AMC ELECTION 2021 LEH KA RILRU

January ni 30, 2021-inrinni chhuak Vanglaini chanchinbuah Congress Party Press Statement ka lo chhiar a. 

AMC-ah MNF Manifesto neih ve in awmzia a nei lo, 2015-a AMC MNF-in an Manifesto neihte an hlawhchhampui tih kha tuihnih a chakawm hle. 

Congress party statement-ah hian Kum 2015 November ni 11 (Thawhlehni) khan khatih laia MNF Vice President, Dr R.Lalthangliana’n Aizawl Press Club-ah thuthar thehdarhtute a kâwmnaah, Aizawl Municipal Corporation Inthlana MNF Party Manifesto, mipuite hnena an inzawrhna point 19 ngawt a puang a, kum 5 zet AMC-a MNF-in ro an rel chhungin an Manifesto tihhlawhtlin an nei mang lo a, khawpui enkawlna leh tihhmasawnna kawngah an hlawhchham let der, an tih kha. Kei ka lo chhinchhiah ve danah phei chuan Manifesto tihhlawhtlin nei mang lo an ni lo a, an manifesto pahnih chiah an bawhzuiin niin ka lo chhinchhiah thung.

MNF kaihhruai AMC-ah khan hma an lakna nia ka hriat ve chu AMC-a an sorkar hnu aṭanga kum 4-naa cheng nuai 95 chuang teh meuh senga khawpui lun laia Free Wifi dah chungchang leh Bawlhhlawh paih leh tihral dan ṭha zawk siam an tum, Congress sorkarin cheng vaibelchhe 40 vel sengin Aizawl Solid Waste Management Centre, Tuirial-a an lo din tawh an bawhzui, a hnua awmze nei lova mipui nasa taka min tihbuaina hi a ni. 

Bawlhhlawh paih dan chungchangah khawpui chhung mipui bawlhhlawh bawm chi 4 ngawt min neihtir a, tin, bawlhhlawh chi hrang hrang min thliartir bawk a, a chi hrang ang zelin bawlhlawh paih ni bikte siamin strict takin an kengkawh a, mipuiin harsa sain bawlhhlawh kan thliar a. Tuiriala bawlhlawh paihna hmunpuiah erawh ṭawih thei leh ṭawih thei loah chiah an lo thliar leh si tihte han hriat phei chuan khawpui chhung mipuite hmasawnna tak tak tihtur hre si loa motor tlan dan thlakthleng zut ang chauhin MNF kaihhruai AMC khan awmzia an nei loa, mipui an tihbuaina man kha to tak a ni. 

Vanglaini bawk hian ni 29.1.2021 Zirtawpni chhuakah Aizawl bazarpui building chhungkaw 2000 chuangin ni tin ei an zawnna ruahmanna felfai awm lova an ṭhiahsak ngawt thu te, MNF sorkarin MPSC an suasam nasat avanga Ṭhalaite tana lehkha zirin awmzia a neih loh thu te, Chief Minister hna ber chu Minister pakhatin kalna tur a tih apianga kal te, a kalna apianga kal tura titu Minister fak mawi chiah a hna a nih thute kan lo hmu leh zel a. Hengte hi sawi zui chakawm tak leh sawi zui chakawm lo, leh nuihzatthlakte niin ka hria. 

2015 AMC Election-ah khan MNF hian an Manifesto-ah mi retheite chenna In sak an tum thu an tarlang a, amaherawhchu hmalakna pakhatmah a awm lo mai ni lovin Aizawl khawpuia chhungkaw tam tak chu eizawnna nei lovin, ruahmanna fel siam si lovin an eizawnna Aizawl Bazarpui building pawh an ṭhiahsak zawk a, chenna In an sak sak lo mai ni lovin eizawnna nei lovin a siam zui hlauh zawk a ni. 

Nuih tiza deuh chu, Aizawl khawpui leh a chhehvel hmun remchangah ropeway siam leh hmun remchang apianga motor kawng leilâwn (fly-over bridge) siam an tum thu an sawi a, mahse, hei pawh hi kan pu ber Pu Zoramthanga kawngchhawng leh Pu Robert Romawia Stadium chhawng siam tum ang maiin kum 5 an sorkar chhungin Aizawl khawpuiah AMC-in ropeway an siam hi mumangah pawh hmu kan awm lovang. 

MNF AMC khan Aizawl khawpui Plastic Free City nihtir tumin April, 2019 chho velah hma an la hluai a, Polythene micron 50 aia pan hman an phal lo thut a, sumdawngho polythene zawrh laite an mansak a. Tualchhunga entrepreneur ṭhenkhatin sum tam tak sengin polythene thlakna tur bag siamchhuah hna an thawkin beiseina sang tak neiin phur takin hma an la a, mipui kan inher rem dawn chauh tihah an hmalakna an chawlhsan leh daih a. Tunah chuan Plastic Free City siam tuma hmalakna engmah a awm leh tawh loh bakah Entrepreneur eng emaw zat leiba tam tak neiin an siam ringawt a ni. Hengte hi mipui pawisak lohna thuk tak niin a ngaih theih a. Hemi kawngah pawh hian mipui an bum kawi kual vel tiin a sawi theih ang. AMC Mayor Pu PC Lalhmingthanga hova Aizawl Plastic Free City siam tum kha Chief Minister Pu Zoramthanga hova Aizawl khawpui Traffic Jam awm lohna khawpuia siam tum nen a inmil tawk viau a ni. 

Han sawi tak zelah chuan Mizoram mipuiin beiseina sang tak kan neih, Kohhran pawhin kan support em em ZPM Party pawh hi Zoramthar, kalphung thar kan nei hnai e, tiin kan phur em em kha an ni a. Mahse an MLA te chet zui duh dan thlir hian engtikah mah ZPM hian kalphung thar hi min hmuhtir dawn lo a, Politics-ah Mizoram mipui beidawnna nasa zawka min siamtu an ni mai lawm ni ka ti. 

ZPM ticketa Local Council member-a thlan tlin, Mizote tana mi hlu, dikna ṭana mi huaisen kan neih Pu PL Liandinga thukhawchang, "ZPM hi ka rin loh ang deuhvin thlai tharte lei ta lo se (inthlanah lo tling ta se), kan ti ang an tih tam tak hi ti leh ta si lo se, a Party khawngaih vang emaw, mahni chanvo tihṭhat nan emaw ka vuan zui reng lovang. Ka bansan ve daih ang a, thudik nia ka hriat chu ka sawi bawk ang. Tunah pawh motor neih chungchangahte hi chuan ka rin angin kan MLA te an awm lova, mahse chumi avang ringawta han bansan thawt thawt chu a la hma deuh va. Thlai tharte kan lei a, kuthnathawktute hamṭhatna kan thlen tak mialin tiin ka la thlawp ta mai a ni e..." tiin ZPM MLA election-a an Campaign au hla MLA motor leina senso leh MLA hlawh a tam lutuk, mipui phurrit a ni, tihhniam a ngai tia kalphung thar a beisei, an MLA ten kalphung thara kal hunah an kal leh si lo te, an MLA te ṭhukhawmin ZPM te chuan an motor-ah MLA tih an tar ve lo ang, tia an pass ngei pawh an zawm chuang si lo; a mangan thu a sawi hial a ni. ZPM MLA te hi motor leina leh MLA hlawh tihsan chungchangah an Val Upa Council in kalphung thara an kal leh si loh avanga an mahni Vote-tu mipui rilru an tihhnual nasatzia lehkha pein an hriatttir hial a ni awm e. 

Heng zawng zawng chhut hian Congress hian tuna Party duhsakna tel lova AMC-a mi ṭha an zawng a, Candidate atana an hmang ngam ang hian Chief Minister Candidate tur mi thar nei se, party nghet leh inkaihhruaina mumal tak an neih avang hian MNF leh ZPM ai chuan an tho chhuak leh hma zawkin a rinawm.