Aizawl pawisa thleng nawitu AMC

Lalmuanpuia ziah "Aizawl pawisa thleng nawitu AMC" tih kha Vanglaini lamah ka lo hmu a, ka la ngaihtuah ngai miah loh AMC pawisa tamzia ka hre phawt a. 

A pahnihnaah chuan AMC-in an pawi­sa tam tak an hman ṭangkai lohzia ka hmu leh a, pathum­naah chuan chu pawisa chu an duhsak zawngte tan contract te thamah an sem zo tih ka hmu leh bawk. Palinaah chuan mipuiin AMC hi kan ngai pawimawh vak lo a, chutih laiin pawisa an lo hmang tam em em si tih kan hmu leh. 

Kha article lama lo lang Ward XI-a MNF Councillor khan Rs 78,77,700 kha mi 169 hnenah hna a pe a, chu chu pakhatin Rs 46,000 man zel thawk anga chhut a nih thu kha a rawn sawi a. Ward dang pawh a nih ve tho hmel, kan hmuh tak chu AMC hmasa khan Aizawl hmasawnmna lian tham thlan tir lam an lo tum mang lova, inthlan leha tlin nawn leh beiseiin hna kha an thei sem tawp tawp a ang hle. 

Thlirna dang leh chu, he Ward hi entirna atan lo hmang ta zel ila. Ward XI chhunga MNF awm ve si, mi 169 zetin hna an hmuh pawha hna hmu ve lo tan chuan vui loh theih a ni dawn lova, hei hian hmasawnna leh thawhhona thlengin a tichhe thei ṭhin a ni. Hei vang hian hna tenawi pek hi AMC thar­ah chuan sim rawh se. 

Kan hmuh dang leh chu, Property Tax Returns kha a ni. "Chupa chuan a bial chhunga mite Ambulance a pe," han tih te, "A bial chhungah parking ṭha deuh a siam," tih te, "A bial chhunga kawng a siam," tih te, "A bial chhungah YMA tan hall a siam sak" tih te ang kha anmahni tih ni lovin mipui tih vek zawk a lo daih. 

An mi leh sate chuan Councillor an neih ṭhatzia an han sawi meka tunlai cam­paign lai hian, khangte kha Property Tax Returns pawisaa lei/ siam a lo ni reng si a. A awmzia chu, mi­puiin AMC-ah pawi­sa kan chhung lut a, chuta pawisa chu bial hmasawnna atana hman turin an pe let leh a. Chu mi hmanna tur chu AMC Councillor leh Ward Committee-in an rel tur a ni. Councillor ṭhenkhat chuan Ward Committee pawh rawn mang lovin anmahni duh thuin an mimal hmingṭhatna turin an lo hmang a, mahse mipui pawisa lek a lo ni si.

AMC hi inkhualte­lem ang mai maia kal tawh loh a hun e. AMC inthlan dawn khan AMC area chhungah Free Wifi kha MNF-in an tiam a, an tlin hnu khan Free Wifi kha an siam puitling thei ta lova, tlai khaw hnu-ah rûn dalah an rawn ti ve leh hnuhnawh a. Mahse kum nga chhunga Free Wifi duhtu mipui khan kum rei tak chhung an hmu tlat lo a ni. Hengte hi intiam tawh lo ila, thil hlawm lian deuh thawhna atan AMC pawisa hi hman ni tawh zawk se a ṭha dawn a ni.