Ṭuan rang ṭuan fûm leh si!

MNF sorkar a piang chiah chu mi mut hlanin zingkarah Chief Minister thar Pu Zoramthanga kawngpui siam dan tur kawk vel engineer leh mithiam zawkten an thlir ṭhup a. Zu in duh hovin dan anga zu an in ṭhin chu rang em em maiin an titawp a, sorkar hnuaia zu zawrhna a tawp nghal hmiah a, dry day an puang chho nghal char char a. Tunah chuan ‘Dry Month’ an puang ta law law a, an che rang si, an ṭuan a ṭha char char khawp mai. He sorkar ṭuan rang tak mai hi The Citizenship (Amendment) Bill, 2016 chungchangah chuan an ‘duh lo’ em em ringawt a, a bak engmah an sawi zawm ngam lo thung. 

Meghalaya lama National People’s Party (NPP) hi BJP nen thawkhoa sorkarna siamtu an ni. NPP hian an campaign na lamah BJP pawisa an hmang a, Meghalaya-a Congress tihtlak hrim hrim duhtu BJP in an pui a, tichuan BJP minister-te hial NPP kaihhruaiah hian an awm a. Meghalaya hi Indian media chuan ‘BJP sorkarna’ angin an ziak a ni. 

MNF chuan BJP nena inzawm an duh lova, BJP pawisa ringa awm lo angin an insawi ngar ngar a (BJP President Dr JV Hluna chuan phai lam media hmaah BJP-in MNF-te sum hmanga an puih nasatzia a sawi thung), BJP nen in mi hran angin an lang a, pawn lamah chuan BJP nen an thawh dun loh thu an sawi. 

India hmar chhakin kan duh loh leh kan tana pawi em em tur The Citizenship (Amendment) Bill, 2016 chu Lok Sabha-in an han pass ta rup mai chu he Bill hi an kalpui zel chuan Meghalaya Chief Minister BJP thawhpuitu chuan BJP nen an thawh dunna an tihtawp tur thu leh NDA aṭanga an inhnuhdawh nghal tur thu huaisen takin a puang nghal rup mai. 

MNF ve thung, BJP nena ‘thawk dun miah lo’ ve si chuan Lok Sabha lama The Citizenship (Amendment) Bill, 2016 an pass hnuah pawh ‘an duh loh thu’ an chhuah a. He mi vanga Total Bandh chu 100%-a an thlawp thu an chhuah a, Rajya Sabha lama pass lohna tura an sorkarin theihtawp an chhuah tur thu an chhuah. NEDA leh NDA aṭanga inhnuhdawh an la sawi ri ngam lo! Hei mai hi a la ni lova, Rajya Sabha-a member pawh nei hawt lovin eng voice nge an zuk neih theih ang? 

Zu khap tura ṭuan rang em em mai sor­kar, kawngpuia fly over siam turma ni hnih thum leka Delhi aṭanga Consultancy Firm chah chhuak thei, NEDP-a hnathawh tur December 15-a sorkar lakluh hma aṭanga titawp tura vautute hian ram hnuk khawih thil, hnam tana thil pawimawh The Citizenship (Amend­ment) Bill, 2016 avang hian eng­mah hmalakna an nei ngam lova, NDA leh NEDA chhuahsanah pawh an vau ngam ve tur a ni.