AN SULHNU LEH KAN HMABAK

Tehna hrang hrang a awm a, tehna zawng zawng laka fihlim mihring hi a awm theih lova; mahse, tehna ṭhenkhat kan hman tlanglawn leh langsar tak tak lak aṭanga inteh pass erawh a theih a, mi te ber aṭanga a lian ber thleng hian kan hriat leh hriat loh lam chu thuhran nise tute pawh hi teh vek kan ni. 

Keini'n kan pass em tih lam aiin min tehtute lak aṭangin kan pass em tih hi a pawimawh zawk a, chu tehna kan sawitum ber chuan mi ṭhenkhat teh ngun bik a nei a, tehtlin an harin a tehtute tan pawh teh thiam an ngai hle mai. Chung mite chu tudang ni lovin politician kan tih te, ram hruai hna thawk mek leh thawk tawh te, lo la thawk turte nen lam hian kan teh vek a. An tling em tih erawh mipui chhannaah a innghat thui hle. 

Football-ah chuan club hotute'n an club a khel tur player an lei ṭhin a, player lei tur zawngtu ṭha neih a pawimawh hle a, a tlangpuiin kum upa te hi chu man to takin an lei lem lova, a thlawna lakluh emaw, an lei a nih pawhin a man tlem zawk leh hlawh pawh tlem zawk hlawh turin inremna an siampui ṭhin a, club tana theihna a hlan dan turte fans te tana club ṭan tinuam thei khawpa theihna nei a ni em tihte pawh thui tak a hmuh lawk theih a, chuvangin player lei chungchangah club te an fimkhur hle ṭhin. 

Naupang zawk leh hma­bak eng tak nei, an nih piah lamah theihna sang tak nei te, an club khel meknaah eng anga ṭha nge sulhnu an neih tih te thlir chungin club chuan player an lei nasa in an en thlithlai nasa bik hle. Hetiang deuh hian kan rama politician-te hi rem lo chung chungin tehkhin dawn ila, football ang lo takin politics-ah chuan kum upa lam kum sawmsarih val pawh an la khel ṭha thei viau mai, hei hian naupang zawkte tan luhchilh ve dawn pawhin kawng an dang ping thui thei hle. 

Politician ṭhenkhat chu ram leh hnam tan hnathawh kawr min dil a, kan pek pawhin kal chhuakin an thawk peih meuh tawh lo, ṭhu chunga ṭhutthleng vir thei ban vuan chungin an thawk peih ṭawk emaw tih mai turin hnathawh kawr an hak chiah hian an tha a zuai ta ṭhin a, hei hi kan ram ṭhanmawhbawk lian tak a ni. Football ang deuhin kum upa te hi chhuah tir ngam ila, kum upa te pawhin naupang zawk te ken nachang hre thar sela, ṭhalai zawkte kan party-a kan seng luh a hun a, ṭhalai zawk an nih mai piah lamah, lehkhathiam, tunlai chhuak, an nihna avang pawh hian ring ngam ila, hmabak eng takin alo hmuak a ni tih hi kan hriatpui a hun tawh tak zet. 

Mipui pawh hian kan ram hruaitu tura lo inpe nazawng hi kan party a an lo luh avang hian hmu ṭha vek kher lo ila, eng anga mitṭha nge a nih tihte hi i chik thar ang u. Field chhunga player 11 an pawimawh ang chiah hian kan ram rorelnaa MLA 40 te leh Aizawl Municipal Corporation-a councillor 19 te hi an pawimawhna hi a inang a. Field chhungah player 1 a lo khel ṭha lo a nih chuan awlsam takin a aiawh tur a thlak theih mai a, ram hruaina hnaah chuan MLA emaw Councillor, LADC member adt., te ang hi chu awlsam taka thlak theih an ni ve lova, kan fimkhur angai hle. 

Tunah pawh AMC councillor kan thlang dawn a, kan thlan tlinte hi an dam a nih chuan an term an hman zawh a ngai a. Football anga awlsam taka a ṭha lo lai thlak zung zung theih a ni lo, chuvangin mipui hian uluk takin kan khawpui enkawltu tur municipal corporation-a councillors thlanna kan neih turah hian ngaihtuahna i seng ang u. Municipal corporation kutah hian kan khawpui hi a innghat thui hle a, councillor chak leh viak ṭha pawh a hriat khawp mai. Eng party pawh nise inthlan a hnaih avanga a thlawna sem ching leh thil ho te te sem kual ṭhin mi hi kan khawpui hmasawnna atana mi pawimawh leh kan mi mamawh chu an ni lo chiang sa a, khawpuia cheng, mi puitling vote nei thei chin chuan mi ṭha leh kan ṭangkai pui theih mi te hi i thliar thiam ang u. 

A luhchilhna a rei tawh tih lam aiin eng nge a tih theih tih hi a pawimawh hle mai, chutih rualin rei tak politics lo khel tawh mi ṭha em em pawh an awm a ni tih hria hria ila. Football club ten an club hmakhua an ngaih avanga player, thiam leh naupang zawkte an lalut ang deuh hian kan politics field-ah hian tun lai chhuak lehkhathiam leh ṭhangtharte lalut tam ila, rorelna fawng vawn tir ang u. 

Kan ram leh khawtlang, kan khawpui kan hmangaih a nih chuan heng a chunga kan sawi tun lai chhuak ṭhalaite hi ring ngam ila. Tute pawh an sulhnu en chung leh hmathlir nei ṭha an ni em tihte ngaihtuah ila, kan hmabaka hnathawh tur awm a hlen zo ang em tih ngaihtuah chungin hnathawh kawr i hak tir ṭhin ang u.