INDIA TIME (IST) ZONE LEH MIZOTE (Tlema kan insiam rem a ngai)

Indian Standard Time (IST) kan hman mek hi January 1, 1906 aṭanga hman ṭan a ni a. Khawvel huapa Time Zone an siam hi uluk taka Longitude (Meridian an tih bawk) nena hmehbela ruat vek a ni a. Ram zau pui pui chhak leh thlang zawnga inzar pharh nasa zual, Canada te, USA te, USSR (hmanlaia Russia ram) te leh China te tan chuan time zone pakhat inṭawm chu a remchang lo eltiang a. Chuvangin, Canada leh USA te chuan time zone 5 lai an nei a, Russia chuan time zone 9 an nei hial a ni. India ram khawthlang tawp hi Meridian 68E a nih laiin khawchhak tawp chu meridian 97E a ni daih thung. Kan chenna lei hi khawthlang lama aṭanga khawchhak zawngin a inher a, meridian degree 15 zel her nan darkar khat a duh a ni. 

Chumi awmzia chu longitude degree khat zelah minit 4 in hun a inthlau zel tihna a lo ni ta a. Chutichuan, India ram rau rau pawh chutiang taka kan chhut chuan khawthlang leh khawchhak tawp ve ve chu hun thlauh dan a nasa thei hle dawn tihn a ni. Time zone pakhat aia tam nei ve a mawi kan ni ve a ni. Amaherawhchu, ram khatin hun thuhmun in khuangrual taka hman duhna a awm si avangin India ram tana hun pakhat hman tlan tur Time Zone (Indian Standard Time kan tih mai) chu a ram laili deuh ber enzawna riruat a lo ngai ta a.  Chutichuan, Meridian degree 82.5E hi an thlang ta a, chu chu Uttar Pradesh State a Mirzapur (Allahabad bul khawchhak lama mi) hi kan Time Zone bul thut atan ruat a ni ta a. 

Kum 150 chuang kal ta a British hoin India ram an awp lai kha chuan official deuh tak pawhin India ram khawchhak lam Kolkata a chin chhak lam tan chuan time zone hran pa deuh an hmantir a, chu chu  “chaibagaan time” an ti a, “bagaan time” tepawh an ti. Indian Standard Time aia darkar 1 a hma a ni a.  Thingpui huan (tea estate) hnathawkte tana hna thawh tam zawk theih nana an ruahman a ni. 

Mahse, India ramin independence a lo neih khan he Indian Standard Time hi an ṭawm ve ta a ni. Official lutuk lo a an lo hman ve ṭhin Kolkata time (Meridian 90E) leh Bombay time (Meridian 75E) darkar 1 leh minit 3 a inthlau chu kum 1955 thleng khan an la hmang tel ve lauh lauh chungin hei pawh hi sawrkar laipui berin a phur pui loh takah chuan a zuzi zo ta a ni. 

Heti taka ram pharh zau kan nih avang hian time zone hran neih ṭha titu an awm reng a. Kum 2001 khan Ministry of Science and Technology hnuaiah time zone pakhat aia tam neih chungchang Committee din a ni a, kum 2004 ah

Parliament-ah Committee thurel time zone pakhat aia tam neih ṭul tih lohna chu an thlen a. Thu chu a tawp fel a ni ta. Kum 2014 khan Assam Chief Minister, Tarun Gogoi ten nasa takin time zone hran neih an nawr a, hmar chhak State ho pawhin an thlawp viau chungin an hlawhtling ta lo a ni. 

Kum 2017 ah mai khan Department of Science and Technology chuan India ram atan time zone pahnih neih rawtna chu a rawn phawrh leh chiam nain eng ual a thleng ta chuang lo a ni awm e. 

Mizoram hi Latitude degree 23.1645 N leh Longitude degree 92.9376 E a awm kan ni. Kolkata ai pawha khawchhak lehzual a ni. Mumbai te, Ahmedabad khawpui lakah chuan Mizote tan zing kawl a eng hma fe a, ni chhuah hun pawh a inthlau khawp mai. USA velah chuan sik leh sa inthlakah ni chhuah leh ni tlak hun a insawn nasat avangin hnathawhna hun an am theih nan ‘daylight saving time’ tiin sawrkarin hun a siam rem lui ṭhin a. Khawvela ram hausa ber nih hauh reng chu remhre takin an insiam rem ṭhin. Keini State-ah chuan chutiang tih a awm ve lo a, India ram hmun dangte ‘ak ruala ak’ ve turin kan nghak thup mai a ni ber. 

Zing dar li bawrah kan rama khua a en uarh tawh hnuin state danga mite muhil an thawh hun nghakin kan khawsa a ni ber mai a. Anni huna hnathawk tura an chhuah hun zing dar 9 vel tawk tak chu keini tan chuan tlai tak a ni tawh. Zing kar hun darkar 5 emaw lai chu kan dah awl tam ta hle tihna a ni. Chutih laiin ni a chhuah hma miau avangin a tlak hun pawh a hma lo thei lo a. Tlai dar nga velah chuan khaw en lai hnathawh hun (daylight working hour) kha a lo tawp leh tawh a. State danga mite hnathawk tura an chhuah hun kan lo nghahte erawh chu keini khawthim hnuah pawh an la thawh vanglai a la ni a, zan dar 9 te dar 10 thlengin khawlai a la reh lo. 

Mumbai khawpui te ngat phei chu zan dar 10 hi tlai an la ti lo, zing dar 2 thleng local train-ah Mizoram mihring let tam tak an la tlan tluk tluk a, darkar 2 an chawl det a, zing dar 4 ah an ṭan leh a ni. Hei hian a tarlan chiang tak chu hnathawh hun chhung Mizote aiin an nei sei fe zawk a, India ram ‘commercial capital’ a nih mai bakah khawvel khawpui dang el phain sum deh chhuah kawngah vantlang khum a ni. 

Japan ram hi keini aia khawchhak fe, darkar 3.30 a hma zawk an ni. Khaw thim dar 6 velah office an ban hun a ni chungin hna hi an thawk tui khawp a, zan dar 8 hnu hi an ṭin hun a ni. In an thlen chuan zan dar 11 te a ni a, zing dar 6 office panin train an chuang leh hman tawh a ni. 

India ram chhim lam state pakhat Tamil Nadu te hi lo thlir leh ila. He State mi, Tamil mi te time zone chuan Meridian 78.6569E a ni daih a, Indian Standard Time hmeh belna Mirzapur ai pawha ni chhuak tlai a ni. Mi taima leh thawk rim an nihna tichiangtu ber mai chu- zing ni chhuah hma, khua pawh a la thim laiin khawlaiah hnathawk chhuak - vak an kat nuk tawh. Zing kar thawhhlim, khua a en fela dosa leh coffee lam duh tan kawngsir thingpui dawr a inhawng fer fur tawh a ni. Zan lam ni se, Delhi vela mi tam tak an ṭin tawh hnuah pawh anni chu dawr inhawng an la tam lutuk. Time zone thuah an chiauhiar lo a, an hnathawh duh hun eng mahin a pawlh buai lo. State hmasawn leh hausa an nih reng theihna ‘thuruk’ chu hetah hian a awm a ni. 

Hetah hian Mizote hian enge kan tih ve tur ni ta le? Kan khua a var hma a, kan khaw thim hun pawh chumi mil chuan a hma bawk. State danga mite nen inkhaikhin erawh chuan kan khaw en lai (daylight working hours) erawh a kiam bik a ni hauh lo. Hnathawhna hun kan neih chu a thuhmun reng. Insiam rem ngai lai chu kan nei ve ngei tihna a ni. Chulai chu eng tin nge kan tih ang? Zep thu cheng lo, zing dar 4 aṭanga zing dar 9 chhung hian kan state pum hian he hun sei tak hi eng ualah kan chan lo. ‘Time zone hrang nei ila kan ziaawm ang’ ti pawl kan awm a nih pawhin a awm ve tho. ‘Chhura leh Naa thawnthu ang deuh a nihna lai a awm. Chubakah, sawrkar laipui lam remtihpuina a awm thei awm si lova. Keimahni tualchhunga insiam rem bak hi tihtur dang a awm lo a ni ber. 

Hna kan thawh hun a tawi miau si chuan kan hnathawh pawh a tlem bik tihna a nih chuan ‘Van Mana’ beisei ang maia kan ṭhut ngawt hian keimahni leh keimahni kan in hrek tihna a ni mai dawn law’m ni? Office lah chu zing dar 9 hnu lama ṭan a ni kumtluan bawk. Naupang zirna ina kalte tan hun lah chu zing dar 9 lam hnai kan nger tlat bawk. Sawn hma tuma sawrkar a inrawlh pawhin nu leh paten ‘kawpuar’ leh ‘pum dik lo’ te kan chhuanlam zui a. State danga sikul ṭha pui puia zirlai nu leh pate hian ‘kawpuar’ an sawi lo a, lo ‘puar’ hle pawh ni se, mithiamin sikul naupangte hun hman dan tur ṭha ber nia an riruat chu a hlawk tih an hria a, ‘lo puar vel mai mai teh se’ an ti te pawh a ni ang. Tuna kan kalphungah hi chuan zing dar 9-10 syndrome hi kan in bawhbehtir mek ni berin a lang. 

Kan ram kan rethei tih au hla hmangin kan pangchang reng mai dawn em ni ang? Hna kan thawh tlem em avangin kan rethei mawlh ang chu. Hnathawh rei loh hi kan nunzia a kan seng luh deuh tawh avangin nghawng tam tak a nei mek a nih hi. Mizote hi infak phur kan ching a, “Mizote hi kan thatchhe lo, thil ṭha kan hmuh chuan kan taima ve tho” tih ang vel hi kan au hla a ni ṭhin. ‘Thil ṭha’ ‘thawh manhla’ te pawh hi hmuhchhuah a, hai chhuah a ngai. Zir peih te a ngai a, rei tawk kan thawh mauh loh si chuan thil ṭha hai chhuah kawngah pawh kan hnufum zel dawn tih lam te hi kan ngaihtuah thlen a ngai. Mizote hi ‘hnam taima, hna erawh thawk tlem kan ni’ tih hi kan invuah dan tur dik tak a nih zawk hmel. 

Heta ṭang hian tal chhuak ila, kan hnathawh hun bi hi her danglam ta ila, office ṭan hun te hi zing dar 8-ah emaw sawn dawrh ngam ila. Committee pawimawh te pawh zing karah kan nei thei tho. Sikul bana home work, revision etc. hun te, infiamna hun te an neih ṭhat zawk theih nan zirlaite hun hman dan tur siksawi te hial pawh a ṭul. Kan rama mipuite laka huhang nei ber leh min kaihruai theitu ber Kohhran ho te, NGO lian zual ho te hian hma rawn hruai se. Programme te hi zing dar 7, dar 8 vela ṭan tur te hian rawn ti ut ut mai se, ngaiah kan nei thuai ang a, kan hnathawh hun pawh kan inpe tam deuh ngei ang. Hnathawh hun semzai leh daihzai zawka nitin hun kan siam rem hi keimahni kuta awm a ni a, tuma tihfel pui beisei tur kan ni lo. Keimahni tih theih a ni.