NGAIHTUAH TI THUI...

Tuna Mizoram sawrkar, MNF Party kaihhruai, Party in­nghah­­na pawh Pathian leh kan ram tan ti vei ngat hote hnuai a...  

Group C & D State Sawrkar hnathawkte thlabi hlawh pek hmasak a, Group B & A Officer te thla hlawh a thla leh kar khatna emaw vela pek leh ṭhinte hi.... a Pathian thu viauna emaw ram leh hnam, hnam tih tak hi chu anniho hian telh lo mahse telh sak hram ila. Ram ringawt hi an buaipui ang a, Mizo hnamin kan boral phah si palh ang e...) tana a ṭhat riau dan tur pawh chu ngaihtuah chhuah thiam a va harsa angreng si em...

Kan Super Minister ber, ani hi awm lo phei se chu tuna kan State sawrkar hi Total Financial Prohibition (DRY) nei mai tur hial khawpa lang, kan Ku RRRa (KU... tih hi Bawngchawm, Serchhip khaw­chhuakho chuan....Ka U tih nan, zah entir nan kan hmang ṭhin) khan tunlai a an Development Project Lungphun zawih zawih (Laying of the Foundation) te hi central sawrkar 'sum' santioned tawh sa thlap angin a sawi ve hmiah mai bawk si... Administrative Approval (central sawrkarin...chutiang project neih a remtih puina) chauh status te a lo la ni dawn nge expenditure sanction awm sa thlap tawh zawk tih pawh ngaih­tuah thiam a harsa hle. Mizoram sawrkar hi Project Report/ Utilisation Certificate siam lam chu efficient tak kan ni, mipuite chhawr tura hun chhuah final lamah erawh kan efficient lua lo thung...niin a lang. 

Chuvangin, tun­hnai a Project Foun­dation Stone an phun tawhte list leh engti takin nge central sawrkarin 'go ahead signal' an lo pek tawh tih hi kan sawrkar tlangau lam aṭanga an rawn sawifiah vat loh phei chuan ... RTI Act hmanga dil chhuah sak chi a nih hmel. November 2023 hmain ES (Expen­diture Sanction) kan hmu hman lo chiah chiah palh ang e. 

Kan Minister hian... tun dinhmun­ah pawh hian dik tak chuan central sawrkarin Mizoram tana project an rawn sanctioned tawh (read as sum pek tawh) zaa  sawmnga (50%) pawh an la hawng lo zawk...te chu a la ti ta deuh deuh va. Khua a la var loh em avang leh a la thim chhah rih em danah hian 'Zoram khawvar' kan hnaih tawh hle  tihna (khawfing chah hun lai) lo ni hlauh zawk se la aw... 

Administrative Appro­val (AA) leh Expen­diture Sanction (ES) hre hrang mipuite zingah kan tam ve tawh a nia. Tuna kan MLA/ Minister leh officer tam tak ang level emaw an aia IQ ṭha zawk leh knowledgeable zawk mipui lamah, a bikin kan ṭhalaite zingah an awm ve ṭeuh tawh tih te hi kan ram hruaitute hian lo hre ve keuh tawh se. Fimkhur ve det hlawm ang u khai.