KṬP General Conference-ah I kal ve dawn em?

KṬP General Conference hun a lo ni leh dawn ta reng mai. He conference hi Serchhip khawpuiah nghah a ni dawn a. KṬP member a tam thei ang ber tel turin in inbuatsaih dawn ang u hmiang. 

Inkhawmpui hautak ber mai chu: KṬP General Conference hi Mizorama khawmpui hrang hrangah hian a hautak leh sum sen nasat berna a nih a rinawm. Keima pakla hisap a ka lo chhut ve danah chuan khawmpui leh a behbawmah hian cheng nuai 220 vel lai chu senral ngai turah ka ngai. A organizing committee lam hman leh senso hi nuai 80 vel ni ta se, he mi avanga sorkar lo inbuatsaihna leh chet velna hi nuai 50 vel turah ngai ila. Mikhualte kal leh ei leh in senso hi nuai 20 dawn turah ngai ta bawk ila, kan thlen in te lo inbuatsaihna hi nuai 30 vel pawh ni se, palaite khawmpui inbuatsaihna heng thawhnaw thar leh thil ṭul dang leina te, pocket money nen chuan nuai 20 ang pawhin han chhut ila, hemi avanga kan hna kalsan leh thawh loh hlawh nen chuan nuai 20 dawn ral turah chhut ila, nuai 220 vel sen ralna turah ka ngai ve tawp. 

Mi tam tak chuan hetianga khawmpui hautak lutuk buatsaih hi tihtawp mai nise ti tawk te pawh an awm thei. Mahse, conference laia zai boruak nawmzia te, ṭhalai sang tam takten hlim tak leh nuam ti taka Pathian an fak hmel leh thusawi ropui tak tak han ngaihtlak a, item hmuh nuam leh ngaihnawm tak han hmuh a ngaihthlak chuan heti zat senga khawmpui buatsaih hi a lo la manhla viau mai tih a chiang ṭhin. Chutiang taka khawmpui buaitsaih a tel chu a nuamin vanglai hun chenna ṭha tak a ni asin. Chu Conference-ah chuan i kal ve dawn em le? 

Mizorama intihlimna pui ber a ni: KṬP General Conference hi Mizorama intihhlimna pui ber a ni ti ila kan sawi sual awm love. Khawvel thila intihhlimna ang zawngin ngai ta ila, heti zat ṭhalai fuankhawmna leh an chetla vel hmuh ringawt pawh hi a nuamin a hlimawm hran pa ve reng reng asin. Thlarau lam nunah phei chuan ṭhalai za tel teh meuhte lamtualah an han zi mup mup mai te, ṭhalai sing chuang te han zai fawn dup dup mai te, zaipawl mawi leh special items hmuh nuam leh ngaihnawm em em mai te, Pathian thu sawi nung leh ṭha em em mai han ngaihthlak te tluka intihhlimna ropui hi a awm chuang dawn emaw ni le? Chu Conference-ah chuan i kal ve dawn em? 

Inkhawmpui phawvuak tamna a ni bawk awm e: KṬP General Conference hi Mizoram chhunga inkhawmpui lian ber a nih miau avang hian thlarau lama nuam ti em em leh hlimpui an tam em em rual hian a phawvuaka lo thamral pawh hi kan tam viau bawkin a lang. Heti zat kal khawmah hian Conference laia inkhawm miah lo te, a tawp Pathian ni zan chiah a inkhawm te, inkhawm aia ṭhiante lo tlawh kual leh lo teirawlai mai mai te, thlalak vela thamral mai mai tawk lah an tam ve viau bawk. Hetiang hun hi chhungte bumna remchanga lo la a, conference kal ve hming pu a, lo rui ral ta mai mai pawh an awm ṭhin. 

He hunah hian Pathian chawimawi, fak chakna leh a thu ngaithlak chakna i nei lo a nih chuan branch sum tihek tur leh thlen in te tihautaktu ringawt chuan kal lo ngam ta che. Rui tur leh theuleu turin Serchhip kherah a ngai love, a hla mah mah. Inkhawm peih lova, a conference boruak thlir duh i nih chuan TV a en a tawk viau. Puipunna leh huau huau a telin chak saltliah a nih chuan a kar leh lawkah Chapchar kut ni hnih an lawm dawn a, lo nghak hram hram mai rawh aw. Inkhawm leh Pathian fak i peih dawn lo a nih tak zet chuan mi dang Pathian fak leh chawimawi chak te tan hmun kian ngam zawk ta che. I tel lo pawhin an kim, an hlim viau tho ang. 

Conference nuam tak ni thei se: KṬP General Conference hi a nuam a, a hlimawm em em a. Chutih rual chuan inkhawmpui ken tel thil hrang hrang hian khawmpui boruak a tinuam lo ve thei em aw ka ti. Khawmpui denchhena thil zuar tam lutuk te hi a ninawm. Kawng laia lo zuar, lei loh dawn a hrehawm khawpa zuar ang chi te phei chu tih tawh lo atan a ṭha khawp mai. Thil zuar duh an awm chuan a zawrhna tur Pandal area-ah stall fel takin siam ni se la. Pandal area-ah chuan stall ni loah sumdawnna lam tih phal lo se a ṭha khawpin a rinawm. 

Tin, khawpui lian tak chhunga hmun hrang hranga thleng kan nih dawn avangin local transportation hi ngaih pawimawh a ṭul khawp ang. Hmun ṭhenkhatah hian conference palai bus hmante tlan kual tura lo beisei ta mai te an awm a. Mahse, palai phurtu bus driver-te hian hetiang hi an chak vak lova, hahdam leh chawlh ve an chak emaw ni aw tihtur a ni. Chuvangin, palaiten conference nuam leh hlim taka kan hman theih nan local transportation lam hi a hranpa a uluk taka ruahman a ṭul dawnin a lang. Conference palai lo kalna bus beisei ngawt lova, a thlengtu lam aṭanga local transportation tur hi buaipui fel mai hi thil ṭul tak niin a lang. 

Palai thlen in sem hi thil har tak a nih hmel. A ṭhen laiah an buk laiin a ṭhenah hian mikhual nei mang loten an lo awm bawk ṭhin. Palaite pawhin duhna lai leh chhungte bulah chauh thlen tum lovin, hmelhriat loh ina thlen hi hmelhriat thar siamna zel a ni tih hriain min dahna a thlen mai ngam hi mawi fo. Reception committee lam pawhin khauh tak leh felfai taka mikhual kan sem ngam a ṭul. A nih loh chuan mi ṭhenkhat thuawih zawkte hi mi ṭhenkhat luhlulte avang hian hrehawm deuhin kan siam thei a ni. Mikhual ngah vak tum pawh hi ropuina a ni lo, mikhual kan in sem zai hian mikhualte nuamsa zawka kan siam theihna a ni tih hria in sem rual tlan hi thil ṭul tak a ni bawk awm e. 

Conference nuam, hlimawm leh hlawkthlak tak hmanga Pathian fak a, chawimawi a, a ropuina chang za turin Serchhip-ah kan in hmu dawn nia u.