Engtin tak awm zel ang i maw...

Zan khat ka mu chu zo taka min tung thotu awm ang mai hian ka ṭhu chhuak hlawl mai. Eng vanga khati teh thuta tho nge ka nih ka in hrethiam lo, zawi muangin ka mu ve leh mai a. 

Muthilh zui leh mai ka'n tum sateh a, ka muhil thei ta reng reng lo. Chutia ka muthilh theih tak lohah chhan chu ka ngaihtuah zui ta a, khami ni, chhun lama office hrang hrang ka lenkualnaa ka thil tawn khan ka rilru a lo hliam na viau a ni tih ka hrechhuak thei ta. 

Ni e, chumi ni chuan Cen­tral hnuai Department hrang hrang leh Mizoram State sorkar hnuaia Department engemaw zahah ka leng a, chu'ng ka lenkualna office engemaw zatah chuan an Department a hotu ber berte chu kan tawng (Mizo ṭawng) a, biak hleih theih loh an lo ni fur tawh a, chu chuan rilru a va tina tehlul em. 

Chutiang taka kan ram chhungah ngei sorkar office tam taka mahni hnam ṭawng pawha biak theih loh, state dang aṭanga hnamdangin thuneihna sang tak tak an rawn chelh ta fur mai chuan ngaihtuahna a siam thui kher mai. Mizoram state chhung mah ni se, central nena in­thlunzawm office a hotu ber nihna an chang chu engpawh nise, lo hrethiam ta ila. 

Mizoram State hnuaia office engemaw zaha hotu ber chan an channa lo tam ta lutuk erawh hi chu ngaihtuahna hman a ngai ta hle mai. Tun aṭang hian tih danglam tura mut mawh hnar mawha kan neih a va ṭul ta em. Tun dinhmunah hian Mizo hnahthlak dik takte hian heng post pawimawh tak tak hi kan la luah zo lo a nih pawhin kum 2/3 bak chu ni lul suh se. 

Chutianga kum 2/3 hnu-a kan ram chhung office hrang hranga ṭhuthmun pawimawh luah tur chuan vawiin aṭang hian zirna lamah step thar kan kai a ngai. Tun dinhmun anga kan Zoram dung leh vanga office hrang hrang hotu lu ber berte kan hnam ṭawng (Mizo ṭawng) a kan biak hleih theih lohte an rawn pun belh zel a nih chuan tun aṭanga kum 10 a liam leh meuh chuan vawiin ni-a kan tu leh fa, he kan Zoram leilung rawn luahtu turte chan chu a va chau dawn em. 

Thawkkhat laia tualchhung chanchinbu-a ka thu chhiarah khan kan hma lawka YMA General Conference lo awm turah hian Kumpuan atan rawtnaah ‘Zirna uar kum’ tih leh ‘Ram leh hnam humhalh’ tih chu buk turin chhawpchhuah tur niin ka lo hria a. A tir lama sawi tawh ang khian he kan ram leh hnam humhalh tur hian zirna aṭanga bul ṭan thar lehin, kan Mizo hnahthlak dik takten kan ram chhung office hotu nihna an chan phawt mai hi a pawimawh hmasa ber chu a va ni mai awm em. 

YMA meuhin ‘zirna uar kum’ a a puan phawt chuan he kan Zoram dung leh vanga sorkar office hrang hranga hotu (Head of Department) nihna hi tun aṭanga kum 2/3 ah chuan kan chanpual ni turin kan ram roreltute pawhin huai tak leh dikna hmangin appointment leh promotion thlengin ro an rel thei tawh ang. He thu-ah hian kan ram chhunga hnamdang hnathawkte huat leh itsik vang lam ni lovin, zir sannaa state dang  kan um phak lohna sawina leh thiamna aṭang chauha sorkar hna pawimawh leh sang zawk thawh theih a nih thu sawina a ni. 

Heng zawng zawng suang­tuah a, khum laizawla ka zal leh lai chuan Bible-a Lalnu Estheri chung changa Mordekaia'n "Lal nihna i lo chan hi hetih hun atan ngei hian a ni dawn lawm ni?" ti-a Lalnu Estheri chunga mawhphurhna rit tak a pek hnu-a Juda hnam zawng zawng tan chhan chhuahna ropui tak a lo thlen dan te kha ngaihtuah chungin rinloh karah ka lo muhil ve leh ta.