AMERICA PRESIDENT ATÂNA THLAN THUSAWI LEH INPUMKHATNA

US President kal chhuak ta Pu Donald Trumpuia chu Zoram khawvela mipui tam tak chuan ui tak chungin kan thlah liam ta a, Kristiante khawvela a hnathawh ṭhat zawng zawngte chu kan theihnghilh lo vang; hetiang hi a nih takah chuan, kan beisei loh leh rin loh zawk chu US President lo ni ta mah se, Pathian rorelna hnuaia thil thleng a nih miau avangin kan pawm thiam a, khawvela sawrkar leh ram thil tithei ber hruaitu lû ber Pu Bidena tan leh a kaihhruai America mipuite tana kan theih ang anga ṭawngṭai chhunzawm zel a ṭha hle a ni. Engpawhnise, Kristiante rilru aṭang leh Mizo mipui tam zawkte thlirnna aṭanga duhawm lo zawk deuh nia lang ni mah se, hotu lu ber atana thlan (President-elect) Joseph Robinette Biden Jr.- Inrinni zan thu sawi kha tawi hle mah se, han chhut chet chetin a ṭha lam zawnga dâwn tisei, kumkhuaa hriat reng tlak, thinlunga ri ring leh  pawimawh  êm êm mai, tunlai kan ram kohhrana kan mamawh em em bawk si chu 'inpumkhatna' thu leh inṭawiawmna/thawhhona lam thu kha a ni (I pledge to be a President who seeks not to divide, but to unify). Bible behchhana a thutiam meuh a tihhlawhtlin loh erawh chuan, inthlan lehah a tlak phah emaw a ni ang a; tling leh pawh ni se la, khawvel pumpuia mihringte chunga Pathian rorelna ang tho kha a chungah Pathian rorelna a la thleng dawn tho tho va, chuvangin US inthlan thu hla hi chu enghelh lutuk tawh lovin, Pathian kutah dah hmiah rih ila, a hahdamthlâk tawh âwm e.

Kan rama kohhrante pawh hian Chanchin ṭha hril kawngah inpumkhat leh thawhho ṭhat kan mamawh tial tial a. Khenbeh atâna man a nih hma pawh khan kohhranho an inpumkhat zel theih nan Lal Isua'n a Pa a dîl kha [John. 17 (e)]; Mizoramah hian kohhran hrang hrang 80 chuang a awm a, khawvel inlumlet zel karah hian Mizorama kohhran hrang hrangte hian inunau lehzual kan mamawh telh telhin a lang. Thawhhona ṭha neih nan leh ringtute inpumkhat zêlna atan thawhhona inpui leh leilâwn 'Mizoram Kohhran Hruaitu Committee' (MKHC) pawh a awm a, hei hi hmasawnna ropui tak ni mah se, MKHC hi kan ṭawiawm ṭhat loh chuan amahin thil tak tak a ti thei lo tih hriain a member kohhranho mai ni lovin, he inpuia la lût ve rih lo kohhran leh Isua ringtu kohhrante, PATHIAN ringtu zawng zawngte chuan theih tawpa kan ṭawiawm a ngai a ni. Chanchin ṭha hril tura khawngaihnaa chhandam kan nih avangin mahni ram chhungah emaw Zoram pawnah emaw, India ram pawn khawvel ram dangah emaw kohhran dangte'na Thlarau Thianghlim hnathawh azara ringtua an lo siam tawhte mahni kohhrana lâk leh tuma beih beih emaw thlêm thlêm emaw hian kohhranho inlungrualna, thawhhona leh inṭawiâwm tawnna ṭha thlen ahnekin inlungrual lohna, sakhaw dang betute min hmuhsitna a thlen zâwk mai piah lamah, an mithmuha Kristiante hmai timâwktu leh Chinchin ṭha hrilna kawnga thawhhona tichhetu hlauhawm tak, Conoravirus ai pawha hlauhawm zawk a ni thei a ni.     

Tun hmain, kohhran dangte'na ring lo mite ringtua an lo siam tawhte mahni kohhrana thlem luh tumna rilru kan lo nei tawh a ni mai thei e; hetiang hi a lo awm tawh ṭhin emaw pawh ni se, kumin 2021 aṭang hi chuan rilru thar pua hnuchhawn a ngai; hetianga kohhran dangte'na ram thim an bawh ên tawhsa chhunga ram (mission field ang chi) thar hawn ve kher emaw, ṭawngkam mawi lo ni lo se, 'Kohhran dang beram rûksak' ang chi hi chu a awm kei chuan ka hre ngai lo va, a lo awm ṭhin emaw a nih pawhin ṭawngṭaina nen, tih tawh loh vang vang chi a ni tawh ang; kan Lalpa Isua thuchah 'Chanchin ṭha hril' (Mat. 28.19-20, Mark.16: 15-17, adt) hi Isua la hre ngai lote leh Lal Isua Krista Chandamna la hre/chang ve lote hnena Chanchin ṭha hril tura thupêk hi a kawh ber a ni a, Isua hre tawhte leh Chhandamna chang tawh, kohhrana lak luh tawhte kohhran danga lût tûra thlemte hi Isua min zirtirnain a tum a nih hmel loh avangin ringtute rilruah pawh hetiang lam thu hi chu a tlangtla lo hle bawk niin a lang.

US President atana thlan a nih hnua mipui hmaa a thu sawi hmasak ber ṭuma Pu Joe Biden-an America mipuite tihpumkhat a tiam ang hian hian tun aia kohhran (denomination) zawng zawngte thawhhona leh inpumkhatna ṭha a thlen theih nan ṭawngṭaiin, kohhran zawng zawnga hruaitute hi Pathian hnenah an intiam ve thei ang em tih hi ngaihtuah zui atan ni se.

USA leh India chu mipui sawrkarna ram ve ve a ni a; US chu President thu leh lal berna (Presidential form of Democracy) a nih laiin India ram chu Dan-Siam-Pawl (Parliamentary form of Democracy) a ni ve thung a; India ramah a taka lal ber leh thu nei ber chu Prime Minister-in hotu ber nihna a channa Rorel Pawl– Council of Minister-te (Council of Ministers headed by Prime Minister) a ni. Mizoram chu India ram bung khat kan ni a; America rama President thlan tharte'n lak luh an nih dawna Bible an nemchhan angin a tih ve theih loh avangin kohhran zawng zawngte inlungrualna tlang chu  kan roreltu tur thlan tharte'n thlaraua an innghahna lungpui  a ni ve ngei thung ang.