ICFAI

Zirna-ah kan ṭhangharh ve zel a, hma pawh kan sawn. Kan zirna inpui MZU-ah zilaite kan lut leng vek si lo, thiamna duh si, phai lama awm remchang lo leh Mizoram ngeia zir ve duhte tana remchang takin ICFAI University, Mizoram chu Durtlang-ah an din a. Zirnaa ṭhahnem ngai takten an pan khawm a, zirchhuak tam takin mahni eizawnna ngialnghet an lo nei tawh bawk. Chu tianga university ṭangkai tak a nih lai mek chuan tlem lai deuh aṭang khan boruak duhawm lo tak an tawk tih thawm a lo awm tih, ni 8/8/2019 a employes forum press release aṭangin chanchin chu kan hre fur awm e. 

Icfai University-ah hian MA Political Science hi kum 2 ngawt ka lo zir ve tawh a, khang hun lai kha chuan tun ang em ema buaina leh harsatna hi keini zirlaite kha chuan kan hre lem lo. Zirtirtu inpe tak takin theihtawp chhuahin min han zirtir a, dissertation kan tih tak tak lai phei chuan chhun thingpui hi kan supervisor-te inah kan in nitin a ni hawt a. Inpawh leh in lungrual takin kan zirlai kan sawi ho a, harsatnate in hrilhin sutkian dan kan zawng ho ṭhin. 

Keini Dept pawh khan theihtawp chhuahin study tour neihna tur sum kan tuak a, football khel leh pickle zuarin sum kan hailut nasa ve khawp mai. A tawpah kan ṭanrualna leh kan zirtirtute puihna leh khatih laia kan VC, Lt. Gen. AK Misra ruahmannain Indo - China border, Nathula (Sikkim) chu kan han tlawh a. Khualzin nazawng kal phal lohna, China leh India palaite inbiakna tura duan pindan chhung rilah te zirlaite leh sipai hotute nen inkawmhona kan nei te kha a va hlawkthlak tehlul em. Vaihna Varṭian ziaktupa tuallenna Gangtok khawpui bazar lun lai tak, MG marg-ah pawh ka ketin ka han chhuih kau ve hak kha! Mahse ka nun a mel lung pawimawh a ni ve tlat, Icfai-ah lut lo ni ila khing khing ka han thlen ve phak pawh ka ring lo. Department hrang hrang, Cherrapunjee zu daidartute leh Taj Mahal lam tlawhtute aṭanga Kawtchhuah ropui lam sulhnu chhuitute thleng kha chuan ka sawi vek seng lo, ka hrekim seng lo bawk. 

Kum tawp a lo hnai a, final exam kan hmachhawn hma hian company hrang hrang lo kalin an company a thawk tur an rawn zawng ṭhin. Zirlai tam tak, a bikin management lam ngat phei chu hna hmusaa exam hi a tam zawk an ni hial awm e. Tin, exam result chhuah hnua hna hmute nen phei chuan zirlai hlawhtling tam tak an lo chhuak tawh a ni. MA chhuah ruala NET nei tihte kha chu sawi vek lo ila, hun a heh mai mai. 

Hetiang a nih mek lai hian khang hun chhung khan harsatna ruk zirlaite-ah hian a awm a, chhel taka kan tuar hram hram vang khan kan mualpho lo a tih theih ang. Chung zinga ṭhenkhat chu han inpuan ta law law ila. Thlan tla hluamin Chanmari-ah bus kan lo chang a, kan channa a rawn thlen meuh chuan kawngka bulah mawi lo zeta pharkakin kan ding sawi ve laih zel. Millennium Center bula ka chan tak hnuah chuan a hma aiin dinna tur kan chang ṭha tawh deuh; ka ṭhu ve ta emaw in lo ti ang e, a teuh lo mai. Kum hnih chhung khan ban pharin class ka kal a ni ber mai - zir lo mah ila hlawhtling tlak ka ni. Class room kan indaih lo em em maite kha a rualawh thlak ṭhin khawp mai. Period hnih dan lek lekah kan room kan sawn kual sek a, auditorium a class lak kha chu a nuam lehling, ṭhutna kha a dup nuam a. 

Khang kan zir chhung zawng khan zirlaite khamkhawp pur chawkna tur lehkhabu ṭha library-ah khan a awm lo mai ni loin, kan ṭamhnem daih pawh a awm lo. Kan department bik phei kha chuan State library card kan nei vekin ka hria. A vannei deuh leh MZU lama hmelhriat neiten MZU library lamah in hnangfakna tur an dap a. Lehkhabu zawng khan kan phi buai reng mai a, district library pawh duhthusam lo ti ru fo chungin kan lut chhuak awl lo. 

Projector pahnih vel a awm ve a, hman kha kan inchuh a ni ber mai a, kan chan miau loh chuan eng anga pawimawh presentation pawh nei dawn ila, Power Point a tih tur pawh ni se, a tih theih loh nghal pang mai. Loh theih lohin Green board-ah kan thai chik leh tuar tuar ṭhin. Khati khawpa hmanraw nei chhe chung khan rual kan pawl pha lo bik ang tih hlauin theihtawp chhuahin min zirtir a, zirtirtuten MZU lama lehkhabu zawng tura min phurhthlak lawp lawp chang lah a tam. Kan zirtirtute kha an lo va fakawm tehlul em, keini ang mai mai lo deuh phei chu zirtir sela an va chhuah ropui dawn em! 

Prospectus en mai kha chuan sports lamah pawh a thu chuan hma kan sawn dawn viauin a lang. Mahse thu chu tisa-ah a chan si loh chuan engnge sawt ang! Kan sport ground neih chhun pawh parking area a ni daih a, hmasawn viau ngaihna a awm lo a ni. Chawlh lai vela driver ho carrom board pen en peih loh chuan bus phena ṭhuta mi kawng kal thlir bak kha infiamna tur dang kan nei lo; nula chhelo deuh biak tur nei kha best player an ni leh mai! 

Thil zawng zawng sawi lan sen a ni lo a, heng harsatn kan tawh chhan bulpui ber chu ICFAI society-in a intiamna a tihhlawhtlin loh vang a ni. Tun hnaiah phei chuan boruak duhawm lo a lo irh chhuak ta a. Zirtirtu ṭangkai leh nihna pawimawh tak tak chelhtu mi 5 lai an ban thu kan lo hria a. Exam laklawh lai tih tawp an ni tih thawm ka hriat phei kha chuan Mizote hi hnam in lungrual lo tak kan ni ta mai em ni tih ka ngaihtuah rum rum mai. Thla thum hlawh la lo chung pawha tlawmngai a zirtirna pe hram hramtute pawh, zirtirna pe chhunzawm thei loa an awm khan rilru a tina takzet. 

An han buai laih laih a, a hnuah zirna chhunzawm leh theih a ni tih thu lawmawm kan lo hre leh a, mahse khang an zirtirtu ban tak mi ṭangkai tak tak, zirlai pawlin dahlet tura an ngen lawm lawm te pawh dahlet thei lo leh tun thlenga hlawh an pek theih loh zirtirtute zinga mi 20 dang ban leh mai theih an nih thu acting VC-in zirlai nu leh pa kalkhawm hmaa a sawi te hian ngaihtuahna erawh a tibuai viau mai. 

ICFAI society hi a intiamna anga fel leh dik taka a kal a ṭul a ni. An thutiam hlen lova, dan leh Mizote min palzut reng avangin tun dinhmun duhawm lo tak hi kan thleng ta a ni. Hetia kan tualzawl ngeia hnamdangin kan zirlaite an suasam lai hi sawrkar hian ṭhuthluangin a lo uipui tuilian thlir veuh veuh mai dawn em ni ang le? Sawrkar hian heng harsatna hi a chinfel a, hnamdang hmaa kun a fate hi a chhe lehzual zawk an thlen hmaa a chhan chhuah vat a ngai a ni. Chu ti a nih loh chuan tho tur awm lek loin a tlusawp mai ang tih a hlauhawm mang e. 

Zirthiamna hi kan hnam tan a thil pawimawh lutuk, khawvel changkang zawkte ruala ke min pen tir theitu, khawvel zau zawk kan thlir ve theihna tukverh a ni tih hre rengin sawrkar hian tukkhum chhah chhawn lova a buaipui vat hi a tih makmawh a ni. Hnamdang laka mahni fate thlavang hauh ngam sawrkar kan mamawh hle a ni. 

Zirlai tam takin harsatna an tawh hi zirlai pawl liante hian an bengkhawn a hun ta viau bawk. Kan zirlai puite hi hnamdangin sumdawn nan maia an hman hi i phal lo ang u. Kan ṭan rual chhan University ṭha lehzual kan din thei ngei ang. Hawh u theihtawp chhuah tlang ila, kan zoram nghahfak, ram ro tling kan zirnain tluchhe mek hi i din thar leh ang u.