POLITICS LEH PATHIAN THU

Tun thla 24th Chawlhni zân khân Christian Resources Ministry, Aizawlin a buatsaih online seminar-ah min rawn telh ve hlauh mai a. Chuta a thupui chu, “USA politics leh Mizote Kristian te” tih a ni. USA lam aṭang pawhin an rawn tel nual a. A thupui hi a tunlai bawk a, sawi tur kan ngah viau hlawm a. Mahse sawi duh kan tam avangin atu-a mah khan duh tawk chuan kan sawi lêm lo pawh a ni mai thei e. 

Engpawhnise mit tivârtu leh ngaihtuahna min neih zuitirtu thil tam tak a awm a, chu chu rawn chhui zuk hlek thain ka hria a ni. 

Rinnaa min hringtu English Missionary te kha Kristianna lama duhtui chi evangelical emaw fundamentalist emaw an niin a lang a, an ṭobul chu Congregationalist a ni awm e. Kan Mizo Kristian hmasate  Pathian thu awih tum dan kha urhsûn tak mai a ni a. “Zoram Nghahchhan” Rev. Lalnghinglova ziak (2000 Edition) aṭang hian chung laia thil awm dan tam tak kan hmu thei a. Tunlaia engah maha kan ngaih loh - Chawlhni-a zin leh âr talh, kalkawnga nula tlangval inchhawm, tuichawi leh insûk, inkhêl etc te ang te hi khâng hun laia Mizo Kristiante tan chuan tih ngeih loh, Kohhrana inphuarna tham a ni.

Vawiinah pawh heng thil hi kan pal zam tawh e, kan ti nain kan rilru-ah chuan rin dan hmasa ngaih pawimawhna (conservatism) hian hmun a la luah thûk hle mai. Inkhawm peih lo mah ila Chawlhni-a kan hnathawh pangngai kan chawl ṭhup te, Kohhran pawn lama vantlang puipunna kan huaihawt ngai lo te hian  kan Kristianna hmasa kan la ngaih pawimawhna a tilang viau a ni. 

Theology leh doctrine thûk tak tak hre kher lo pawhin Mizo te Kristianna hian lungphûm nghet tak a la nei reng tih hi phat rual a ni lo. Chutianga Mizo Kristian hmasate puithunain thui tak min la chenchilh lai hian vawiina Kristiante zingah pâwn lam lang theia inkhuahkhirh lutuk hi ṭul tih lohna a lo chhuak ta emaw ni chu aw a tih theih. Chawlhni hi mihring tana siam a ni, ti ni âwm takin chawlhni pawh kan serh meuh loh chang a awm ta fo va. A ṭhen phei chuan kan rinnain min chhandam zo lo, kan lo rin buai ve vang ni lova athlâwna chhandam tawp kan ni ti pawl an lo chhuak bawk a. Chu chu tunlaia kan sawi lâr tak conservative leh liberal ngaihdan awmze pakhat  niin a lang. 

Chumi tehfung hmang chuan Kristianna chu kan teh chho ta a. Chu tehfung hmang bawk chuan hmanni-a USA presidential election kha kan teh ta bawk a, kan ngaihdan a thuhmun thei ta meuh lo va, mi tam takin ṭûl an tih lem loh inhnialnaah kan lût chho ta mek niin a lang. 

An political party pahnih Republican leh Democrat-te khu an lansarh bik avangin president thlannaah pawh an intlin chhâwk zak zak reng a. He party pahnihte mi leh sa ni lo President tling chhun pali te chu  George Washington-a (1789-Unaffiliated), John Adams (1897-Federal), Zachary Taylor (1849) leh Millard Willmore (1850)  Whig Party ve ve te an ni thung. 

Republican party hi tihdan hlui chawi nun zel duh Conservative niin, Democrat party te hi inhawng zau deuh Liberal ni-a sawi an ni thin. Chuti ni mahse sakhua leh rinna behchhana campaign emaw, sakhaw vawn dan chungchanga inbeihna emaw hi USA politics-ah hian kan hre mang hauh lo va. 

Tun ṭum inthlanaah pawh hian Conservative-ho candidate Donald J. Trump chu Kristiannaah a thûk zawk emaw, Democrat candidate Joe Bidena chu Kristiannaah a pâwnlâng ti emaw zawngin an campaign hriat tur a  awm lêm lo. Chutih lai erawh chuan khawvela evangelist lâr Dr.Billy Grahama fapa Dr. Frankilin Grahama chuan âw-kâ a lo nei ve deuh va, Conservative lam âwna ngaih theihin a tir lamah Donald Trumpa a sawi mawi a. Pastor ve meuhin chutia ṭan lam lo neih chu ṭhenkhatin an sawi sêl a, a hnu-ah chuan a tim ve ta deuh chauh a ni. 

Hei hi kan thupui tur ber pawh a ni awm e. Donald Trump-a kha a president chhûng khan fak hlawhna tam tak a nei a. Sawrkar râwvâ deuh North Korea leh Iran te a vau dai ni-a lang te leh Muslim pêm lut tam tur a dang te kha an sawi ṭhin. Chutih laia Mizo Kristian ṭhenkhatte zinga Trump-a tantute ṭan chhan chu, kristian tha, Isua hming lam ngam, Communist China do ngamtu tih a ni ber. 

Democrat candidate Joe Bidena chu thiangzau, nau tihtlâk leh tuai/patil te inneihna phalsaktu tiin an sawi bawrhbâng nasa hle mai a ni. Mizo zingah Joe Bidena ṭantu hi an awm hranpa kher lo vang. (FB group pakhatah chuan Mizo zinga Trumpa tantu chu 1723, Bidena tantu 193- Vanneihthanga Opinion Poll tiin an ziak a. Trumpa tantute chu hei ai hian an tam zaw fe ang tih a rin theih awm e.) 

Trump-a ṭantute hi an thawm pawh a na zawkin mahni Biak Ina ṭawngṭai rualna thupui atana hmang leh a hrang ahraia ṭawngṭai rualna (mass prayer) buatsaih tham hial  an awm niin a lang. Hei hian Trump-a leh a Conservative party chu Kristianna humhimtu mai bakah USA leh khawvel hamṭhatna tur hiala ringtu Mizo zingah kan tlachham lo hle tih a tilang awm e. 

Sawi sên a ni dawn lo va, tawitein ti hian sawi mai ila. Liberal party chuan misual khaihlum an duh lo va, Conservative lamin an duh. Liberal lamin silai thlah zal an duh lo va, Conservative lamin mimal inven nan tiin pawi an ti lo. Liberal lam chuan Kohhran leh Sawrkar lak hran hmiah an duh a. (separation of Church and State). Vantlang leh sawrkar hmuna Pathian lam thil sawina reng reng thenfai an duh a. Conservative lam chuan school leh sawrkar inah te Pathian hming lam  an duh. Liberal lam chuan neih inang te inneihna hi an pawmpui. A chhan chu anmahni chanvo civil rights a ni, an ti. Conservative lamin an duh lo. Dan anga pâwn lam atanga pêm lut te an pawm ve  ve a, Liberal lamin dân lova pem lutte dan hnuaia chinfel an duh a, Conservative lamin an duh lo. 

He policy nei chung hian USA hi kum 200 chuang an lo kal tawh a. Democrat leh Republican an inlal chhâwk reng bawk. Chuti chung chuan khawvela sawrkar lian leh thiltithei ber an ni reng tho a ni. 

A chunga kan sawi tak ang khian Mizo Kristian thenkhatte hlauhthâwn ber chu Joe Biden-a, Democrat pachal hian liberal takin sawrkar a kaihruai ang a, Sawrkar hmun leh vantlang hmuna Pathian hming sawite a khap ang a, nau tihtlak leh neih in angte a inneihtir ang tih a ni. Mahse heta kan hriat tur chu USA kristianna lungphûm khu a nghet em em a ni tih hi a ni. 

Kum 1620 vela Pilgrim Fathers-ten sakhuana lungphum an phum kha a la awm reng a. USA mipui zingah Kristian ni meuh lo leh Kristian ni ve mai maite tam tak awm mahse an ram hian Kristianna thurin hi an kalsan lo. Conservative an ni emaw liberal an ni emaw, Kriatianna hrim hrim hi an kutah a him ang. 

Joe Biden-a pawh ni se, Kristianna hi a neksawrin a tihdal vek a rinawm lem lo. Tuna Democrat President lakluh a lo nih tak avanga hlauthawng kan nih chuan hei hi ngaihtuah ila. Tun hma aṭangin Democrat President ṭha leh lar tak tak an lo awm tawh. Woodrow Wilson, League of Nations dintu, FD Roosevelt, Indopui II-na hnehtu, H.S Truman, JF Kennedy, LB Johnson leh a dangte. An liberalnain USA mipui leh Kristianna a tih khawlohna engmah hriat tur a awm lo. Tin, State tin khuan Constitution an nei hrang vek a, an duh chuan nau tihtlak leh patil/ tuai inneih tih leh a dang te khi an pawm lo thei ang. 

Chuvangin, tuna Joe Biden-a, liberal Democrat a lo president tak avanga Kristianna tlahniam tur emaw, engkim chhe veka India leh Mizoramin tuar dawn hiala suangtuahna te hian conspiracy theory a pawl deuh a ni. Kan politician te anga thâwkaphita “Pathian, Pathian” an tih ve loh avanga Kristian dahlau tak an nih kan ring ngawt tur a ni lo vang. Inaugurationa ṭawngṭaina hmangtuten Isua hming an lam lo, tih te pawh kha, Roman Catholic lam an nih vang a ni mai lo maw? Keinin kan zu duh fir pui lutuk pawh hi a dik ang em? USA mipui zing aṭangin tuman an rawn sawisel ve pawh chu a ni bawk si lo va! 

Mizo te hi  India ramah hian Hindu sakhaw betu an tam ber a, Kristiante chu zaa 3 chang chang kan ni ang. Vanneihthlâk takin Hindu sakhua hi sakhaw nunnem (tolerant) tak a lo ni a. A firfiak pawl awmin hlet han chhuah thin mah se, tun thlengin Kristiante hian kan sakhua hi India ram hmun tinah kan phun nasa hle a ni. 

India ram roreltute hi Hindu vek ni mah se India ram Constitution article 29 leh 30-naa kan sakhaw zalenna hi an bawhchhe ngawt thiang lo a ni. India ramah hian sakhaw hrang hrang an awm a, hengte hi Constitution-in a hum tlat a ni. Hei vang hian Sawrkar hi sakhaw thilah hian inrawlh lova a la kal hran hi kan duh dan a ni a. Chutih lai chuan USA-ah chuan Sawrkar chu sakhaw thilah inrawlh se kan ti tlat bawk si. India rama kan duh loh kha USA tan chuan kan pawm thei a ang viau a ni. India Sawrkar hian Hindu sakhaw serh leh sang chauh hi vulh tum se, kan chiau hiar viau si ang e. 

Mizo zingah hian a mimal taka Trump-a âtchilh hi an lo awm ṭeuh mai a. A ṭan ve lem lotu emaw lo sawi hnâwm deuhtute chu Biden-a ṭantu, m.k.hr ṭantu an ti hmiah hmiah mai a. Ṭawng an insûmkâr lo hle. Keipawh hi, “Fake IAS rtd, IAS rtd bengchhêt, inchhiar zau lo” tiin facebook lamah min vawm nual a. Pakhat phei chuan, “PC Lawmkunga tu leh fate zingah ka lo tel ang tih ka hlau” a ti ngheng mai a ni. Ka thuziak reng rengah Trump-a demna hi ka la sawi ngai lo va, Biden-a fakna hla lah ka sa ngai hek lo. Thu belh chian dawl lo hmanga USA presidential election thuziak emaw sawi emaw erawh chu ka hnial let (rebut) zauh zauh tih chauh a ni.  

Trump-a thlarau changtute hian Trump-a kha an han ring zo khawp a, January 20 thleng khan Trump-a hi President-a lâk luh zawk a nih an la beisei hial a ni. Tun thleng hian Trump-a a lo let leh an la beisei bawk. 

Kan thliar hran thiam a pawimawh khawp mai. Ṭan lam nei rân chunga politics leh Pathian thu kan chawhpawlh chuan Pathian thu kan bel (apply) dan pawh a fuh lo fo vang. Pathian thu a ṭha e, kan nunkawng min hruaitu a ni, chatuan nunna kan beiseina kawng min kawhhmuhtu a ni. Chutih lai erawh chuan tu zawk emaw tlintir tumna atana hmanga USA president thlanna kha Setana leh Pathian mite inbeihna ang hiala chhuaha ngaihdân fim lo puakchhuahna (biased inferences)  nei kan tam hle hi a pawi.  

January 25, Monday Vanglaini-a Lalrinliana Colney leh Dr. Lalchhuanawma Tochhawng thuziak kha inenfiahna atana kan hman a ṭha khawp ang. Eng nge chhiartute’n in ngaih ve dân le?