ZIRNA UAR KUM PUAN Nihna pawm ngamna em ni ang?

Zirna uar kum tih hi ka ziak ang ka tih rauh rauh laiin, ka mi ngaihsan tak mai Revd Chuauṭhuama’n a rawn ziak a. A sawi loh lam han tharthawh veleh teh ang. Mizorama pawl lian ber YMA chuan N.Vanlaiphai-ah General Conference an hmang a, hruaitu thar an thlang a. Kumpuan thupui atan, ‘zirna uar’ tih thlan a ni. Buana hmain kil hrang hrang aṭangin kherh teh ang! 

Kristian ram kan nih tak hnuah zirnaah a mak maka chakin kan ṭhang a, chawh­ruala ziak leh chhiar thiam tamna ber state te hial kan lo ni tawh a, a hniam lamah kan awm ngai ta lo. Kan mi hmasa zingah India ram pum huap pawhin, an kal tawhna lama a ber kai kan nei nual tawh. Chutiang a nih mek lai chuan leh, khawtlang leh kan NGO te pawhin ram hmasawnna tur thil hrang hrang kan vei kual dum tawh laiin, kan tlawmngai pawl lian ber mai chuan, ‘zirna uar’ kum a puang leh ta rup mai si a! 

Kan lo nih tawhna leh kan nih mekna nia lang reng si, kan tlawmngai pawl lian ber maiin kumpuana an hmang leh ta tlat mai hian, eng nge min ngaihtuahtir ni le? Ngaiawh pawh ni pha lo, hnungtawlh zawnga kalna a ni mai em le? Ngun takin in ngaihtuah tlang teh ang u. Hruaitute kumpuan, hma la tur bik awm kumpuan ni loin, kan zaa kumpuan a nih hi pawmin, hma lak theihna apiangah awmze neia hmalatu nih kan tum ṭheuh a ṭha awm e. Kan chhehvel hnam tlem zawk leh kan hnuai en ten, min chung en bik miah lo tih hi kan pawm a ngai e! 

Mak deuh mai chu, sorkar-ina a beisei pawh ni hauh si lo, mahni khuain kan theih ve tawk a nih chuan, khaw mipui ṭangrual hian zirna in hi kan din chawp thei mai zel a, zirtirtute hlawh atan pawh, kan fate kal ve miah lohna mah ni se kan sum bawma pawisate kan phawrh hreh lo! Chutiang khawpa zirna duh chu Mizote kan ni. Mizo naupang khaw pangngaia chhiar theiha seilian tawh phawt chuan, an khuaa zirna in khawi emawah zirtirna a dawng deuh zel.

Kan beiseina leh innghahna hi khawiah nge a awm a, eng chinah hian nge kan lungawi a, eng kan thlen hian nge kan duh tawk mai ṭhin? Fate zirna atan te hian kan inseng nasa a nia! Sikul ṭha ṭha kan bawh a, an tuition fee leh hostel awm man sang lutukah pawh kan buai miah lo. Fate sikul building bulah nutling patling kan dingin kan ṭhu ngir khup a nia. Ṭawng mawi lo ni mah suh se; Pathian thua zirtirna an neih ṭhat aiin, sikul ṭhaa zirna kan awhpui hial awm asin! Chutih laia ‘zirna uar’ kum puan a la ngai tlat mai hi, mak tak a ni. A phena thil awm ngaihtuah a, va hmu pha tan erawh chuan tihmakmawh niin a lang thung si a nih hi. 

Kan chhuk en ṭhinten min chhuk en let turin kan khawsa ṭan miau a, kan mikhual ten kan ram chhungah min huphurh ta em em mai a, heng zawng zawng lo thlen chhan hi eng nge ni ang? Kan rin Pathian hi kan hre tawk lo nge, A thu kan zawm peih lo le? Fuh lo eng emaw chu a awm a ni. 

Zirnaa kan sânna ringawt hi a tawk ta lo. He ‘zirna uar’ kumpuan hi kan zaa kumpuan a nih ang hian, kan kristianna nen a inzawmna leh, kan kristianna avanga kan ṭhatpuina tur i ngaihtuah chhuak tel ang u. Zirna chu kan uar thawkhat a, mah se kan ram leh hnam damna khawp kan thleng thei si lo a nih hi. Chumi siamṭhatna bul chu he kumpuan hi ni ngei sela a duhawm hle mai. Sikul naupangin ram leh hnam kan vei pha ngai miah lo te hi veiawm tak a ni! 

Kan tlawmngai pawl lian ber mai leh kan za atana ding a, Mizote tun thlenga min timawitu YMA-in hnung tawlh kan nihna tur anga lang hial thei ‘zirna uar’ kum a puang leh ngat ngam hi thil lawmawm tâwp a ni. Kan nihna dik tak pawm ngamnaah hian hmasawnna bul chu a inṭan ṭhin tih hi hre bawk ila. He kumpuan hi, kan zaa kumpuan a nihna leh, kan mamawh em em a ni tih hriain, zirnaa harhtharlehna (revival) dik tak a lo thlen ngeina atan hmang teh ang u.