Aw MNF, in siamtu hre reng rawh u!

Kum 2018 January thla velahte kha chuan kum tawp MLA inthlana tling tur ‘chiang sa’ chu Congress tiin mipuiin kan la sawi kan la sawi a, mahse roreltu chu Pathian ruat an ni tih ti lang chiang tu chu vawi leh khatah boruak a inthlak ta thut a. ZPM khan boruak sang tak an rawn nei a, Congress chhungkaw buaina a puak keh thut a, MNF lamin a hlawkna an tel a, MNF vote pung hluai si lovin Congress vote kha nasa takin a kiam a, ZPM lamin khawpui pawnah tling tur khawp member an la nei si lova, party-a inziak lut lo tamna Aizawlah ZPM an tling ta sup sup a, Aizawl pawnah MNF an tling a, hmun tam takah Congress zawk chu pathumna niin MNF chuan sorkarna an siam ta a ni. 

Kum 2017 tawp lamahte kha chuan MNF hi MNF angin an tho chhuak dawn nge dawn lo tih hriat loh khawpin an tha a zawi a, pawisa an nei tawh si lova, an mi langsar zawng zawng kha MLA pawh ni zo lovin an tla ṭhup bawk si a, MNF nih kha a zahthlak lek lek a ni. Khatihlai khan MNF mei si la de ve ve a awm a, chumi putu chu an MLA-te kha an ni a, an MLA-te kha kan hriat tawh loh takin Pu Vanlalzawma, Pu K Sangṭhuama, Pu Lalruatkima, Er Lalrinawma, Dr K Beichhua te an nih kha.

An zingah Assembly House lama che ṭha ber chu Pu Ruatkima a ni a, Pu Ruatkima taimakzia leh MNF tana a hnathawh hlawkzia kha MNF te hian an la theihnghilh lovang. Pu Ruatkima khan huaisen takin member tlem te ni chungin Congress sorkar kha a bei a, MNF tan kawng a sial a ni. Tuna MNF sorkara tlatlum tak takte hi khatih lai khan khawiah nge an awm? tih inzawt ta ila chuan sawi tur hria kan vang ang a, MNF-a awm sa leh lut thar te pawh khan Pu Ruatkima hnathawh kha chu an hre chiang ang, MNF meichher thi mai tur chhem alh tu a ni. 

Er Rinawma kha pa ṭha, pa taima, pa dik, pa huaisen leh inngaitlawm a nih thu an sawi ṭhin a, Assembly House-ah ṭhahnem a ngaih theih dan kha thlir kir leh se, MNF-te hian a hnathawh ropui zia kha an la hria ang. Hmel en chuan pa tlawm ve tak a ni a, Congress MLA 30 chuang ṭhu khat ṭhup karah khan MNF kha an tet bik a hlauva, MNF kha ding chhuak se a ti a, a au ṭang ṭang a, ṭawngkam thiam leh thusawi thiam a ni bik si lo nen a ṭan nasat dan kha ka ngaihtuah let a, Er Rinawma khan MNF thi mai tur kha a khai chhuak a, a bei nasa a ni tih chu hetia ngaihtuah let pawh hian a hriat theih a ni. 

Dr K Beichhua pawh khan Saiha (Siaha) tan ṭhahnemngai takin a bei ṭhin a, ani khan a doctor nihna hmangin thil tihin a lantir bawk a, MNF kha a ti hming ṭha nasa mai a, chhim lama MNF ṭhat vak ngai lohna lamah bu a khuar nghet tlat a, Mara fate zinga MNF chi nung tuhtu a ni. Mara politics chiri tak karah pawh MNF bu nghet taka dintu a ni ta zel a ni. Pu Zawma kha pa ṭha tak mai, pa zahawm tak mai, sawiselna tur awm lo khawpa pa ngil a ni. MLA a nih lai khan MNF kha zahawm takin a kil khawm a, MNF kha hmuhsitawm lovin eptu lamah khan a nih chhuah pui a ni. MNF MLA panga zinga minister pawh ni tawh amw chhun chu Pu Sangṭhuama a ni a, kum lamah senior deuh tawh mahse a taimak, a viak ṭhat leh a huaisen zia kha MNF tan chuan theihnghilh mai chi a ni lo a sin. 

Kum 2018 November chu kan nghak thlang ta a, MLA chu kan inthlang ta rup rup mai. Sawhthing tia au pawl ZPM in zero aṭanga bul ṭanin MLA seat riat an nei thei a, hei hi hlawhtlinna ropui tak a ni. Hei aia hlawhtlinna sang leh ropui zawk chu MLA panga an neih zinga panih ngawt an hloh chungin MNF-in a pumpuiah seat 26 an la thei a, sorkarna an siam thei ta. Congress chu dawl zawra zawrin seat panga chiah an la a, Mizo hlang awmna bial kan tih angah phei chuan seat khat pawh an chang lo a ni. 

MNF hlawhtlinna a san em em lai hian sorkarna an siam chiah chu mipuiin zawhna an in zawt ṭan ta. MNF Legislature party an siama Secretary-a an dah nghal leh Cabinet-ah pawh a pawimawha an dah ngei tura rin Pu Ruatkima chu Minister of State-ah an han dah nghal pang mai a, chutah pawh protocol-ah hnung takah an dah. Dr Beichhua pawh term khat MLA ni ve tawh, chhim lam pumpuia MNF symbol eng tak ni si kha Minister of State hna chanpual chhe takah an dah a, âng thawm a nasat avangin a hna an pek belh ve leh a, mualphothlak lutuk lo post an pe ta hram a. 

Er Rinawma mawlh hi ka khawngaih. MNF hotute khan a bialah an han campaign pui khan, “Cabinet Minister bial tur in ni,” an ti a, MNF ṭhalai President ni bawk, MLA hmingṭha ni bawk, MNF tana kum nga chhunga theihna zawng zawng hlantu khan eng Minister hna mah a chang phak lo. “Party-a senior kan dah e,” tiin an hnawl a, Deputy Speaker-ah an dah a, lawm lo chungin amah leh a bial an lawm a ngai ta. 

Party-a senior leh senior lo tih leh tehna dang dang chu Ministry ruat danah an lo hmang a nih pawhin MNF sorkar a lo piang ta a, tute nge Chief Minister bulah kala tute nge CM bulah tlatlum? tia kan inzawh chuan Er Rinawma chu a ni lo phawt. Pu Ruatkima leh amah zuitute pawhin CM bulah thla an la phak mang lova, CM bula tal tam bik riau an rawn piang ta tlat mai. Video leh thlalak social media leh news lama kan hmuh ṭhinah hian Minister of State paruk awm zingah hian Pu Ruatkima-te aia CM bula kan hmuh zin hi mi pathum vel an awm ta a, kum thum kal ta MNF dinhmun thlir ila, Hnam Runa an boruak velah khan kir leh ta ila chu, MNF dik tak tan chuan ngaihtuah a ngai a ni. 

Party hi an lal reng lo tih chu Congress sorkar tla taah khan a chiang - MLA an ngah si, eiruk thubuai leh hmingchhiatna lian tham em em awm si lo kha tla thei lovah an inngai a, an confi avangin cheng vaibelchhe tam tak sum an hnutchhiah. Sorkar leh tura an inngaih avanga an pawisa dah chu MNF sorkar tirin kawng siamna atan an hman sak vek kha a nia. MNF pawh hian an siamtu an hriat reng a ngai. He sorkar a din theihna tura thawh hlawk tak, hun leh sum thawh tute aia ngaihnep tur an ni lova, Congress aṭanga lutte Cabinet Minister leh Speaker an nih laia MNF khai dingtute Minister of State thei vak lo leh Deputy Speaker an nite hian ngaihtuah a ti thui a, sorkarna an siam hnua an kal dan zel en hian, mahni siamtu hriat loh hi a la pawi thui thei a ni tih an hriat chhuah a hun ta.