TEDIM LAMTLUANG

Tedim (Tidim tia kan hriat lar) hi Chin State, Myanmar-a khawpui lian ber a ni. Amaherawhchu State Capital a ni lo thung. Tedim leh a chhehvela chengte hi Zomi an ni a (Mizoram lam aṭanga kan hriat dan chuan Paite kan tih te nen hian thlah khat an ni). Kan Zomi unaute Kût chi hrang hrang zinga an ngaihhlut ber “Khuado Pawipi (Kûtpui)” hi kum tin khawvel hmun hrang hrangah an lawm ṭhin a. Tedim-ah hian ropui takin 17th - 18th October 2019 chhung khan an lawm a ni. 

He Khuado Kûtpui hmang tur hian Organising Committee te chuan Zofa Global Network (ZGN) Champhai Chapter te an sawm a. ZGN chuan, ‘kan General Secretary hian han ṭawiawm se’ an tih avangin ka han ṭawiawm ve a ni. Champhai Chapter aṭanga kal mi pariat (8) te nen Khuado Kûtpui chu kan han hmanpui a ni. 

He Kûtpui-ah hian Volleyball leh Futsal Tournament te an lo siam a, Tedim leh Tonzang Township (Sub-District, keini rama RD Block ang hi a ni mai awm e) chhunga khaw hrang hrang aṭangin an rawn tel a ni. Volleyball an lo thiam viau mai a, Mizorama kan Club ṭha deuhte nen pawh an inbei tawk viau ang. Mizorama kan Volleyball player hriat lar tak Densanga pawh Bukphir hmingin a lo khel ve lauh lauh mai. Kûtpui hmanna hmun hi Playground lian tawk tak a nih avangin Volleyball, Futsal, Pandal leh Festival Fair / Exhibition te chu he khelmual-ah hian a thleng zo vek a ni. 

MP-te nen: Tedim kan thlen zan hian Myanmar MP (Upper House), Pu Gin Kam Liana’n a chenna ina lengah min sawm a. He hunah hian MP dang (Lower House), Pu Kham Khen Thang pawh a rawn tel a. Myanmar Politics, hnam Issue, Zofate inunauna, insuihkhawmna leh inpumkhatna chungchang te inpawh takin kan sawiho a. ZGN chungchang leh a dinchhan te chiang takin kan sawi a, Tedim-ah Chapter (Branch) din kan duh thu kan sawi a, min phurpui hle. 

Khuado Pawipi : An Kûtpui ber ‘Khuado Pawipi’ Official Function (1st Session) chu 17th October 2019 (Zirtawpni) chaw­hma-ah neih a ni a. Hemi hun hi urhsun taka hman niin Chin State Chief Minister, Organising Committee Chairman leh mi pawimawh dang pakhatin thu an sawi a. Thusawitu dang leh chu ZGN Champhai Chapter President, Pu Lalnunmawia a ni. Hemi Function-ah hian zai pakhat chauh a awm a, chu chu ZGN Champhai Chapter Executive Committee member, Nl. H. Lalnunsiami, Mami tia hriat lar (Mizo Idol 2018 1st Runner-up) a ni. Hunpui pawimawh lai ber berah ZGN te chanvo min lo pe a, chang sang kan inti hle. Mami hian Zomi hla ‘Zogam Aw’ tih a sa a, mipui lawm a hlawh hle. 

1st Session a zawh veleh Chin State CM leh mi pawimawh dangte nen Pandal chhungah rei lote kan inhmu a. ZGN-in an Kûtpui kan hmanpui avanga an lawmthu te min hrilh luam a, thla lakho-na te kan nei. Chin State CM nen hian a hma-in Rihkhawdar leh Falam-ah te kan lo inhmu tawh a, mimal tak pawhin kan innel ve viau tawh a ni. Fair/ Exhibition kan tlawh kual a, chutih mek lai chuan mual zawlah Mizorama Chapchar Kût kan hman ang deuhin Hnam Lam chi hrang hrang an lo entir bawk. CM hian MLA, Pu Thang Deih Khup kaltlangin chawchhun min buatsaihsak nghe nghe. 

Tlai lamah Organising Committee te’n VIP leh khual pawimawh dang dinner an buatsaih-ah kan tel ve leh a. Hemi ṭum hian Pu Pau Lun Min Thang, Hon’ble Minister of Social Affairs, Chin State nen kan inhmelhriat thar a. Pu Pau Lun chuan Sports lamah Mizoram nen thawhhona ṭha tak neih a duh thu a sawi a. Chumi thu chu WhatsApp Message-in Mizorama kan Sports & Youth Affairs Minister Pu Robert Romawia Royte ka zu hrilh nghal a, Pu Robert-a pawh a lo phur hle mai a, an inbe chhunzawm turah ka ngai. Minister hian zan Programme a zawh hnu-ah a motor-in min thlah thlap bawk. 

A ni hnihna, 18th October 2019 chu Inrinni a nih avangin tukṭhuan ei khama Champhai lam pana haw thlak mai kan duh avangin a Kûtpui pawh kan tel chhunzawm ta lo a. MP, Pu Gin Kam Liana khan tukṭhuan ei turin min sawm ve leh bawk a. 

Zir tur: Myanmar rama kan unau, VIP te hi an inngaitlawm em em a. An CM, Minister, MP leh MLA te hi ṭhian ang chiahin kan kawm thei. Kan rama kan VIP te ṭih deka kan biak nen chuan inthlau tak a ni. MP pahnih kan kawm te, Pu Gin Kam Lian leh Pu Kham Khen Thang te pawh mi naran ang maiin kan kawm a, PSO/ Guard pawh an nei lo. “Eng nga ti nge Personal Security Officer (PSO)/ Guard nei miah lova mi naran anga in awm mai mai?” tia kan zawh chuan, “Kan mipuite hi kan hmangaih a, an tana thawk turin kan inpe a, anni pawhin min hmangaihin kan hria. 

Chuvangin, Guard kan ma­mawh lo, kan mite hi kan guard te chu an ni,” tiin min chhang a, rilru a khawih hle mai. Inlak VIP vak pawh an tum lem lo. An CM erawhin Guard a nei nual. Chin State CM Pu Lian Luai leh MP Pu Gin Kam Lian te hian Duhlian Ṭawng nal takin an thiam a, chu chuan min inpawhtir lehzual. Minister, MP leh MLA dangte erawh chuan Duhlian Ṭawng thiam chiah lo mah se kan sawi chu an hrethiam. Ṭawng hi inpawhtawnna leh inunauna atan a lo pawimawh dawn hle mai. Keini Mizoram lama mite pawh hian Zofa hnam hrang hrangte Ṭawng hi a tlangpui tal thiamsakin hmanpui thei ila, chu chuan Zofate insuihkhawmna atan kawngro thui takin a su ngei ang.