Written by
Lalmuanpuia
Chapchar Kut sum zozai kha
Mizote kut pui Chapchar Kut hman danah khan sum chet vel dan The Frontier Despatch chanchinbuin a rawn ziah chhuah kha kan chhiar chuan rilru a na vawng vawng a. Kumin Chapchar Kut hi chu kan hman dik tawh beiseina nen, nikuma sum hman danah khan tunge a pawisa kha 'hlêp'? tih hi mipui zawhna a nih ka ring.
May 28, 2018-a TFD chanchinbu thuziak kan chhiar chuan, "Chapchar Kut 2018 Mizoram hmun hrang hranga lawm nan cheng nuai 72 tling thelh sen ral a ni a, kut huaihawtna sum sen zat leh sen dan nia Art & Culture Dept-in a chhinchhiah dan, TFD-in a haichhuah behchhanin Organizing Committee-in sum hman ral audit a rawt a, committee-in a pawm a, hei hi Chapchar Kut hman tawhnaa sum hman audit ṭumkhatna tur a ni.
RTI Act hmanga TFD-in sum hmanna receipt leh voucher photocopy a dil erawh Art & Culture Department-in a pe thei lo thung," an han ti mauh mai a, sum hmanna pawh an ziak fel lo tihna a ni.
TFC thuchhuah hi an website-ah a la hmuh theih a la ni: “Chapchar Kut 2018-a hmanral Rs 71,93,550/- a ni a. Hemi hi Art & Culture Department chuan a pe chhuak vek a, Amaherawhchu hmanralna cash memo/vouchers engemaw zat Art & Culture chuan a la dawn lova, chung zingah chuan Central YMA Office gate siamna te, CYMA leh Aizawl Taxi Driver te inhmuhkhawmna senso, Car Flag siamna leh CYMA le kaltlanga Branch 91 hnena pek Rs 7,28,000/- (cheng nuai sarih sing hnih leh sang riat) pawh a la tel a ni. Chuvangin, tun dinhmunah chuan receipt photocopy i rawn dil hi Department chuan a pe thei hreih lo che a. Kan harsatna hi min hriatthiam kan beisei,” tiin RTI dilna hi department chuan a chhang."
TFD tarlan angin sum hmanna rinhlelhawm an han thur chhuak a, Chapchar Kut 2018-ah khan generator Rs. 8,55,000 in an lei a, hei hi organising committee hriatpui loh a ni. Lammual khuhna awm sa khuh manah Rs 30,000/- hman a ni! Mikhual thlen nan cheng nuai ruk leh cultural dress lei nan cheng nuai hnih sen ral a ni a. Cheraw kanna atana Phar-Mau leina atan cheng nuai khat! Lammuala Chapchar Kut hmanna ah khan stage leh thil dang siam nan (stage construction etc) cheng nuai 2.20 sen a nih bakah a chei (stage decoration) atan leh carpet phah nan cheng sing nga ve ve hman a ni!
Chapchar Kut 2018-ah hian sound hman manah cheng nuai 5.10 sen a ni a, sound hire tur hian quotation chhuah a ni lo. Aizawla ni hnih chhung Chapchar Kut hman a nih khan refreshment-ah cheng nuai 2.50 hman ral a ni - mi pakhatin cheng 300 chuang man refreshment an ei tihna a ni!