enkawltu AMC thlan kan hmabak mêk a, party-te an inpuahchah nasa a, party pathum state sawrkâr rorel lai MNF, rorel zo hlim Congress leh tun dinhmuna opposition party lian ber ZPM-te chuan an candidate turte an puang fel ta a, a awmziaah chuan duhthlang thei dinhmunah mipuite kan ding mêk a, hun tlem te la awmlai hian duhthlanna dik tak kan siam a ngai a ni.

AMC ah hian bial 19 a awm mêk a, party lian pathumte candidate han enin sawiselna tur an vâng hle a, candidate an thlang uluk em em a ni tih a hriat a, politics-a sulhnu la nei em em lem lo, ram leh khawtlanga mi hmingṭha an vawrh chhuak nasa a, a mimal takin khawi party candidate-te pawh hi an ṭha a, sawiselna tur an awm meuh lo.

 Local Council inthlanah te chuan mi ṭha chi hrang hrang kha party hran hrana mi pawh mi 5/7/9 pawh kan thlang thei a, party sawi lem loin vote kan thlâk a, mi ṭha-te hnenah kan vote kan sem mai ṭhin. Amaherawhchu, AMC inthlanah chuan mi pakhatin vote khat chauh kan nei a, party pathum candidate-te hi mi ṭha chu ni vek mah se, mi ṭha pathum hnenah ni loin, mi ṭha pakhat hnenah chauh vote kan pek a ngai si, tunge i vote tak ang?

A mimal i en chuan a mimal ang chuan an ṭha tâwk vek si a, khua leh tui ṭha i nihna angin vote erawh i thlâk a ngai tlat si, chutiang chu a nih si avângin anmahni ruattu enin vote thlâk mai rawh le. Hmanni lawka sira kan hnawl hnu, kohhran leh mipui mit leh beng tikham a, ṭawngkam buluk tak taka kohhran leh ram mipuite ṭawngkhum duhtu party-in an ruat a nih chuan, amah kha ṭha viau mah se, amah i vote chuan hman nia i mit leh i beng tikham em emtu kha a rawn thawhchhuah leh vat theihna turin i tichak leh sauh tihna a ni ang. Tin, mipuite hnena dawt fahtu, ram khat hruaitu ve si  an thusawi kan hriata an hmel kan hmuha nuihzat chana kan chan tawh hruaituin a ruat kha i vote a nih chuan, ram hruaitu lu ber hnen aṭangin dawt leh nuihzatthlak ngaihthlak i la kham lo hle a ni a tih theih ang.

 Delhi CM Arvind Kejriwal chu mi chak leh mi ṭha a ni a, mi chak leh mi ṭha a nih vâng ngawtin bial tinah a ding thei bik lo a, a dinna bial tih lohah chuan mi zawng zawng vote theih a ni kher lo, mah se, a dinna lohna bialah a aiawhin, a party mi leh sa ṭha tak tak an ding a, chung mite chu mipuiin an lo vote chuan Arvind Kejriwal-a vote ang tluk tho an nih avângin Kejriwal-a chu a rawn Chief Minister ta a, Delhi mipuite chuan kalphung thar an hmu kum tin mai a ni. Hetiang thil ṭha leh finthlak hi mi ram chauha thleng tur a ni lo a, kan ramah, keimahni ngei hian kan thlentir ve thei a ni. N.Korea hruaitu Kim Jong Un hnuaiah khian pa fing tak tak tam tak an awm ngei ang.Amaherawhchu, an hruaituin a zir loh avangin N.Korea ram hruaitute chu dem rawn an nih phah ta reng a ni.

Tunge i vote tak ang? In bialah mi ṭha hlir an rawn ding dawn a, vote i thlak dawnah anmahni ruattu en ang che. MNF Candidate i vote chuan Pu Zoramthanga i vote tihna a ni a, Congress Candidate i vote chuan Dr Lal Thanhawla i vote tihna a ni a, ZPM Candidate i vote a nih chuan Pu Lalduhoma i vote tihna a ni ang. Tu nge i vote tak ang?