Aieng Cancer, stroke, alzheimer damdawi

Kan thusawi tur hi doctor-te thlarau a zahawm duh hle nachungin kan ziak tho dawn a ni. 

Mizoramah hian cancer natna hi a tam ta hle mai a. Doctor-ten zuk leh hmuam insum loh vang leh ei leh in kan fimkhur loh vang tih pawh an sawi ngun ta hle. A chhan lian tak pawh ni ngeiin a lang. Ke pali (4) sa (red meat) kan ei tam lutuk te, zuk leh hmuam insum loh vang te, zu in nasat vangte leh thil dang dang cancer thlen theitu a awm ang. 

Doctor thiam takte hian a enkawlna (treatment) lam an buaipui bakah a venna lam hi nitin chanchinbu-ah hian rawn ziak fo thei se a ṭangkai hle in ka ring. Health department magazine ‘Hriselna’ hi ṭang­kaiin bengvarthlak em em mah sela a chhiartu kan tam tawk lo a. ‘Vanglaini’ daily newspaper angah te hian rawn ziak chhuak fo se, mipuiin kan ṭangkaipui khawp ang. 

Damdawi lam zir ve map loin cancer leh aieng thu ka’n ziak tlat dawn a ni. Ka thu lakna (source) te hi- 

(1)    Internet 

(2)    Hriselna Bu, Feb­ruary 2013 by Dr. Vanlalhuma Royte 

(3)    Nutritive Value of Indian Foods. Indian Council of Medical Research, Hyderabad. 

(4)    Ramhmul damdawi (medicinal plants) Agriculture department lehkhabu chhuah. 

(5)    Horticulture department magazine, ‘Huan Enkawltu’ chhuak hmasa. 

Mihring kan thih leh damna tak tak chu siamtu ropui, Pathian thu a ni. Finna leh thiamna min pek hman nachang kan hriat erawh chu kan mawhphurhna ṭheuh a ni thung. 

Cancer, stroke leh alzhei­mer (tar atna kan tih mai) hi aieng chhunga curcumin an tih (curcuma domestica) hi cancer natna laka min vengtu ṭha ber zinga sawi a ni. Internet-in a sawi dan ṭhankhatte- 

1.    Cancer awm thei tur a veng a, cancer na enkawl nan a ṭha bawk. (Turmeric can help prevent, perhaps even treat cancer. 

2.    Aieng-a ‘curcumin’ hian tar atna (alzheimer) lakah nasa takin a veng a, a enkawl nan a ṭha hle bawk. 

3.     Aieng hi depression natna nei tan damdawi ṭha takah ngaih a ni. 

4.    Thluak natna awm thei lakah a veng a, thluak hnathawh nasa takin a 

ṭanpui bawk. 

5.    Lung ṭha lo tur a veng thei.

6.    Antioxidant ṭha tak a ni bawk. 

7.    Ruhna tur a veng etc.

Amaherawhchu, kal (kidney) ṭha lo tan erawh aieng ei tam a ṭha lo thung. 

2. Hriselna Bu (Health Deptt) February 2013, phek 11-na a, ‘Aieng ei rawh’ by Dr. Vanlalhuma Royte DMRD, sawi danah chuan- 

Cancer leh alzheimer natna enkawlna ṭha tak a nih bakah heng natna thlanglawn tam tak venna atan a ṭha. Dr. Vanlalhuma sawi dan chuan, America ramah ringawt khuan vawi 688 chuang an mithiam (scientists) ten an lo zir tawh a.

He an zir chhuahna (finding) aṭang hian Aieng ṭhatzia hi vawi 400 chuang an lo chhuah hial tawh a ni. Hriselna Bu, 2013 February a, a ziah chhuah kimchang hi tunah rawn ziah chhuah vek sen a ni lo a. Doctor thiamho hian kimchang zawkin cancer leh alzheimer natna laka inven dan tur thlai leh thil dang kan ei phak te hi rawn ziak chhuak fo sela. Sap ṭawng a tlem thei ang berin, mipui nawlpui hriatthiam theihin daily newspaper-ah hian rawn ziak hram ṭhin se a ṭha ber ang. 

Heta Dr. Huma ziah dan chuan aieng hi chhul leh hnute cancer tur te, BP sang tur te, ril leh chuap, tai cancer tur te, thin natna, pumpui chak lo, kal vung, kawpuar atan, mipa chi bawm (prostate cancer) tur te, zunthlum tur te a veng. Tunlaia mi tam takin an thihpui ‘stroke’ (thluaka thisen zam chat emaw hnawh ping) lakah nasa takin min veng thei bawk a ni. 

A chipchiar ziah sen a ni lo ang a, doctor-ten an ziah mai loh chuan Dr. Vanlalhuma Royte ziah ‘Hriselna Bu’ 2013 February thla ami hi rawn phuah nawn (reproduce) leh tal se, nitin chanchinbuah vawi 2/3 vel emaw tal rawn chhuah nawn thei se a ṭha zawk ang. 

3. Heng bakah hian Agri­culture department lehkhabu chhuah ‘Ramhmul Damdawi’ (Medicinal Plants) buah te, Horticulture department chhuah, ‘Huan Enkawltu’ bu hmasa-ah te chhuah a ni bawk. Aieng hi a lo ṭha nangiang mai. 

4. Heng bakah hian ‘Nutritive Value of Indian Foods,’ Indian Council of Medical Research (IMCR), Hyderabad buah te hian chip­chiar zawka sawi a ni bawk. 

Mizorama cancer lo tam ta lutuk hi a pawi takzet a. Tu chungah pawh thleng thei a ni. Zuk leh hmuam insum bakah ke 4 nei sa (red meat) ei tam loh te, thei leh thlai tam zawk ei a ṭhat thu hi chu TV-ah kan hmu in kan ngaithla fo. Kan inven ṭheuh theihna turin mipui nawlpui tan kan mithiamten rawn ziak fo teh u. 

Buh (rice) ei-ah hian cancer vei an tam duh bik tih hre ve hrim hrim bawk ila. Atta (wheat) products-ah cancer vengtu pakhat ‘Selenium’ a tam avangin atta ei ho-ah leh aieng ei tel tamah cancer vei a tlem bik tih a ni bawk. He ‘Selenium’ (trace elements) cancer vengtu pakhat kan tih hi buh (rice) ah a awm ve miah lo. Buh ring mi, South East Asia heng - India, China, Japan etc leh South Asia mite hian cancer hi kan vei nasa zual bik a. Buh (rice) kan ei lo thei si lo a. Aieng leh Purunvar hi ei tam deuh ila cancer vei kan tlem phah deuh ngei ang. 

Purunvar hi chu kan sawi hman rih loah ngai ila. Aieng hi a hring emaw, a dip emaw, chawhmeh kana thlak pawhin a chakna a danglam chuang lova sawi a ni. Heti taka aieng hi damdawi ṭha a lo nih avangin ei ngai lo deuh pawhin uar zawkin ei ila, kan ṭhatpui ngei ang.