KHUA/ VENG FAI INTIHSIAK

Primary School ka kal lai chuan kan zirtirtu Zolawma (Rev. Zolawma (L) hovin School leh a vel theih tawpa faiin kan phiat ṭhin a. Khaw chhung pawh tual phiah tur tihte auvin in tinin Inrinni hian an tifai sung sung ṭhin a. Tunlai anga intihsiakna atana hmanga lawmman pek chu a awm lem pawh ka hre lo. Buh thar tam te pawh lawman pe lovin an chawimawi ṭhin. 

Tun lai hi chuan engkim hi lawmman hmuhna atan hman kan tum ni ta berin a lang. A pe theitute lah hian keimahni ta leh keimahni tana ṭha a nih inzirtir ai chuan lawmman min sawi hmuh hi tih dan phungah an neih ni ta berin a lang a. Sangha dil nei ṭha lawmman, buh thar tam lawmman, thlai thar ṭha lawmman te nen; lawmman beiseiin kawn kan chei a, lawmman beiseiin veng chhung kan tifai a. Lawmmanin kan in vaw kal a ni ta deuh ber e! 

Lawmman hi awm ta lo se kan tawp viau dawn tihna a ni mai awm asin! Hei hi fai inzirtirna atan kan hmang chu ni awm tak a ni a. Fai tura kan inzirtir lai ber hi khawlai chauh a la ni lehnghal. Bible thlir dan aṭanga thlir chuan a farisai hle a ni. Ram dang mi lo zinte hmuh atana faia lan theihna tur atan tihna ni berin a lang a. Hei hi kan rilru leh kan taksa hriselna atana kan mamawh hmasa ber a ni em tih ka lo ngaihtuah ve mai mai thin. Khaw chhung fai chu a mawiin a tha em em mai a, khawvel ram changkang chan­chin kan sawi pawhin an khawlai fai hi kan sawi tui ber pakhat chu a ni reng. 

Mi ram fai kan tihte hi chu a dik tak chuan an khawlai chauh a fai a ni lo va, an inchhung khawsakna engkim a fai. Chu aia la ril zawkah chuan an thinlungah ‘FAI’ tih hi hawrawp puiin a inziak tih a chiang. An khawlai fai hi an chhung ril fai duhna rah chhuah a ni. Faina atan chuan hei hi a pawimawh lai ber pawh a ni. Intihsiakna endiktuten an endik dawna kan khaw chhung hnim kan sam a, bawlhhlawh kan lo thenfai a, kawngsir motor park te kan lo dah fel vel hian kan mihring thinlung hi fainain a luah thuk phah lem lo khawp mai. Mizoram zimtea khaw fai bera puan nih leh, thlalak leh a lawmman bak kan thlir lo vang tih a hlauhawm. 

A hrim hrimin khawchhunga hnim hring te hian kawng an dip a nih loh chuan khua an tibawlhhlawh lem em ni aw ka ti. Intihsiakna endiktuten an endik dawnah chauh lo chuan khaw chhung pawh hian kan ngaimawh lem pawhin ka hre lo. A pawimawh ta ber chu kan thin­lungah fainain hmun a chan a, kan pian phung a nih a, kan nunin bal leh bawlhhlawh ngaihtheihlohna tak tak a neih hi a ni. Fai intihsiaknaah hian khawlai chauh ni lovin inchhung lam pawh en tel ni se a ṭha ngawt ang. Kan chenna in chu eng ang in pawh ni se, Fai hi kan nuna kan neih chuan zahawm takin a vawn theih. Kan in leh lo hi an nih ang angin an faiin in chhung thil te vawn fel leh thianghlim hi kan nun ni se kan zahawm mai. 

Nula leh nu leh pa, pawn lama inchei nalh leh fai tak tak hi an inchhung en ila, an wardope hawna thawmhnaw tel rawn baw huk te, sitting room-a mahni thutna tur then chawp ngai te, choka hnawk nuaih maite an ni thei tlat nia. Bathroom kan luh hmaa an luh hmasak kher ngai te maw le. Chung chuan kan khawlai thenfaiah hian a tuk lawkah bawlhhlawh an rawn paih leh tho. Motor aṭang ten an rawn theh chhuak leh nulh nulh thin. Mei zial bung leh pan hnah them hnawm bawm lova paih hian kan khawlai a tihbawlhhlawhzia te en hian kan thinlung lamah faina tih hi hawrawp puiin a inziak lo tih a chiang.