Ṭhlaite ngaihsak hlawh lo CM tuala vai pawl

Tun hnaia kan chanchin hriata thu thinṭhawng ber pakhat chu kan Chief Minister office tualah Bharat Hitaraksha Abhiyan (BHA) intite an pungkhawm a, heng mite hi Vai vek an ni. Kan CM kawta Vai pungkhawm hi keini ang thin chu a khei sa der tawh a, an punkhawm chhan an sawi chu Tuikuk lo kir tumte tan hamṭhatna an dil sak an la ti ta deuh deuh a, hei lo liama ram leh hnam humhalh tumtu ṭhalai rual YMA kan tihte au chhuah hun hi a awm dawn ngai em ni le? 

YMA-te hian ram leh hnam humhalh hi Heroine man te, ramria thawm a awm hnua rik hluaite chauh hi ni lovin kan rorelna in sanga hnam dang lo lut dum dum um chhuah leh umzui hi ram leh hnam humhalhna a ni tih hria se ka va duh tak em. YMA hi ka tawngpawng dem hauh lova, a chhan chu heng vai rual BHA-te lo kal hi mipui hian kan hre lova, social media lama a darh pawh kha thil a thlen hnu daihah khan a ni a, September 7-ah BHA mi 100 chuang hi kan CM pisa tual ah an pungkhawm tawh a, Mizo mipuite hian kan hre lo reng reng. 

Heng mite hi India ram state hrang hranga Hindu pawl an ni a, Tuikuk (Bru) tam tak hi Hindu sakhaw vuantute an ni a, tichuan an sakhaw biak ang be vetute Mizorama an lo kir huna hmun khata dah khawm theih dan kan CM hnenah an rawn thlen sak niin an sawi. Chumi awmzia chu heng mite hian an duh chuan CM hi e-mail in lehkha an thawn thei a, an duh ang hi chu state pawnah pawh lungawi lohna lan tirin emaw an ti thei a, kan state khawpuia an lo lut ngam hi a ni YMA, MZP, MSU etc tana ngai mawh ngai lai ber ta chu ni. Mizorama Vai lo lut hrim hrim hi ngai mawh tur a ni lova, Tuikuk thlavang hauh tura CM kawta lungawi lohna lantir (demonstration nei) tura an lo lut hi ngaimawh tur a ni. 

Mizo ṭhalaite hian Instagram kan ti, inkhel kan ti, Facebook kan ti, miss kan ti, model kan ti a, PUBG kan ti, thil dang kan ngaihtuah laiin kan rama kan roreltu pawimawh ber office tualah hnam dang, sakhuana aṭanga teha ring lo mi lehnghal 100 chuang an lo lut a, chu pawh ngaimawh lova kan awm a nih chuan kan ram hi humhalh kan tum lo a ni zawk lo maw? 

A ngaimawhtu awm chhuna langte chu political party an ni a, hei hi chu party thilah lo dah ta ila. Mizo ṭhalaite hian kan hotupa CM tuala Vai 100 vel lungawi lohna lan tir hi kan ngaimawh tur a ni a, CM office lam emaw, sorkar lam aṭang tal pawhin sawifiahna hi chu tih a ngai khawp mai.