Kohhran Zaipawl ka hmuh dan

Mizoram chu Kris­tian ram tih theih khawpa Kristian tam­na ram a ni a, Koh­hran pawl hrang hrang za dawn lai awmna a ni. Zaipawlte hi an pawimawh a, thla­rau lam nun chawm­tu an nihna a awm a, Kohhran ni pawimawhah te, Kohhran programme dang dang- Inkhawm­puiahte inkhawm tipuiphutu leh prog­ramme tifamkimtu an nihna lai a awm. Chuvangin, insiam that tul an ti nge ka hre lo va, ka hmuhdan sawi ka tum a ni.

Zai na na na chu an thiam a, tun laiah chuan uniform te pawh an nei deuh vek ta, an hmuhnawm a, mit an ti tlai ta hle a ni. Amaherawhchu, mite thlarau lam chawmtu aiin nuih tihzat zawk mahna laite pawh a awm ta em ni aw ka ti deuh.  Intihchangkan kan tum ta lutuk nge, nge kan thlarau lam nun chawmna hi a dang ta tih pawh hriat a har ta hle a ni. 

Inkhawm prog­ramme-ah zai turin Chairman-in a han sawm a, an han zai ta a. Zaipawl hla hi chuan part hrang hrang ( Air, Contralto, Tenor, Bass) a awm a. Chuti chung chuan hla chang dangte kha an insak chhawk a ni ber. A chang chuan mi pakhat chauhin a han sa a, a chang chuan hla thu pawh ni lo hian a han kuk vel a, nuihte pawh a za thei hial thin. 

Heng bakah hian Kohhran Hlabua mi pawh an duh duhin a thu an tidanglam a, an thluk kual kawi vel bawk a, miin chu hla chu an lo tahpui hial kha nuihzat thlak a chang ta hial a ni. Engtin nge ni zel ang le?

Tunhma deuh khan zaipawl thenkhat mite thlarau  lam nun chawm em emtu an awm a, an tahpui hial thin a ni. A bik takin Bawngkawn Pastor Bial Zaipawlin 'Puan Var Sin' tih hla an han sakte kha chu thehngilh a har hle ang. Chu bakah Pu Buangliangkunga ho (ICI) khan an han zai ve a, Zaipawl member zinga mi pawh tap zawih zawih leh taksa chetnate pawh dawng nghal hialte pawh an awm a nih kha. Khangte kha an va ngaihawm em!

Tunah chuan Zai­pawlin Kristian Hla­bua mite an han sa a, a thluk leh thute hi an sawisa ni ta berin ka hria. Kan hlapui hlui Halleluiah Chorus tih te leh a dangte kha a ngaihawm dawn ta. Hetianga kan Zaipawlte hi an kal zel chuan kan hla hlutna hi an tinep zel dawnah a ngaih theih hialin ka hria. Music lam pawh hi han sawi kai ila. 

Music ring lutuka, Zaipawl zai hliah theih khawpa an han play vel phei hi chu, ngaihnawm aiin ninawm a kai thei hial a ni. Chuvangin, kan Zaipawl, solfa leh zai thiam, aw mawi leh tha tak tak neite hian, an kal zel dan turah hian mite thlarau lam nun chawm thei zawng leh an sak chhan tak Pathian ropuina ni thei ngei turin rilru siam thinse tih hi ka lo ngaihtuah ve thin. 

Chuvangin, mite thlarau lam nun chawm thei zawngin kan zaipawlte hian tan han la sauh sauh teh se tih hi ka han sawi ve a ni e.