LPG Home Delivery leh a kaihhnawih

Liquefied Petroleum Gas (LPG) hi chhung tinin eirawngbawl nana kan hman Domestic Cooking Gas 14.2kg a rit leh 5 kg chi hi a ni a (5 kg chi hi Mizoramah a la awm ve lo) LPG hi essential commodity leh Public Distribution pakhat niin, Sawrkar in sum tam tak (Subsidy) sengin consumer te hnenah Distributor ten an pe thin a ni. India ramah Mumbai-ah 1955 aṭangin sem ṭan a ni a. Mizoram-ah chuan March, 1976 aṭangin M/s Suakchhunga ten Aizawlah bul ṭanin M/s Vanbuangi, Mizofed leh M/s Biakkungi etc ten an ti a. Tunah chuan Distributor te chi RGGLV (Rural Scheme) te nen Mizoramah Distributor 57 lai an awm tawh. India ram pumah Distributor 21, 200 chuang zet a awm tawh a chhungkua/family 15 - 16 crore velin an hmang mek a ni. 

LPG sumdawnna hi phalna bik nei Distribu­tor-te chauhin a khawih tur a ni. Consumer-te pawhin duh thlan theihna/ zalenna kan nei tlem hle. Min bialtu Distributor chan te (area of operation) hnen aṭanga la vek tura (guideline awm angin) tih kan ni. Distributor-te hian LPG supply, distribution leh a man thuah te Discipline/ Guidelines leh Control Order angin customer service hi ṭha tak a zawm vek tur a tih a ni. LPG hi a Scheme-ah hian home delivery tura tih a ni. Indian Oil Corporation Ltd (IOC) i.e Govt. Oil Marketing Company tia hriatten India ram pumah Distributor-te kal tlanga consumer-te hnena pek/ sem tura tih a ni. Gas man Retail Selling Price (RSP) fixed a nih hian home delivery rate a ni nghal a ni. Tin, ‘show room’ a la tur chuan IOC-in phalna a pek bikte chauhin lak theih tura tih a ni a, rebate Rs. 24/- (as October, 2019) a tih hniam tur a ni. 

M/s Suakchhunga Distributor hian 1976 leh a hnu deuhah Home Delivery engemaw chen chu a lo kalpui tawh nghe nghe a ni. Mizoramah gas a harsat em em lai, 1980 tawp lam leh 1990 chho-ah te chuan show room-ah gas changin zing varṭianah kan intlar ṭhin. Gas bur ruak leh a tak awm put/ phurh a ngai ṭhin. Chan loh phei chuan a tuk lehah kan chang leh ṭhin a nih kha. Hna ṭhulhin kan buai ṭhin hle. Motor nei lo tan a buaithlak lehzual. He gas harsatna sukiang tur hian Mizoram Gas Consumer Union (MGCU) chu March 1995-ah Pu Bualhranga President-na hnuaiah din a ni ta a. LPG Control Order leh Marketing Discipline Guidelines etc te zir chiang in, ‘Gas hi Home Delivery tur a ni a, chumi atan chuan a man pawh kan pe vek a ni’ tiin sawrkarah MGCU chuan a thlen ta a. Sawrkar chuan September/ October 1996-ah hma chak takin a la ta a. Chung hunlai chuan FCS Minister chu Pu C.L Ruala a ni a. Director-ah Pu LR Laskar a ni. IOC hotu liante chah chhuakin ruahmanna siam a ni ta a. Home delivery tihna turin veng tinah delivery point siam phawt nise tiin a rel a. Hemi tih puitlin hnuah Home Delivery kalpui tura tih a ni. Hriat reng tur chu mi tam takin hetiang hi thil tih theih loh leh harsatna consumer-ten kan tawh phah zawk ang tia ngaihdan vawrh darh an awm a. Show room-a lak kha kalpui rei a nih tawh avangin ṭha bera ngai engemawzat an awm. 

Gas kan harsat phah ang tia sawiin an thawm lah a ring phian a. Sawrkarin a kalpui lui a NGO, khawtlang hruaitute leh mi tam takin an support bawk a, a tirah harsatna tlem awm mah se thla hnih vel chhungin a hlawhtling vek a ni. Mipuiin a ṭhatzia chu an hria a, tun thlenga mahni venga gas kan lak theihna chhan hi a ni. MGCU (August 1997 a MCU ni ta) chuan home delivery ti turin a nawr zui leh a, ti tura sawrkar nena rel fo tawh ni mah se, eng engemaw avangin tih hlawhtlin a ni ta rih lo a ni. 

Tunah hian Mizoram sawrkar chuan mipuite hmakhaw ngaiin Home Delivery ti turin thutlukna a lo siam leh ta a. Assembly House a Minister FCS&CA thusawi bawh zuiin - Director, FCS&CA Chairman-na hnuaiah CYMA, MCU, Local Council Association leh, Distributor (MIDA) aiawhte nen ni 22.5.2019 a meeting chuan Home Delivery hi September, 2019 aṭanga kalpui ṭan nise, tin, hemi atan hian public awareness pawh a ṭul anga tih ni rawh se tiin a rel ta a. A bul ṭan nan hian Mizofed-in a enchhinna pawh ti tawhin Home Delivery Launching Programme hi Hon’ble Minister Pu Lalrinliana’n ni 5.9.2019 khan a hawng tawh nghe nghe a ni. 

Central Govt. chuan Direct Benefit Transfer of LPG (DBTL) or PAHAL Scheme chu 2013/2014-ah District 354 ah ti hlawhtlingin, ram pumah ni 1.1.2015 aṭanga hman vek tura tih a ni. Gas refill booking hi tih vek a, subsidy pawh an Bank account-ah lut nghal vek tura ruahmanna siam a ni. Tunah hian Home delivery bulṭan nan College Vengah tih a ni tawh a, chumi hnuah Aizawla Distributor tinin, an veng thlan bik ṭheuhah October 15-18 chhungin refill booking ti fel vek tura tih a ni ta a ni. Consumer pawhin ṭha taka book hi an mawhphurhna a ni. Refill booking hi India ram pumah tih vek a ni a, gas hi book loh chuan bottling plant aṭangin an pe thei tawh lo a ni. A hma pawhin kan hmu tho alawm kan ti maithei, distributor-te hian kan consumer no. an duh duh hmang khan kan hriat lohin min lo book sak a, chumi tan (against) chuan load an la ṭhin a ni. 

A book-tu consumer hnena pe (delivery report) angin report leh vek a ni ṭhin. Hemi hmangin computer generated cash memo pawh issue vek ṭhin a ni. Tichuan an duh duhnaah an sem/ pe ta mai ṭhin a ni. Hei vang hian gas black pawh a tam phah nia hriat a ni. Consumer-in Mb no. 9089024365-ah (for North East States) ah dial-in IVRS in registered a, book zui mai tur a ni. I booking no. te an rawn pe leh thlap ang che. Gas i hmuh hun tur pawh mobile-ah an la rawn hrilh dawn che a ni. 

India ram mipui tam tak zingah hmun kilkhawr leh in chhawng sangah te pawh pek vek an ni. Motor/ vehicle leh mihring (delivery boy/ men) hmanga pek ve tho an ni. Gas book hi a huna hmuh loh chuan awlsam takin complaint pawh siam theih a ni tawh bawk ang. Tuna gas supply kan hmuh dan, thla khatah bur 120000 - 140000 hi refill book leh home delivery tih a nih chuan tun aiin gas hi kan hnianghnar zawk ngei ang. LPG connection, population leh chhungkaw awmzat etc te hi census (2011) based a chhut a ni tlangpui. DBTL atan hian consumer tinin KYC Complied-in form tih fel vek a ni tawh. A tir lamah chuan harsatna tenau deuh awm mah se consumer tam berte hamṭhatna tur zawk a ni tih hriain zawm ngei tum vek a ṭha. 

Chhung tinin kan gas hman zat (consumption pattern) kha a takin system/ software-ah a lut vek tawh dawn a. Gas mamawh hunah kan nei thei zawk tawh ang. Tuna sem dan hi chu thla 2/3 danah hrut rual kan ni a, tu tu emaw hminga book kha midangah an sem kual a, a ṭhen black te pawh a ni ṭhin. Tunah hian home delivery rate hi consumer lam chuan a sang lutuk kan ti a, enchhinna ang deuha kalpui a ni. Veng tinah kalpui a nih chuan a rate pawh tun ai hian a tla hniam ngei ang. State danga an kalpui anga kalpuiin home delivery hi a hlawhtlin hunah consumer-ten dah khawl vak vak duhna rilru leh gas nghei hlauhna a ziaawm/ bo tawh ang.

India ram hmun dangah pawh enchhin lohin an kalpui a, a hlawhtling mai. A wholesale-a kalpui ve hun a nghahhlehawm. Hriat reng tur chu venga sem a nih dawn khan show room a intlar tih tawp thut kha mi ṭhenkhat chuan an hlauthawng a, mah se engmah harsatna em em awm lovin a hlawhtling ve mai. Hriat tur pakhat chu - show room a intlar ai chuan mahni venga lak a awlsamin sum kan seng tlem zawk fe a ni. Venga intlar aiin inah min rawn pe ve tawh mai dawn a, transparency pawh a awm ang (mi rama a an tih danin). Gas mamawh tamin, an book ngun ang a, an hmu ngun ang. Subsidy lut lo tam tak complaint hi a awm tawh lo ang. Software/ system-in a command vek tawh ang. 

Distributor-ten home delivery tihna turin a ṭul ang ruahhmanna siam hi an mawhphurhna a ni. Marketing Discipline Guidelines (MDG) for LPG Distributorship-in Customer Services chung chang a sawi aṭang hian a chiang mai. “The LPG distributor should provide adequate delivery infrastructure for making home delivery of LPG cylinders commensurate to the average daily refill sales and to take care of breakdowns/absenteeism. In case of backlog situation, additional delivery infrastructure as per requirement is to be provided. LPG distributor should ensure prompt service and courteous behavior at all times”. LPG (Regulation of Supply and Distribution) Order, 2000, Section 9(e) ah “No distributor shall, without prior written permission of the concerned Govt. Oil Company (i.e IOC Ltd. Mizoramah) refuse to make home delivery at the address of the Consumer as registered with the distributor.” 

He dan vek Schedule-I Prohibited Activities sl. no. 10 a sawi chu “Non-home delivery of LPG refill supplies to consumer and/ or not giving rebate on non-home delivery to LPG consumer.” Home Delivery tih loh hi dan bawhchhiatna a ni zawk a ni. LPG Manual-ah “LPG is a home delivered product” a ti bawk. Kangmei siam thei (explosive) a ni a, heng Govt. of India orders hmang vek hian chhungkaw crore 15 velin home delivery hi India ramah an hmang mek a ni. Dealers’ commission hi Rs. 56.20p per cylinder-ah company-in a pe bawk. Mizoramah chuan Rs. 7.53p hi additional charge distributor-te hnenah company rate bak kan pe mek bawk. LPG man hi India ramah Mizoram hi a pe sang ber kan nia hriat a ni.