ZODIN SQUARE-A FOOD TRUCK

Keini sorkar hna thawk ni ve lo, mahni kutkawiha eizawng tan chuan theih tawp chhuaha hnathawh a ngai a, chuvang chuan kan zing chhuak hi zan dar 8 velah te kan hawng fo ṭhin. Chutiang a nih avang chuan kan hnathawhna bul maia Food Truck rawn awm chu a lawmawm em em a, rang takin ei tur an peih a, lum ṭha takin kan ei a. 

Ei tur chi hrang hrang an neih avangin duh duh kan thlang mai a, a remchangin lawmawm kan ti hle. Keini ang bawka chhun lama hna thawh buai avanga hun awl nei ngai reng reng lo chuan hahdam taka zan boruak daiah thil ei paha hahchawlhna hun an hmang kha hnathawk rim tan chuan hahdamna hun ṭha tak a nih bakah awlsam taka eitur a awm avangin thil lawmawm tak a ni. 

Helai Food Truck awmna hmun, Zodin Square hi keini hnathawhna hmun kiang mai a nih avangin hetiang thim hlim velah hian mi che vel hi ka thlir fo a. Chhun zan zawma mit tikhamtu awm reng chu drug addict ho hi an ni. A chang leh an in um khut khut a, a chang leh an inhnial buai a, a then te lah an lo muhil bawrh bawrh a, thil bo a awm reng bawk a. A kianga dawr nei leh midangte tan hi chuan ninawm ve tak an ni. Hengho hi 24x7 in chawl loin an awm a ni mai a, damdawi zuar an awm hnai em? tih chu ka hre chiah lo nain eng vanga helai hi addict awm reng nge an nih hi a chhan ka hrethiam thei tlat lo. Khawtlang hruaitute emaw thuneitute tan chuan duty in siam a hengho hi hnawh bo dan emaw awm thei sela a thawven thlak ngawt ang. 

Tichuan, tun hnai lawk August 30 zanah emaw ni chuan zan rei tawh lamah in tibuai an awm ta a. Chung in tibuaite chu Dawrpui Local Council hruaitute ka aṭanga ka hriat dan phei chuan helai vela zan duty an ni awm e. Duty-ten buaina an tawh avang chuan heti hian Dawrpui Local Council lam aṭangin Food Truck te chuan lehkha an dawng ta daih mai a, a mawhphurtu-ah Food Truck te chu an ngai a ni chek ang a, an eizawnna chu an khapsak ta a nih chu! Dawrpui Local Council-te hi an demawm hauh lo nain thil bulbal tak hre ta sela Food Truck te hi buaina chhuah chhan berah an ngaih ka ring lo a ni. 

Food Truck dawrtute hi mi polite tak takte an ni hlawm a, a bik takin lirthei nena hmun hran aṭanga rawn kal a, an ei zawha kal bo leh nghal maite an ni hlawm ber. Keini ang bawka hnathawhna hmun aṭanga haw tlai te pawh an hmel ka hmu fo a, regular taka heng lai hmuna addict te hi chuan an dawr ngai meuh pawhin ka ring lo. Food Truck te hi tute nge an nih ka hre lem lo a, hmun hran aṭangin an rawn kal a, dar 10 velah hian an bo leh diak mai ṭhin a, an awm lai erawh chuan mi hian an bawr laih laih hlawm a, hetiang hi kan mamawh ve tawh viau a nih te pawh ka ring a, ka lo lawm ve viau ṭhin. Mizote hi kan changkang sawt a nih hi te ka ti hial a, keima tan tak phei chuan a tuk leh zing chawhmeh turte ka hawn fo a, remchang ka ti viau mai. Mi sawi ka hriat danah chuan Durtlang aṭang tea rawn kal an ni awm a, nachang hria ka ti viau mai a, eizawnna vang tawh tak kara hetiang eizawnna an han hmu chhuak thiam hi kawng lehlamah chuan ka lawmpuiin ka chhuang ru hle mai. Min hrilh zel danah chuan mipui tana pan remchanna lai, hmun fal lutuk si lo leh traffic tihbuai lohna lai tur an zawng a, helai Zodin Square hi hmun remchang bera an hriat avangin tlangnel takin zan tin motor-in an in zuar ta ṭhin a ni. 

Dawrpui Local Council lam aṭanga hetia khap a ni ta hi engnge a chhan ni ang? tiin an hruaitute pawh ka bia a, anni chuan tun hma lam aṭanga complaint a awm avang leh tun hnaia duty leh customer te intih buai vang ni awmin min hrilh. He complaint awm hi engnge? tia ka han zawh thui zel chuan mi awm ṭha duh lo an tam ṭhin vang niin min hrilh. Heti a nih chuan Dawrpui Local Council te hi an demawm hauh lo mai a, nimahsela chik zawka ngaihtuah chuan mi awm ṭha duh lo awm khawm phahna ang hiala an ngai hi chu a dik dawn em ni? ka ti deuh. Tlang taka sawi chuan Aizawl veng tin hian mi khawlo kan nei vekin a rinawm a, chung mi awm ṭha duh lo, mi awm ṭha duh lote chu khawtlang hruaitute phei chuan an hming pawh an lam fak fak theih hialin ka ring. 

Zodin Square-ah hian Food Truck awm hmain heng mi awm ṭha duh loho hi an la awm miah lo a, Food Truck awm hian an rawn inlar chauh em ni? ti ila a teuh lo mai. Kum 10 hma lam daih tawhah khan Zodin over bridge leh kawng phei velah sawn heng mi awm ṭha duh loho hian zalen takin hun an hmang tawh a, vawiinni thlengin an la awm tih hi ka mit ngeiin ka hmu a ni. Heng mite hian khawtlang an tiṭawp em em a, kan Aizawl khawpui hmun laili ber hi kum naupang zawkte tan thla a ngam loh phahna hmunah an siam fo. Motor kawngpui a chep avangin kawng kan duh ṭhin hmeichhe naupang te te hian ngam leh ngam loin over bridge-ah an kal phah a, khur hlak hlak chungin hmanhmawh takin an kal fo mai. Hengte hi thuneitute hian an hriat hmaih nge an hre lo hrim hrim zawk ni ang? 

Tin, eng vanga Zodin Square-ah hian addict ngampa bik hrim hrim nge a nih tih pawh hi ngaihtuah tham a ni hial awm e. Aizawl khawpuia hmun laili tak a nih avangin khualzin leh mipui nawlpui pawh kan veivah tamna hmun ber a ni si a. Hetiangin Dawrpui khawtlang hruaitute hian hma an la ta sa sa bawk a, 24x7 hian duty in dah thei sela a va lawmawm dawn tak em. A kianga eichawp dawr neite tan pawh thil bo awm tawh lo tur ringawt pawh hi a lawmawm hrim hrim alawm le. 

Mizo society chhe tawh tak hi tunge siam ṭha ta ang le? A neitu ber tur kan ram hruaitute aṭang lah hian beisei a bo nghal ringawt bawk si. He Zoram hian ram hruaitu atan ṭawngkam thiam leh sawi tlawrh thiam ringawt hi a mamawh lo a, a taka thawktu leh a taka ram hmangaihtu a mamawh tawh a ni. 

America President Obama ‘Change’ tih leh kan ram hruaitute ‘Change’ tih te hi khawilai hmun emaw hming thlak ringawta change thlen tir lo hian inang deuh ṭhin sela, intellectual zingah pawh fiamthu thawh nana hman a tlem deuh lo’ng maw? Sum leh paia hminghliauna nei lo te hi thlan tlin nachang hre turin ram mipuite pawh i harh teh ang u. Kohhran rawngbawltute pawh hian Pulpit tlanga thu ṭha tak tak sawi dum dum mai duh tawk loin Biak In pawnah rawngbawlna hmun a tam lutuk, rawn pen chhuak teh u. 

Zodin Square a lu lam leh mawng lam pawh hre hrang tawh loa KS leh drug addict awmte hi pakhat tal hruai chhuak turin in puan in hmun rawn zauh hram teh u, tiin inthlahrung tak chungin ka ngen a che u.  Hetia an dinhmun ngaihtuah pui loa a thei theiin thuneihna kan lekkawh zel a, kan ngam zawng leh kan zuam apiang te hnena dan kan vai vung ringawt zel chuan he kan ram hian hma lam a pan thei mawlh lo ang.