Kum thar 2019 kan chuangkai ta le!

Tunah chuan kum thar 2019 kan chuangkai ta. Kum tharah sorkar thar nen bul kan ṭan dawn ta chu a ni a, beiseina nen he kum thar leh sorkar thar hi i lo thlir phawt mai teh ang u. Nikum inthlan dawna party hrang hrangte thutiam kha kan la hre reng ang a, tuna kan sorkar thar hrawn tur pawhin intiamkamna engemaw zat a nei tih chu kan hre ṭheuh ang a, khangte kha beiseina nen i lo thlir teh ang u. 

Hei tuna a lan dan maiah chuan kan sorkar thar pawh a intiamna chu hre hle turin a lang a. An sorkar aṭanga kar hnih vel a vei tih lekah kawngpui chhia siam ṭhat dan tur thlirin kan hotu pa ber pawh a fehchhuak nghal a, tin Aizawl khawpui lirthei tawt lutuk tih ziaawmna tur a an lo intiamna, ‘kawng chhawng’ siam dan tur enin, Delhi tlang lama mithiamte nen an en nghal rup rup mai bawk a. Zirna sikul lama zirtirtu indaih loh lutuk phuhrukna tur pawhin hma an la nghal ni a hriat a ni bawk. Kawng dang dangah thla khat em pawh ala vei hma, kut pui hman lai la lain thuthar lawm awm tak tak hriat tur a awm tawh bawk. Tunah hrih chuan mipui tan pawh beisei a sang hle mai. 

Hetiang a nih rual hian mipui lam pawh hian tih tur leh zir tur kan ngah fut awm e. Tun hma kan sorkar hrawn tawhte reng reng kha a siamtu mipui lam hian kan thiam lo ṭhin a, ram leh khawtlang lam ngaihtuah hmasa lovin, keimahni duh dan leh kan pumpui lam hnawhpuar nana hman tumin kan nawr buai lutuk ṭhin a, chuvangin sorkar pawh a kal tum dan anga kal hlei thei lovin kan siam ṭhin a ni. Khatiang anga nawr buai lutuk kha tum tawh lo ila a ṭha hle awm e. Party worker kan nih vanga hlawk pui tum lutuka kan kal ṭhinte pawh kha sim ila, thingtlang lamah pawh mahni party mite duhsak lutuk a, khaw eng pawh zahna nei map lova kal kan chin ṭhinte kha sim a hun ta hle mai. Chutiang ni lova, a ngai te bawka kan kal leh chuan tun kan sorkar thar, hna thawh tum tak tak anga lang pawh hi kan kal sual tir leh mai ang tih a hlauhawm hle a ni.

Kan sawi ta sa sa, sawi zel mai teh ang. Kum a thar ta bawk a, sorkar thar flagship Programme (SEDP) pawh hi a kalpui ṭan turah dah ila. Sorkar hmasain NLUP a kalpui ang mai kha chuan a kalpui lo turah dah phawt mai ila a ṭha awm e. NLUP kha zawng a dawng tur emaw a hlawkpui tur emaw nih tum tan chuan Party a inziahluh hmasak kha a ngai tlat zel a, tin, party mi tan lo chuan vana rah ang mai kha a ni. Hna thawk hauh lo leh hmalakna nei hauh lo pawh kha thingtlang lama NLUP endiktu leh viltu party unit hruaitute khan hma la thaah an report zel a, tichuan a lo thlawnin pawisa sum tam tak tak an inpe zung zung mai zel kha a ni a. Khatiang ang mai mai kha chuan an kalpui ve lo turah lo beisei phawt mai ila a ṭha awm e. 

Thingtlang khuate ro inrelna, village council tih­chaka tihphuisui an tumna te hlei hlei hi thingtlang lam mite hi chuan kan lo nghakhlel em em a ni. Session hmasa berah ngaihtuah nghal tur niawm tak khan sawi a ni lehnghal a, chuvangin thingtlang mipui hi chuan nghakhlelin, ding­dihlipin kan lo thlir mek a ni.

Kan sawi hmaih hauh loh tur leh kan suangtuahna luah bertu chu inthlan dawna party tinte inzawrhna han thlirin MNF party kha mipui tam berin kan ring a, hneh takin kan thlang tling ta kha a ni a, chuvangin kan beiseina leh kan rinna kan pek ang ngei khan sorkar thar pawh hian hna thawk se tih hi a ni. 

Kum thar kan chuangkai ṭan chauh a la ni a, mahse mipui tam ber hi chuan sorkar thar pawh hian hna thawk nghal a, hma la nghal turah kan beisei tlat a, a hmalakna pawh hmuh nghal mai theih turah kan ngai tlat a ni. 

Engpawh ni se mipuite pawh hian kan sorkar tharin hna a thawh tak tak theih nan Pathian hnena kan dilpui a, a fuih ṭangtu leh thurawn petu nih kan tum ṭheuh hi kan tih tur tak zawk a nih hmel hle. Kan minister-te leh kan MLA-te pawhin mahni pumpui aia ram leh mipui dah hmasa turin beisei ila, chutih rualin keini mipuite pawh hian mahni hamṭhatna ringawt ngaihtuah a, dik mang lo pawha hamṭhatna dawn tum lovin, a sorkar zawk thurawn petu nih i tum teh ang u. Kum thar a nih ang ngei hian ram hmel thar hmuh beisei takin i thlir tlang vek ang u.