Citizenship Bill ‘lapse’ tir theih a ni em!?

Kum 2008 aṭanga Global Economic Crisis inṭan khan vawin 2019 thlengin khawvel ram zawng zawng harsatna a la siam nasa hle. Economics harsatna karah tu nations mahin citizen pangngai bak Foreigners, Illegal Migrants, Refugees te an welcome hum hum thei tawh vek a, Citizenship pek kawngah inkharkhipna uluk zawk kawng an dap vek lai a ni. 

India Nation chhunga mirethei enkawl ngai kan tam tehlul nen Citizenship lama Pakistan, Bangladesh leh Afghanistan a chengte tana ‘Var huau Citizenship’ kawngkharpui hawn sak tumna hi, chhungril takah chuan vote bank siam duh vang liau liau a nih hmel. Political Party tinin vote ngah leh sorkar kan duh vek si a. Ngatinge- Sri Lanka, Nepal, Bhutan, Tibet leh Myanmar an tel loh!? India Union chhunga Mizote tan chuan khawchhak lam hi kan Mizo hnam leh culture inṭanna a ni. Rihdil leh Khampat Bung, Thantlang, Tiaukama awmlai etc. kawngpui lama kawngkapui in kalh sak a, in hnunglama kawngkhar in sah kuak sak tumnate pawh a ang hial alawm le! 

National Citizenship Act 1955 hi khawih danglam ni ta se, rang takin W.Bengal State a Citizenship nei lo mihring 100 lakh leh Assam State a 50 lakh bawrte vote neihna kawng a inhawng nghal ang. NE states dangten Un-Identified Illegal Migrants kan kawl ṭeuh hlawmte pawh Electoral Roll a kan thun vek a ngai dawn niin a lang. Reilote chhunga India citizen an nih theih zel tawh miau chuan...

Barak Valley- (Assam) lama Mizoram Inner Line Forest Reserve (MILFR) 509 Miles chhunga Illegal Migrants cheng zawng zawngte khu Citizenship pek an ni ang. An lokalna lam Social & Religious Documents nei lo pawhin thih hlauin ka rawn tlanchhia, eng document mah ka nei lo an ti zel thei ang, a humhim vek zel tawh ang.

Mizo ṭhangtharte tan MLFR chhung sawi fel a harsa tawh viau thei ang. Mizoram khawthlang lamah Chakma, Bru te pawh an pung sawt dawnin a lang. Huat chikima lo huat tuk nghal lam chu thuhran, a Bill hi Mizo leh NE unaute tan thil ṭul lo leh huatthla la tak a ni. 

Accords & Memorundum of Settlement hi- Naga, Punjab, Kashmir, Assam, Tripura leh Mizoramten kan Signed  hlawm a, kan lungawi lo phun vek a nih hi. Article 371 G hi Mizoram state sawina a ni, ‘G’ hmalam 371 A- B- C leh G hnungah state dangin Special Provision an nei ve duah hlawm tho a, Union Subject/ Union List chhunga Citizenships bawr hi a tel lo hlawm. Helai bawr chhampual vak hian awmzia a neih thui loh hmel. 

Dan thar emaw Dan awmsa siam ṭha tur chuan Parliament inhnih, Rajya Sabha (Upper House, The Council of State) leh Lok Sabha (Lower House, House of People Representative) ten an pass dun a ngai. Pass dun hnuah President of India-in a pawmpuia bill ni tawh lovin Act a lo ni ṭhin. Sorkar lam Union Minister, Treasury Bench MP emaw Opposition MP pawhin Private Bill & Resolution an pulut thei. 

Sorkarin Dan thar hlak emaw Constitution Amend tidanglam tura Bill a put luh dawnin a tlang theihna tur RS or LS ah an pulut hmasa deuh chawk. Sorkar lamin House chhunga Bill a put luh vote hmanga a tlang leh si loh chuan No-Confidence anga sorkar rinlohna phar tlak anga ngaih a ni. Parliament leh Assembly-ah pawh nise, sorkar Bill put luh dawnin opposition lam rilru thlir hmasak a ṭul. 

Citizenship Act 1955 pawh Amend tumin BJP chuan majority a neihna Lok Sabha-ah pulutin a Bill a Pass ta phawt a. Rajya Sabha lamah chuan Opposition Party te mitmei enin a pulut ta lo phawt a. A chhan chu RS member 250 awmtheiah tunah 245 an awm a, BJP- NDA angin member 93 chauh a nei a, Session-ah member te kal ṭha ta se, Pass tur chuan member 125 bawr thlawptu a neih a ngai. NE State ten kan duh lova Bill ti Lapse tur chuan RS chhunga pulut lo tur emaw, putluh a nih pawha House chhunga Opposition Party ten min vote tlak sak a ṭul. Vote khel tlang a, a sakhua zawnga an thlir hlawm erawh chuan Bill dang ang bawkin a tlang thei tho. 

Tun ṭum Rajya Sabha Session liam ta khan Constitution Amend a nei nual a. Reservation Quota Bill pawh kha Opposition Party ṭhenkhatin pawn lamah an dodal hlawm viau a, mahse, Bill kha member 165 daihin an yes vote leh si a. Amendment Bill panga (5) erawh an pulut ta lo a, chung zingah Triple Taqlag leh Citizenship Bill hi a tel a. Last Budget Session tun 31st January a ṭan turah hian Triple Taqlag Bill hi thlaruk atana President Ordinance Bill a nih angin a Lapse dawn a, put luh ngei ngai a ni. Citizenship Bill hi sorkar laiin RS leh LS-ah a thehlut a, sorkar lai term chhungin RS chhungah Bill pulut leh si lo se, Lok Sabha Bill pass tur thehluh tawh term chhunga Bill put luh leh loh a Lapse ang hian RS lamah a Lapse ve thei em aw? Lok Sabha pass tawh kha a valid reng ang em? Helai hi zirchian a va ṭha em, hmalak dan thiamna tur a tan. 

May thlaah Lok Sabha thar a piang dawn a, a sorkarna chelhtu chu tupawh nise, hemi hnua State Assembly Election kal chho turte, Rajya Sabha memberte term tawp hnawhkhah chhoh a, Party te Member neih danah India Politics a inher danglam chho viau ang em, kum 2024 hma chu BJP hian RS chhungah Majority neih theih dan a nei lovin a lang. 

Engpawhnise, Last Budget Session turah hian pulut lo phawt se a ṭha ber phawt a. Chumi atan chuan RS chhunga Congress Party MP 50 nei leh Party dangte hian huaisen taka an dodal tlang a ṭul. 

State khat mai ni lo, NE state 8 ten kan pawm thei lo a ni a, chuvang chuan "Citizenship Bill hi kan pawm thei lo, kaltlangpui a nih dawn chuan, NE state mipuite hian India nihna lairil kan hnaih/ ṭawmpui thei lovang" tia a huhoa nawra lungrual tlan a ngai dawnin a lang.