BEISEI BO LOVIN

Basket chhunga apple sawm awm zinga pakhat ṭawih a lo awm hian sawi chhiat leh thinhrik a hlawh a, a ṭha dang pakua te eitlakna kha a hliah thei fo. Chutiang chuan Mizo ṭhalai te zingah pawh zawmthâw leh nu leh pa neih ringa inchhekarbâwm hote hian rim taka lehkhazir ṭhalai te leh zir zo tawhte’n engemaw nih tuma an beih nasatzia hi a hliah khuh fo mai. Chuvangin kan mit kan len zau deuh pawh a ṭha awm e.

Nia, sawi tur ting chuan ṭhalai tam tak hi chu tum mumal pawh nei lova changpat cheh chhum an sawi ang maia tâl mai mai, mobile leh computer khawiha tlaivar deuhthaw-a zinga thawh nachang hre lo hi an tam khawp mai. Mitthi in leh thlanlaihna lama taima tak inchhung lama chhawr tlak miah loh pawh an awm ang. Heng ho te hian thil ṭha leh nuam, khawsak changkang chu an hre ve tho si a, mobile phone pawh an duh changkang ve tho va, len vel nan a thei fa chuan bike an tlawh puak pawp pawp a, tih tur mumal nei si lovin kawngdungah an tlan puat puat a. Hengho hmuh hi chuan  thin a tâwt thei a ni. “Ka birthday-ah ṭhiante chaw eiah ka sawm duh” ti-a nu leh pa phalna pawh dil chuang lova prog siam mai, a senso tur nu leh pa te dil leh si te hi engzat tak awm ang maw?

Chutih lai vek chuan ṭhalai zingah mahni thiamna- a tê emaw a lian emaw hmanga nun khaw chhuah tum hi kan hmu ṭeuh tho vang. Tlangval dik tak lumehna dawr siam te, ban khur laiha inhlawhfa te leh tlangval lehkhathiam thir workshop (steel fabrication) dawr siama a kotu apiang hnena kal peih te pawh an awm ṭeuh mai. Unauva pindan zimte luaha a nau zawkin lehkhazir a, a u zawkin nitin inhlawhna zawng pawh an awm ṭeuh mai. Khawi company emaw-a marke­ting lam zira lehkhabu rawn zuar te hi vawi tam ka hmu tawh. Heng­ho hi zahawm ka ti ngawt ṭhin mai.

All India Service emaw State Civil service emaw-a tlin tuma bei ṭâng ṭâng hi za tel an awm tih hi ring bawk ila. Kei tehlul pawh hi min rawn kawma Civil Service kalkawng min rawn zawt lekhathiam nula leh tlangval hi an awm leh zauh ṭhin a. Civil Service coaching Centre hrang hrang-MYC, JP Career point leh CHASE IAS Academy ah te thusawi tura sawmna te pawh ka hmu ṭhin. Chubakah College hrang hrangah civil service chungchang sawi tura sawmna ka hmu fo bawk. Heng hmunah te hian nula leh tlangval lehkhathiam tak tak, hmel pawh zahpuiawm lo tak tak ten engemaw nih tumin tih takzetin an lo bei a ni tih ka hmuh khan “Kan lo chhe vek hauh lo” tiin ka rilru ka siam ta a ni. Chu mai bakah technical line lamah pawh kan ṭhalai lehkhathiam te hian nasa takin ṭan an la reng a ni tih hi kan theihnghilh lo bawk tur a nih ka ring.

Chuvangin tum mumal nei lova tei mai mai te chu lo awm bawk mahse, kan lehkhathiam ṭhalai nâwlpuite hi chuan mahni ke-a din chhuah an lo tum khawpin ka hria a. Tunlaia Central Civil Service lama lut kan awm ta mang lote hi kan vei deuh avanga ṭhalai zawng zawng dem chiam hi kei chuan ka thanatpui deuh a ni. An hun a la thleng rih lo maiah ka ngai. Eng ang pawhin Mizo te hi changkang ila zawmthaw deuh leh hman tlak mang loh hi chu kumkhuain kan zingah an awm reng dawn. Icon, Idol leh music video atchilhtute hian heng thil hi buaipui lo mahse civil service lam an tum chuang lo reng reng ang. World Cup Football champion emaw niin, India ram PM hial ni thei pawh awm mah ila, Mizo te zingah hian ṭhalai lehkhathiam leh thiam lo te pawh rui ral mai mai leh nu leh pa te tana parasite hi za tam kan kawl reng dawn tih hi hriat a ṭha ang. Eiruk hmang tlemte hian mi rinawmte hmel a ti mawk thei ang hian ṭhalai zinga a sapatâl  ho hian tih takzeta din chhuah tum an ṭhalaipuite  hmel a  tichhe ṭhin a ni. Khawvel kalphung a ni. Heng apple ngêt ho hian a ei tlâk ho hi hliah bo lul suh se. India ram pawh hi khawvela ram ṭhang chak ber a nih laiin BPL-a awm kan la ngah em hi maw! Chutih laiin thlâa inkah kai kan sawi ut ut thei tho a ni. Mizote tan pawh beisei a la bo bik lo ve.