SARUANG PAHNIH

Ṭum khat chu sakei tar chau tak, rilṭam hian sakhi leh sazuk ruang a chhar hlauh mai a. Saruang chu hlam thum vela inhlatah an awm a. A ril a ṭam em avangin a vaiin amaha ei zawh ngei a duh a, a hauh vin hlur mai a, a ei ṭan ta a.

Chutih mek lai chuan sihal rual khat an lo kal a, a kil loh zawk saruang chu an kil ta chat a. Mahse sakei chuan a lo phal awzawng lo mai a, a va hnawt darh ta a. Sakhi eitu a hnawh darh chhungin a ṭhenin sazuk ruang an lo ei ve leh a; chu chu a thik a, a va hnawt darh leh a; chutih chhung chuan sihal rual chuan a tlansan tak sakhi ruang chu an lo ei leh thung a. 

Sihal rual chuan ruang pahnih chu an ei zo ta mai a. Sakei erawh chuan a tirtea keih hnih khat a keih bak kha a chang ve ta lo a; rilṭam leh thinrim zetin a vak leh ta ruk ruk a. Hringnun pawh hetiang hi a nih chang a awm ṭhin. Thil ṭha tih tur leh neih tur tam tak he khawvelah hian kan hmu ṭhin a. Ṭha kan tih em avangin neih deuh vek kan tum fo a, mahse, ṭum khatah mi pakhatin thil ṭha tam tak a neih vek theih bik loh fo ṭhin. Sakei pawh khan sakhi ruang emaw sazuk ruang emaw chauh kha ei se, puar takin a awm mai tur.

Zirlai thiam thei tak pawh mi ṭhenkhatin MCS ni turin an rawn a, a ṭhenin IAS ni turin, a ṭhenin doctor ni turin, a ṭhenin engineer ni turin - a ṭha vek mai. Mahse mi pakhat tan hengte hi a rualin a nih vek theih loh, a eng emaw ber nih tum mai kha a ṭha. Thil ṭha dang tam tak hnawlin ṭha a tih ber pakhat kha thlan nalh a, thlur bing ngar ngar mai tur a ni. Lehkha thiam tak ni chunga inkhelh thiam tak nih tum bawkte pawh thil harsa tak a ni. A pahnih hnihin 'thiam tak' ni tur chuan hun leh tha tam tak sen a ngai a, mi pakhat hun neihin a daih lo fo. Chuvangin, a eng emaw zawk zawk thlan mai a finthlak fo. 

Kohhran rawng­bawltu ṭha tak nih te, pawl hruaitu ṭha nihte hi a chakawm. Mahse mi pakhat tan chutiang mi nih rual ṭhawt chu har tak a ni. A eng emaw zawk zawk tha taka nih mai kha a dik a ni. Duham loh a ṭha. Sawrkar hna ṭha tak thawh ve duh si, thingtlanga awm peih chuang si lote hi a awm theih. Aizawl nula tlangval changkang tak ni chunga thingtlanga sawrkar hna tha taka thawh bawk chu a theih loh a ni. A eng emaw zawk zawk nih mai kha a finthlak a, a hahdam mai.

Pawm lai nei reng chunga mi nula/ tlang­val emaw mi pawm lai ngaihzawn a, ralṭi taka hun hman fo ai chuan mahni pawm lai laka rinawm taka awm kha a finthlak. Thil pahnih intiat rual mai karah pakhat zawk zawk duh thlan a, a pakhat hnawl tura thutlukna khirhkhan tak siam a ngaih chang a va tam em. Kan duh chu fîm taka ngihtuah chungin thlang mai ila, kan thlan loh zawk kha ît loh tum mai ila, a hahdam fo. Sapho hian 'Jack of all trades, master of none' an ti a. Thil thiam zel zul, mahse a enga mah eizawnna khawpa thiam si lo an sawina a ni. Chutiang mite chu mi nuihzatbur mai an ni châwk.