Damlo thisen mamawh harsate tan kawl a êng ta

Dt. 10.01.2019 khan Chief Minister Pu Zoramthanga hova Council of Ministers ṭhukhawm chuan sorkar recognised blood bank (State Blood Transfusion Council-in a pawmpui blood bank) a thisen hman dawna a hmangtu turten blood processing fee unit khatah Rs. 550/- an chawi ṭhin chu a titawp a. 

Health Minister Dr. R. Lalthangliana chuan he thil hian mirethei leh harsa zawkte chu nasa taka a chhawk zangkhai tur thu a sawi.

He thu chhuak hi hman nghal tura tih a nih avangin, tun aṭang chuan engmah sum senso awm tawh lovin midang tana thisen pe phalten a thlawna an thisen pek chu a thlawn vekin damlo mamawhten an dawng thei ta a ni. 

Kum 2015 aṭang khan sorkar hmasa Congress Ministry chuan a thlawna thisen sawngbawlna dawn ṭhin chu kum laklawhah titawp thutin a leia lei a lo ngai ta a. Sorkar enkawl damdawi in blood bank neiteah thisen mamawhtu tan zaa 75 vel chawi sakin a mamawhtuin zaa 25 vel a tum a lo ngai ta a. 

Thisen pek chhuah manah hian processing fee, blood bag leh test kit vel atan unit khatah Rs. 550/- lak ṭhin a ni a, kohhran enkawl Hospital-ah chuan Rs.1400/- vel lak a ni thung. 

MNF party hian opposi­tion party an nih lai khan an sorkar hunah blood processing fee tihtawp a nih tur thu an puang ṭhin. December 2018 a sorkarna an siam hnuah an thu tiamah ding nghetin thla khat pawh a ral hmain Cabinet-in thutlukna a siam thei hi a lawmawm tak zet a. Blood processing fee lak tihtawp a nih avang hian kum khata sorkarin sum a chawi tur chu cheng nuai 200 aṭanga 300 inkar vel a ni. 

He sum tur hi Health Minister chuan Budget Session hmasa berah khung a nih tur thu a sawi a ni. 

He thil hi MNF sorkar tirh phata an hmalakna chan­chin lawmawm tak a tling a. Mi khawsa thei zawk, phai lam damdawi in pan thei ṭhinte tan chuan thil ropui tak chu a ni lo mai thei. Mahse, thingtlang leh khawpui mi pawh neihlung khawnga thi chhawnga damna duha damdawi in pan ṭhin thisen mamawhte tan chuan a lawmawm lehzual. 

Chubakah, a thlawna thisen pek, voluntary blood donation lamah hmasawnna a thlen phah ngei bawk ang. Miretheite tana chak tak leh huai taka hma la nghal ngam MNF sorkar leh Health Minister hi tu pawn lo fak mawlh mawlh pawh ni se, a mawh lo ve.