Written by
- Mazualtea
Mission Veng
MNF campaign thu a inkalh (Ruling AMC neih kher a ngaih hmel loh)
Aizawl Municipal Corporation inthlan lo awm tur atan party an campaign chho ta mar mar a, tun ṭum chu kil thum aṭangin AMC rorelna an inchuh dawn a ni. Campaign dan thu ngun taka lo chhiar kual hian state sorkarna changtu MNF hi anmahni thu leh thu a inkalh a, a invaw chhe tawk chiah chiah tlat avangin campaign dan ki thar an neih leh a ngai a ni.
Campaign dan 1: MNF an han ṭang tak tak a, AMC lama an tlin ngei theihna turin "Ruling party thawh pui theih ngei hi thlan tur, ruling nge nge thlan tlin a pawimawh a ni.
Ruling lo thlan tlin chuan hna an thawk chak thei lo. State sorkar thawhpui theih tur hi AMC ah chuan thlan tlin tur an ni a, ruling ngei lo chu an ṭhat loh thu hi an campaign au hla a ni.
Campaign dan 2: MNF bawk hi an ṭang khawp mai a, AMC-a MNF hnathawh chu chhuang takin an tilang a, "AMC term kal ta chhunga MNF Councillor hnathawh hi en ila, heti taka hnathawk nasa leh thawk ṭha an nih avang hian thlan tlin leh ngei an ṭha ang. MNF chuan AMC sum hmangin heng hmasawnna te hi an siam a ni," an han ti a, a video siamin an theh darh bawk a. AMC-a hnathawk ṭha MNF chu thlang tling leh turin an ngen ta a ni.
1 leh 2 a inthai chhia: Campaign dan No. 1 khi kan en chuan ruling party ngei thlan tlin loh chuan hna a thawh theih lova, chuvangin mipuite chu ruling party MNF bawk hi AMC lama thlang tling leh turin an ngen a, mahse MNF bawk hian thil chhut kim loh an neih chu an campaign au hlaah No. 2 lamah hian an hnathawh ṭhatzia sawiin AMC ah MNF bawk thlang tling leh turin an ti ta a ni.
AMC lama MNF an sorkar chhung khan state lama sorkar chu Congress daih an ni. Chuvangin, AMC ah hian state sorkara ruling kher thlan tlin an ngai lo tih chu MNF bawkin an puang ta a ni.
AMC a MNF campaign thu puan chhuah aṭanga thil lang chu, "AMC lama ṭha taka hna thawk turin ruling nih kher a ngai lo," tih hi a ni ta a ni. Hei hi midang sawi ni lovin MNF campaign au hla ngei a ni si a, anmahni ngeiin AMC ṭha tak nei turin ruling party thlan kher a ngaih loh thu hi an au pui tih an inhre lo ve thei tho bawk a ni.