Aw Zoram i tan ka thawk ang

Khawvela sawrkar chak leh ropuite hi a tirah chuan an ram an ngaihven ṭha a, an ram an hmangaih a, an ram tan hna an thawk nasa a. Chuta ṭang chuan a chhunga chengte an lo ding chhuak thei chauh ṭhin. Keini pawhin Zoram hi hmangaih ila, ngaihven ṭha ila, ram tan nasa taka hnathawh a va hun ta em. 

Kan ram hi tlang­ram chhengchhe tak a ni a, mahse hei lo chu ram dang kan nei lo. Kan ram hi kan siam ṭhat hma chuan a chhunga chengte hi in ṭanpuiin in dawm­kang ṭhin mah ila, pialtlep chunga In sak ang chauh a ni. Zoram chhunga chengte hi thiamna lamah te, sakhuana lamah te, politics leh khawtlang nunah te, eizawnna kawngah te kan changkang tawk ta viau mai. Mahse, kan chenna Zoram hian ngaihsak a hlawh lova, hmangaihtu nei lo ang maiin, enkawl ṭhat a ni lo; a pawi hle. 

Eng vangin nge ram hruaituten rei tak ram an enkawl hnuah pawh Zoram hi siamṭhat a nih theih loh? tiin ngaihtuahna i hmang ang u. Sawrkar tharah hian ram hruaituten Zoram hi a siamṭhat hna an rawn thawh nghal mawlh mawlh a hun ta. Ram chhunga chengte hian kan ram hi kan ṭhan khalh zo ta. Min enkawl zuitu tur leh kan innghahna tur kan ram hi a retheih tlat avangin a tawpah chuan retheihna hmunah bawk kan tlu khawm leh ṭhin. 

Kan ram aia chheng­chhia thlaler ram Israel ram pawh a chhunga chengten an ngaihven ṭhain an enkawl uluk a, chumi avang chuan an ram chuan a mi chengte thawh sen loh leh ei sen loh a rawn pe chhuak ta zawk a ni. 

Kan ram chhunga chengte ngaihven hmasak aiin kan ram neih chhun ngei hi ngaihven hmasa ila, enkawl ṭha ila, chu chuan kan ṭhalaite pawh hna thawh sen loh a rawn pe chhuak dawn zawk a lo ni. 

 Kan ṭhalai thiamna hlu tak tak neite chu Zoram hian hman ṭangkaina a neih miau loh avang hian state dangin an thiamnate chu an lo chhawr ṭang­kai zel zawk a. Mi ram­ten hmasawn nan an lo hman phah a. Heng ṭhalaite thiamna hi Zoram hian a hman ṭangkai ve theih hunah kan ram hian hma a sawn ve thei chauh dawn a ni. Kan ṭhalaite thiamna leh Zoram hausakna a inchhawr tawn theih hunah chuan Zofate hi kan lo parvul ve tawh ang a. State dangte chu um pha mai rih lo mahila, reiloteah an rualin ke kan pen ve thei ang. 

Tunah chuan Zo­ram hmasawnna tura kum tin central aṭanga chhiar sen rual loh sum lo kalte chu a ram chhung miten duh tawka a neih hnuah, a kuang bang chu ram hmasawnna tur atan hman a ni chauh ṭhin. Thangtharte chuan rual u, Politician te hian tih dik loh rah an seng mek a ni. 

Ṭhangtharten ram hruaitu kal tate thil tih dik loh hi an la rawn dem dawn chauh a ni. Chutih hunah chuan nang leh kei hi kan lo tel ve a nih chuan a zak tur leh a inchhir tur chu kan ni ang. Chuvangin, nang leh kei atan ni lovin, kan tu leh fate tan zawk hna thawk ila, chu chu a lo puitlin hun chuan kan ramin hma a sawn ve tawh ang.