Hotu lama khi

Mizoram political history hi kan thlir chuan khawvel hmun dang ang bawkin hotu lamah hian khi a awm chuan a phel nge nge ṭhin a, chumi zawm khawm hna thawh hun lai a ni tih hi kan ruling party hi chuan an hre chiang viau turah han ngai ta ila. Chu siam ṭhat hna chu a hunlaia an thawh loh chuan a pawi thui viau ang. 

Indian National Congress party hi national level-ah hian vawi 70 chuang an phel tawh an ti a, tlem tlemin an phel chang a awm a, a lian thama an chhuah huk chang te pawh a awm. Tun hnai han thlir ta mai mai ila, All India Trinamool Congress kha 1997 khan INC aṭangin an chhuak a, tunah chuan West Bengal-ah Congress aiin an lian tawh zawk tih kan hre awm e. 

Kum 1999-a Nationalist Congress Party a lo pian khan a nghawng na hle. Tuna Maharashtra leh Meghalaya lama sorkar lo piang hi chumi nghawng zel chu a ni a, 2003-ah Nagaland People's Front chu Congress aṭangin an chhuaka tunah Nagaland roreltu an ni. YSR Congress Party hi tunah Andhra Pradesh ah roreltu an ni thei ta a ni. 

Congress history kan en chuan Congress hi a kal zel kan tih rualin an party aṭanga chhuak te pawh hi an tawp hlen nghal bik lo, party lian tak tak dintu an ni ve leh thei a ni. Congress aṭanga an chhuah hlimin ṭhenkhat chuan an daih rei an ring lova, mahse mipui thlawptu an neih ṭhat bakah MP leh MLA thlawptu an nei nual bawk si a, chuti chuan Congress party lian tak chhuahsanin a tirah chuan party lian lem lo an din phawt ṭhin. 

Hma an sawn zel a, tuna state tam taka roreltu kan tih te hi Congress keh them, thil dang nen in belhkhawma lo lian chho ta a, an awmna state-a Cogress pang­ngai aia hlawm lian tlang ṭha zawk an lo ni thei ta a nih chu. 

Ngaihdan a inang lo thei, mah se tuna Mizoram chhunga party thil inup awm a ruka politics hre chinin an hriat si hi a lo puak keh ta a nih pawhin a keh them lam tan hian hlauh tur a awm chuang love. 

Tunah hian ruling party chhungah ṭang ṭang awma inhrui pawhna lian tham a awm mek tih hai rual a ni lo. Ṭhenkhat chuan an MLA neih zat te an inchhiar siak ṭan hial a, Mizorama chanchinbu darh zau tak pakhat The Zozam Times chuan MNF party chhung boruak hi headline-ah a ziak ta hial mai. 

He party chhunga khi awm hi châr phui theih a nih lai hian châr phui vat a ngai a ni. Châr phui theih loh khawpa a khik zau hi party hmangaihtu tan chuan a hlauhawm, tun hi ṭan lak hunlai tak a ni.