Zoram, harh rawh, i tlai ang e (Kei chu ka ngaih a Ṭha miah lo)

Lungmuangin kan ṭhu churh mai hian a lang a, amah Pu Clement Liankunga (IAS Rtrd.) ṭawngkam takin, Citizenship Amendment Bill 2016 hi, Parliament ṭhutkhawm, Feb ni 22-23 velah an sawiho leh dawn. NDA  hian Rajya Sabha-ah majority nei lo mahse by hook or by crook-in pass an tum ngei dawn. Joint Parliament sitting pawh koh an hnialin ka ring lo. Bill an pass hma ngeia tih theih kan neih hi, chet ve rum rumna hun a ni. Bill hi pass a nih chuan a tuar nasa tur chu North East kan ni, Mizoram hian kan tuar nasa lehzual thei bawk. Kan dinhmun tur hi uluk lehzualin i han thlir teh ang. 

Bill pass duh chhan: India ram hian Independence a neih hnuin, Muslim lal ram, Pakistan leh Bangladesh chu ṭhen hranin an awm a, India chu Hindu lal ram anga ngaih theih a ni ta. India ram chhunga Muslim la chambang leh lo pem lutte chu an pung chak em em a, Hindu leh sakhaw dang mi changkang chinten birth control an uar laiin Muslim chuan nupui tam tak neih theih dan an nei a, tunah hian sakhaw lian ber dawttu niin 14.2% an kai hman tawh. An pun chak em avangin, chumi lo do let tur chuan, ṭhenawm ram, Pakistan, Bangladesh leh Afghanistan aṭanga Muslim ni lo India rama kum 6 awm tawh chu, khua leh tui nihna an dil theihna dan siam an duh ta a ni. A tir chuan Kristian-te pawh an telh lo a, a hnuah hnialna a awm avangin, an telh belh leh a. A tak takah chuan Hindu leh Buddhist ho bak khua leh tuia ziahluh tur an awm vak lo ang. 

Peace Accord kha: MNF leh India inremna kha kan himna tur angin kan inthlamuan a, hei hi inthlamuanna tling a nih theih tawh loh hmel. 

India Constitution Part XI - naah sorkar laipui leh state inlaichinna chungchang a chuang a. Art 246 behchhan a chanvo insem dan kimchang chu Schedule 7 ah ziakchhuah a ni a, union list, state list leh concurrent list tiin. 

Citizenship chungchang hi Union List niin number 17-naah a chuang vang mai a. State-in tih theih kan nei lo. Parliament-in dan a siam ang a, state tinin (J&K tih loh, anni hi chu Constitution hran hlak nei an nih avangin a huam ve lo) kan zawm dial dial tur a ni. Chu chu India ramchhung kan ni ngei tih lanna a ni e. 

Engatinge Mizoram?: Bill hi pass a nih chuan Mizoramin kan tuar nasa thei ang kan tih chhan chu, ram venhimna dan khirh tak kan neih lai pawhin, Bangladesh aṭanga Chakma lo lutte kan ven hneh lohzia leh, kan politician-ten duhsakna uchuak nen Minister nihna hial te an lo hlan duh zel a. Chakma-te hi khawvelah ram neih mumal an la nei lo, Mizoramah chuan CADC hial an nei tawh, khua leh tui la ni lote hi, India mi an ni vek tawh ang a, chu dan chuan, a ruka lo luh belh zel a ti châk zual dawn bawk. 

Chakma MP kan neih hun pawh a thleng thuai ang, CM hial pawh an nei thei ang. Kan ṭhenawm Manipur-ah hnam tlem zawk Tangkhul Naga hnam Risang Keisingh CM atan hun rei tak an hmang tawh, keini pawh hian chutiang hun chu kan thleng lo vang tih sawi harsa tak a ni. 

Chakma zingah Mizo aia lehkha thiam pawh an awm nuk tawh. Tunah pawh MBBS seat chu kum tin mai min chhuh buai tawh a nih hi. Tun dinhmun mai thlir suh, kan tu leh fate lo awm zel tur kum 20 pawh a ral hma hian, kan duh loh thil hi a thleng thei asin. 

Kan darthlalang: Ram hruitute chetsualna avangin kan ṭhenawm state-te chu, a ram neitu zawk nek chepin an awm tawh. Tripura chu Reng Lal khan Bengali nupui-ah a nei a, Bangladesh aṭangin, Bengali an lo lut chur chur ta mai a, hnam fing zawk an nih vangin, a ram neitu zawk chu kawng tinrengin awp behin an awm tawh. Manipur pawh, an ram Lal-te unau inkarah lal inchuhna a awm a, a naupang zawk chuan indonaa ṭanpuitu turin, Cachar Bengali punin, Manipur-ah an hruai lut ṭeuh mai a. Indo a reh hnu pawhin, chung Bengali ho chu an chambang ta zel a, Pangal tiin an ko a. Tunah chuan Pangal hi chu Muslim vek an nih avangin, an inthlah pung chak khawp mai a, tualchhungah pawh buaina an tawk ta fo mai a ni.

Kan ṭhenawm state te hi, sumdawn­naah Vai kan tihte awp behin an awm vek tawh a, he dinhmun hi kan hlat bik miah lo. Khawvel ṭhang zelah dawr lian leh ropui tak tak, Mall kan tihte a lo piang zel a, kan ramah pawh hengte hi a lo lut ve zel dawn, a neitu chu Vai an ni zel ang. Mizorama Vai tam tawhziate hi kan mitin kan hmu vek a, dan anga awm chu a chanve vel chauh an ni hial ang. 

Chet lak a hun: Bill pass a nih hma hi kan golden chance a ni. Dan lekkawh theih kan la nei, Dan lo a kan rama hnam dang awm dap chhuah hun lai tak a ni. Tunah hian thawm engmah kan nei lo a nih chuan, Mizoram hi lo pem luh nan an zuam nasa hle tawh ang, dan tlawhchhan tur kan neih lai hian, hnam dang tana Mizoram hi nelawm lova kan awm theih nan, beihpui i thlak ang u. Buaina siam ang kan ti lo, dan lova awmte dan anga khawrh chhuah a hun kan ti a ni. 

Mizo nationalism chawisan duhtu, puan venga thangchhuah puan ha, Home Minister kan nei a ni lawm ni? Dress-ah chauh chuan tawp lul suh se. Kan ṭhenawm state-a mite chuan, ram himna duhin, mipa rualin saruakin kawng an zawh hial laiin, keini ve chu kan NGO te koh harh an la ni lo. Keini lungmunga kan awm der der laiin, Bru ho pawh electoral roll-ah dan dik tak zawm lovin an la lut a, kan harh chhuah hun meuh chu a tlai leh tawh. 

Hetiang hian Mizote hi kan tlai zel chuan, ṭhangthar lo la awm turte hian min dem ngei dawn. Harh a hun, kan duh loh hi kan tawng chho zel dawn. He thil hi insawiṭhainaah i ngai lo ang u. Zoram, harh rawh i tlai ang e.