Tu chin nge Pastor leh Evangelist firfiak?

January 15 khan Hnam Runah inkhawm an nei a, chutah chuan Congress hunlaia Home Minister ṭhin tuna MNF huna Power Minister ni zui thei zel Pu R Lalzirliana chuan thu a sawi ta a, Evangelist firfiak leh Pastor firfiak chanchin a sawi chuan beng a verh ta zar mai. 

Pu Zira chuan, "Tun inthlan khan ka bialah chuan min hneh an rin loh avangin Congress thuneitu sangin ZPM vote pui turin an mite an lo ti a. Vote 1000 chuanga hneh tura ka inngaih laiin 148 chauh ka hnehna a ni ta a. Pulpit tlang hi Evangelist firfiak leh Pastor firfiak bakah Upa ṭhenkhatin po­litics sawi nana kan hmang kha pawi ka ti a. Pulpit tlangah hian politics kan sawi duh a nih pawhin Lal Isua politics, Lal Isua chanchin chauh sawi ila a ṭha ber ang, Pulpit tlang thianghlim hi mahni duh duh sawina hmun a ni lo. 

Synod-in Pastor transfer a siam khan a puangtu puan hmain tlaiah a list an tichhuak ta mai kha a mak hle a ni. ZPM kha lo sorkar ta se, keini kohhran (Presbyterian) hian kan tuar ber ang a, bang an tam ngawtin ka ring, he thu hi tun hnaiah kan kohhranah pawh ka sawi a ni," a ti. 

Politics-ah hi chuan thlirna hrang hrang a awm thei a, keini politics lam ngaihven lova lo kohhran rum rût tan chuan a tu chin hi nge Pastor firfiak? A tute hi nge Evangelist firfiak tih hi zawn chhuah thiam a harsa khawp mai.

Thil hriat chak­awm chu a engah hian nge 'firfiak' hi an teh ang a, firfiak an tihte hian eng thu nge an sawi a, eng chin hi nge firfiak hi tih  kan Minister hian min hrihfiah thei se kan duh bakah a ngenin kan ngen nghal a ni. 

'Firfiak Pawl' kan tih hi chu terrorist te sawina hi a ni. Tunlai hian kan Pastor zingah 'rorelna dik' an sawi chuan kan ngaithei lo em em tawh niin a lang. Evangelist zingah 'Kristian sakhua leh politics dik' tih sawia Pathian thu aṭanga thil an thlir chuan tute emaw hian an party an bei emaw an inti nghal tawh, an tia lawm. 

Engpawhnise MNF hian an Press Release meuhvah 'Pastor Firfiak leh Evangelist Firfiak' tih hi an ziak chhuak bawk a, hei hi chu mipui hnenah an sawifiah a ngai. Pastor Firfiak chu kohhran mi pawhin kan duh lovang, Evangelist firfiak chu mipui pawhin kan ei lovang, a list han tarlang thei se. 

Hnam Run lam hian ziakin mipui hnenah 'firfiak list' hi rawn ziak se, a nih loh chuan he thu hi kan hre reng dawn a ni. Kum 5 bak daih loh phahna tham a ni.